ପାତ୍ରପୁର: ଜରଡା ଥାନା ଖାରିଆଗୁଡ଼ା ପଞ୍ଚାୟତ ପଳାସପୁର ଗ୍ରାମ ନିକଟ ନାଳରୁ ଜଣେ ଆଦିବାସୀ ବ୍ୟକ୍ତିଙ୍କ ଗଳିତ ମୃତ ଦେହ ପୋଲିସ ଜବତ କରିଛି। ମୃତ ବ୍ୟକ୍ତି ଜଣକ ପଳାସପୁର ଗ୍ରାମର ବୃନ୍ଦାବନ ଜାନି (୫୫) ବୋଲି ଜଣାପଡ଼ିଛି। ତାଙ୍କ ମୃତ୍ୟୁ ନେଇ ପତ୍ନୀ ଜେମା ଶବର ପୋଲିସରେ ଏତଲା ଦେଇଛନ୍ତି। ଏତଲାକୁ ଭିତ୍ତି କରି ପୋଲିସ ଅନୁସନ୍ଧାନ ଚଳାଇଛି।
ଗତ ସତର ତାରିଖ ରାତିରେ ବୃନ୍ଦାବନ ଗ୍ରାମ ନିକଟରେ ଚାଷ କରିଥିବା ବାଦାମ ଜମିକୁ ଯାଇ ଘରକୁ ଫେରି ନଥିଲେ। ତେବେ ଘର ଲୋକମାନେ ତାଙ୍କୁ ଖୋଜା ଖୋଜି କରିଥିଲେ ମଧ୍ୟ ସନ୍ଧାନ ପାଇପାରି ନଥିଲେ। ଆଜି ମଇଁଷି ଜଗିଥିବା କିଛି ବ୍ୟକ୍ତି ଗ୍ରାମ ନିକଟ ବାଘଲଟି ସବ ମାଇନର କେନାଲରେ ଏକ ମୃତଦେହ ଦେଖି ପାଟି କରିଥିଲେ। ଏହି ଖବର ଶୁଣି ଗ୍ରାମର ଲୋକମାନେ କେନାଲ ନିକଟକୁ ଯାଇ ମୃତ ଦେହ ଚିହ୍ନଟ କରିଥିଲେ। ମୃତ ଦେହଟି ଗଣ୍ଡି ମୁଣ୍ଡ ଅଲଗା ହୋଇ ପଡ଼ିଥିଲା। ମୁଣ୍ଡଟି ଜମି ହିଡରେ ପଡିଥିବା ବେଳେ ଗଣ୍ଡିଟି ନାଳ ପାଣିରେ ଭାସୁଥିବା ଦେଖି ପୋଲିସକୁ ଖବର ଦେଇଥିଲେ। ଖବର ପାଇ ଚିକିଟି ଏସଡିପିଓ କୃଷ୍ଣଚନ୍ଦ୍ର ଭାତ୍ର। ଓ ଜରଡା ଥାନା ଅଧିକାରୀ ଭବାନନ୍ଦ ପ୍ରଧାନ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି। ଏହି ଘଟଣା ନେଇ ତାଙ୍କ ପତ୍ନୀ ଜେମା ଶବର ପୋଲିସରେ ଲିଖିତ ଏତଲାଦେଇଛନ୍ତି। ଏତଲା ଅନୁଯାୟୀ ଗତ ଛଅ ତାରିଖରେ ନିକଟ ବୁଡିଘାଟି ଗ୍ରାମରେ ଚୋରାମଦ ଚଢଉ ବେଳେ ହୋଇଥିବା ଘଟଣାରେ ତାଙ୍କ ସ୍ବାମୀ ଠିକ କଥା କହୁଥିବା ଯୋଗୁଁ କେହି ତାଙ୍କ ସ୍ୱାମୀଙ୍କୁ ହତ୍ୟା କରିଥିବା ଅଭିଯୋଗ କରିବା ସହ ଦୋଷୀଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ନିବେଦନ କରିଛନ୍ତି। ପୋଲିସ ଏକ ମାମଲା ରୁଜୁ କରି ମୃତଦେହ ବ୍ୟବଚ୍ଛେଦ ପାଇଁ ବ୍ରହ୍ମପୁର ପଠାଇଛି। ସାଇଁଟିଫିକ ଟିମ ପହଞ୍ଚି ତଦନ୍ତ ଆରମ୍ଭ କରିଛି। ତେବେ କିଏ କାହିଁକି ଏହି ଭଳି କାଣ୍ଡ କରିଛି ତାହା ତଦନ୍ତ ହେଲେ ଜଣାପଡିବ ବୋଲି ଜରଡା ଥାନା ଅଧିକାରୀ କହିଛନ୍ତି।
