ତିଗିରିଆ : ତିଗିରିଆ ବ୍ଲକ ହାଟମାଳସ୍ଥିତ ପ୍ରାଚୀନ ଶକ୍ତିପୀଠ ମା’ ଦୁର୍ଗାଦେବୀଙ୍କ ପୀଠରେ ଶାରଦୀୟ ପାର୍ବଣର ଚତୁର୍ଦ୍ଦଶ ଦିବସ ତଥା ନବରାତ୍ରର ମହାପଞ୍ଚମୀ ପର୍ବ ଶୁକ୍ରବାର ପାଳିତ ହୋଇଯାଇଛି । ମା’ ଦୁର୍ଗାଦେବୀ ପଞ୍ଚମୀରେ ମାହେଶ୍ୱରୀ ବେଶରେ ଭକ୍ତଙ୍କୁ ଦର୍ଶନ ଦେଇଛନ୍ତି । ଏହି ଅବସରରେ ପ୍ରତ୍ୟୁଷରୁ ପୀଠରେ ଦ୍ୱାରଫିଟା, ମଙ୍ଗଳଆଳତୀ, ସ୍ନାନ ପରେ ପଞ୍ଚ ଉପଚାର ଅନୁଷ୍ଠିତ ହୋଇଥିଲା । ଏହା ପରେ ଷୋଡ଼ଶ ଉପଚାର ଏବଂ ମଧ୍ୟାହ୍ନ ଖେଚୁଡ଼ି ଭୋଗ ଅନୁଷ୍ଠିତ ହେବା ସହିତ ପରେ ଚଣ୍ଡୀପାଠ ଓ ଅନ୍ନଭୋଗ ହୋଇଥିଲା। ସନ୍ଧ୍ୟାରେ ସନ୍ଧ୍ୟା ଆଳତୀ, ଚଣ୍ଡୀ ପୁରାଣ ଆଦି ବିଧି ପାଳନ କରାଯାଇଥିଲା । ଶାରଦୀୟ ଷୋଳପୂଜା ଅବସରରେ ପ୍ରତ୍ୟେହ ସକାଳ ଏବଂ ସନ୍ଧ୍ୟାରେ ଆଖପାଖ ଅଞ୍ଚଳର ବହୁ ସଂଖ୍ୟାରେ ଭକ୍ତ ପୀଠକୁ ଆସି ଦେବୀଙ୍କ ଦର୍ଶନ ସହିତ ପୂଜାର୍ଚ୍ଚନା କରୁଥିବା ଦେଖିବାକୁ ମିଳିଛି । ପୀଠରେ ପ୍ରତିବର୍ଷ ମହାଷ୍ଟମୀ ଏବଂ ବିଜୟା ଦଶମୀ ଦିନ ପ୍ରବଳ ଜନସମଗାମ ଦେଖିବାକୁ ମିଳିଥାଏ। ପୀଠରେ ମୁଖ୍ୟ ସେବିକା ବ୍ରହ୍ମଚାରିଣୀ ବ୍ରହ୍ମପ୍ରିୟା ଦେବୀ, ପଣ୍ଡିତ ଶ୍ରୀନିବାସ ମହାପାତ୍ର, ଶଶୀ ଭୂଷଣ ମହାପାତ୍ର ପ୍ରମୁଖଙ୍କ ସହିତ ଅନ୍ୟ ସେବାୟତମାନେ ଉପସ୍ଥିତ ରହି ଦେବୀଙ୍କ ଏହି ଶାରଦୀୟ ଉତ୍ସବର ସ୍ୱତନ୍ତ୍ର ପୂଜାପର୍ବକୁ ସୂଚାରୁ ରୂପେ ସମ୍ପାଦନ କରୁଛନ୍ତି।
Comments are closed.