ନୂଆଦିଲ୍ଲୀ: ନବ ନିର୍ବାଚିତ ରାଷ୍ଟ୍ରପତି ଦ୍ରୌପଦୀ ମୁର୍ମୁ ୧୫ତମ ରାଷ୍ଟ୍ରପତି ଭାବେ ଶପଥ ଗ୍ରହଣ କରିଛନ୍ତି । ସଂସଦର କେନ୍ଦ୍ରୀୟ ହଲ୍ରେ ଆୟୋଜିତ ଉତ୍ସବରେ ଦ୍ରୌପଦୀଙ୍କୁ ସୁପ୍ରିମକୋର୍ଟର ପ୍ରଧାନ ବିଚାରପତି ଏନ.ଭି ରମଣା ପଦ ଓ ଗୋପନୀୟତାର ଶପଥ ପାଠ କରାଇଥିବା ବେଳେ ଶପଥ ଗ୍ରହଣ ପରେ ନିଜର ବିବୃତି ରଖିଛନ୍ତି ରାଷ୍ଟ୍ରପତି ଦ୍ରୌପଦୀ ମୁର୍ମୁ । ଦ୍ରୌପଦୀ କହିଛନ୍ତି ଦେଶବାସୀଙ୍କୁ ବିନମ୍ରତାର ସହ ଅଭିନନ୍ଦନ ଜଣାଉଛି । ସମସ୍ତ ସାଂସଦ ଓ ବିଧାୟକ ମାନଙ୍କୁ ମୋର ଧନ୍ୟବାଦ । ଦେଶର ସବୁ ନାଗରିକଙ୍କ ଆଶା ଓ ଆକାଂକ୍ଷାକୁ ମୁଁ ପୂରଣ କରିବି । ମହିଳା ସଶକ୍ତୀକରଣକୁ ଗୁରୁତ୍ୱ ଦେବି ବୋଲି କହିଛନ୍ତି ରାଷ୍ଟ୍ରପତି ଦ୍ରୌପଦୀ ମୁର୍ମୁ ।
ଏହି ଅବସରରେ ସନ୍ଥ କବି ଭୀମଭୋଇଙ୍କ କଥା ମନେ ପକାଇଛନ୍ତି ଓଡ଼ିଆ ଝିଅ ତଥା ରାଷ୍ଟ୍ରପତି ଦ୍ରୌପଦୀ ମୁର୍ମୁ । ଭୀମଭୋଇଙ୍କ କବିତା ‘ମୋ ଜୀବନ ପଛେ ନର୍କେ ପଡ଼ଥାଉ ଜଗତ ଉଦ୍ଧାର ହେଉ’ ବୋଲି କହିଛନ୍ତି ଦ୍ରୌପଦୀ । ଆଗାମୀ ୨୫ ବର୍ଷର ଲକ୍ଷ୍ୟ ନେଇ ମୁଁ କାମ କରିବି । ଏଥି ସହିତ ଏହି ନୂଆ ଦାୟିତ୍ୱ ମୋ ପାଇଁ ସୌଭାଗ୍ୟର ବିଷୟ । ସମସ୍ତଙ୍କ ପ୍ରୟାସରେ ଉଜ୍ଜ୍ଵଳ ଭାରତର ନିର୍ମାଣ କରିବି । ତାହା ସହ ତାଙ୍କର କିଛି ପୁରୁଣା ଅନୁଭୂତି ବଖାଣିଛନ୍ତି ରାଷ୍ଟ୍ରପତି ଦ୍ରୌପଦୀ ମୁର୍ମୁ ।
ଦ୍ରୌପଦୀ ତାଙ୍କ ବିବୃତିରେ କହିଛନ୍ତି, ମୁଁ ଓଡିଶାର ଏକ ଛୋଟ ଆଦିବାସୀ ଗାଁରୁ ମୋର ଯାତ୍ରା ଆରମ୍ଭ କରିଛି । ମୋ ପାଇଁ ପ୍ରାଥମିକ ଶିକ୍ଷା ଦିନେ ସ୍ୱପ୍ନ ଥିଲା । ହେଲେ ଓ୍ୱାର୍ଡ କାଉନସିଲରରୁ ଆସି ମୁଁ ଦେଶର ଶୀର୍ଷ ଆସନ ରାଷ୍ଟ୍ରପତି ପଦରେ ବସିଛି । ତାହା ସହ ଦ୍ରୌପଦୀ ଆହୁରି କହିଛନ୍ତି ଏହା ଆମର ଲୋକତନ୍ତ୍ରର ଶକ୍ତି । ଯାହାଫଳରେ ଜଣେ ଆଦିବାସୀ ଶୀର୍ଷକୁ ଯାଇପାରିଛି ।
ଏହାଛଡ଼ା ଯବାନ ମାନଙ୍କୁ କାରଗିଲ ବିଜୟ ଦିବସର ଆଗୁଆ ଅଭିନନ୍ଦନ ଜଣାଇଛନ୍ତି ରାଷ୍ଟ୍ରପତି ଦ୍ରୌପଦୀ । ସେ କହିଛନ୍ତି ଜୁଲାଇ ୨୬ କାରଗିଲ ବିଜୟ ଦିବସ ଅବସରରେ ମୁଁ ଯବାନ ମାନଙ୍କୁ ଆଗୁଆ ଶୁଭେଚ୍ଛା ଜଣାଉଛି । ଏଥି ସହିତ କରୋନା ମହାମାରୀ ସମୟରେ ସାରା ବିଶ୍ୱକୁ ଭାରତ ତାର ସାମର୍ଥ୍ୟ ଦେଖାଇଛି ବୋଲି କହିଛନ୍ତି ଦ୍ରୌପଦୀ । ନିକଟରେ ଭାରତରେ ୨ଶହ କୋଟି ଡୋଜ୍ କରୋନା ଟିକା ଦିଆଯାଇଛି ।
