ବୁର୍ଲା : ବୁର୍ଲା ପାୱାର ଚାନେଲକୁ ଡେଇଁ ଜଣେ ମହିଳା ନିଖୋଜ ହୋଇଥିବା ସୂଚନା ମିଳିଛି। ନିଖୋଜ ମହିଳା ଜଣକ ବୁର୍ଲା ଗାନ୍ଧି ପଡାର ରିତେଶ ସୁନାଙ୍କ ପତ୍ନୀ ରିଙ୍କି ସୁନା ବୋଲି ପୁଲିସ ସୂତ୍ରରୁ ସୂଚନା ମିଳିଛି । ତେବେ ଘଟଣାଟି ରାତିରେ ଘଟିଥିବା ଜଣାପଡିଛି। ଖବର ପାଇ ବୁର୍ଲା ପୁଲିସ ଏବଂ ଅଗ୍ନିଶମ ବାହିନୀ ଘଟଣା ସ୍ଥଳରେ ପହଞ୍ଚି ମଟର ବୋଟ୍ ଏବଂ ଲାଇଟ୍ ସହାୟତାରେ ଦିର୍ଘ ଘଣ୍ଟା ଧରି ଖୋଜା ଖୋଜି କରିଥିଲେ ମଧ୍ୟ ମହିଳାଙ୍କ କୌଣସି ପତ୍ତା ମିଳିପାରି ନ ଥିବା ଜଣାପଡିଛି। ଅନ୍ଧାର ରାତି ସାଙ୍ଗକୁ ପାଣିର ପ୍ରଖର ସ୍ରୋତ ଯୋଗୁଁ ତଦନ୍ତରେ ବାଧା ଉପୁଜିଥିବା ବେଳେ ସୋମବାର ସକାଳେ ପୁଣି ଖୋଜାଖୋଜି ଆରମ୍ଭ ହେବ ବୋଲି ସୂଚନା ମିଳିଛି । ମିଳିଥିବା ସୂଚନା ମତେ ରିଙ୍କି ଆଜି ରାତି ପ୍ରାୟ ୯ ଟା ବେଳେ ବୁର୍ଲା ନେତାଜି ଛକ ନିକଟରେ ରହିଥିବା ପାୱାର ଚାନେଲ ସୁନ୍ଦରରାଜନ ପୋଲ ଉପରୁ ତଳକୁ ଡେଇଁ ପଡିଥିଲେ। ସେଠାରେ ଉପସ୍ଥିତ ଥିବା କିଛି ପ୍ରତ୍ୟକ୍ଷ ଦର୍ଶୀ ଘଟଣା ସମ୍ପର୍କରେ ତୁରନ୍ତ ପୁଲିସକୁ ସୂଚନା ଦେଇଥିଲେ। ପୁଲିସ ଘଟଣା ସ୍ଥଳରେ ପହଞ୍ଚି ପ୍ରତ୍ୟକ୍ଷଦର୍ଶୀଙ୍କ ସୂଚନା ଆଧାରରେ ଖୋଜା ଖୋଜି କରିଥିଲା । ଏହାପରେ ଅଗ୍ନିଶମ ବାହିନୀ ଖବର ପାଇ ଘଟଣା ସ୍ଥଳରେ ପହଞ୍ଚି ମଟର ବୋଟ ସାହାଯ୍ୟରେ ଖୋଜାଖୋଜି କରିଥିଲେ ମଧ୍ୟ ରିଙ୍କିଙ୍କ କୌଣସି ପତ୍ତା ମିଳପାରି ନ ଥିଲା । ତେବେ ରିଙ୍କି କାହିଁକି କେନାଲକୁ ଡେଇଁଲେ ତାହା ସ୍ପଷ୍ଟ ହୋଇ ପାରି ନାହିଁ। ଖବର ପାଇ ରିଙ୍କିଙ୍କ ପରିବାର ଲୋକେ ମଧ୍ୟ ଘଟଣା ସ୍ଥଳରେ ପହଞ୍ଚି ଖୋଜାଖୋଜି କରିଥିଲେ । ପୁଲିସ ଘଟଣାର ତଦନ୍ତ ଜାରୀ ରଖିଥିବା ବେଳେ ପରିବାର ଲୋକଙ୍କୁ ପଚରାଉଚୁରା କରାଯାଉଛି।
Comments are closed.