ଗଣେଶ ମୂର୍ତ୍ତି ଭସାଣ ସାରି ଫେରିଲା ବେଳେ ଅଘଟଣ, ଅଟୋ ଓଲଟି ସାତ ଆହତ

ଗଞ୍ଜାମ :  ରମ୍ଭାଥାନା ଅନ୍ତର୍ଗତ ହୁମା – କଣ୍ଟିଆ ଗଡ଼ ରାସ୍ତାରେ ଗଣେଶ ମୂର୍ତ୍ତି ବିସର୍ଜନ କରି ଫେରୁଥିବା ବେଳେ ଅଟୋ ଓଲଟି ସାତ ଜଣ ଆହତ ହୋଇଛନ୍ତି  । ସେଥି ମଧ୍ୟରେ ତିନି ଜଣ ଗୁରୁତର ଆହତ ହୋଇଛନ୍ତି । ଗୁରୁତର ଆହତଙ୍କୁ ବ୍ରହ୍ମପୁର ମେଡିକାଲକୁ ପଠାଯାଇଥିବା ଜଣାପଡ଼ିଛି । ସମସ୍ତେ ଆହତ ମାନେ ହେଲେ ଖଲିକୋଟ ଥାନା ଅନ୍ତର୍ଗତ ବିକ୍ରମପୁର ଗ୍ରାମର ଅଶୋକ ପହାନ, କୃଷ୍ଣ ବାରିକି, ଗୋପାଳ ବାରିକି, ଲିପୁ ପହାନ, ଅରୁଣ ପରିଡା, ଗୋପାଳ ପରିଡା, ଚନ୍ଦନ ବେହେରା ପ୍ରମୁଖ । ଗୁରୁତର ଆହତ ମାନେ ହେଲେ ଗୋପାଳ ବାରିକି, ଲିପୁ ପହାନ ଓ ଅରୁଣ ପରିଡା ।
ଦୁର୍ଘଟଣା ପରେ ସ୍ଥାନୀୟ ଅଂଚଳ ଖଟୁଆ କୁଦା ଗ୍ରାମର ପ୍ରଦୀପ ସାହୁ ଓ ଅନ୍ୟ ମାନେ ଆହତ ମାନଙ୍କୁ ଉଦ୍ଧାର କରି ଅନ୍ୟ ଏକ ଗାଡି ଯୋଗେ ଆଣି ଗଞ୍ଜାମ ସ୍ୱାସ୍ଥ୍ୟ କେନ୍ଦ୍ରରେ ଭର୍ତି କରିଥିଲେ । ମିଳିଥିବା ଖବର ଅନୁସାରେ ଗଞ୍ଜାମ ଜିଲ୍ଲା ଖଲିକୋଟ ଥାନା ଅନ୍ତର୍ଗତ ବିକ୍ରମ ପୁର ଗ୍ରାମର ଯୁବକ ମାନେ ଶୁକ୍ରବାର ଦିନ ଗଣେଶ ମୂର୍ତ୍ତି ବିସର୍ଜନ କରିବାକୁ ଏକ ଡାଲା ଅଟୋରେ ସେହି ଗ୍ରାମର ଏଗାର ଜଣ ପିଲା ବଟେଶ୍ୱରମନ୍ଦିର ସ୍ଥିତ ବଙ୍ଗୋପ ସାଗର ବେଳାଭୂମି ଆସିଥିଲେ  । ବିସର୍ଜନ ସାରି କରି ଗ୍ରାମକୁ ଫେରିବା ବେଳେ ବୁଲାଣିଆ ରାସ୍ତାରେ ହଟାଠ ଡ୍ରାଇଭର ଅସାବଧାନତା ଯୋଗୁଁ ଅଟୋଟି ଏକ ଧାନରୁଆ ବିଲକୁ ଓଲଟି ପଡିଥିଲା  ।ଫଳରେ ସମସ୍ତେ ଆହତ ହୋଇଥିଲେ । କିଛି ଆହତ ଯୁବକ ଅଟୋ ତଳେ ବିଲ ଭିତରେ ଚାପି ହୋଇଯାଇଥିଲେ  । ସ୍ଥାନୀୟ ଲୋକେ ସେମାନଙ୍କୁ ଉଦ୍ଧାର କରିଥିଲେ  ।