ଚଣ୍ଡୀଗଡ- ଜଣେ ଡାକ୍ତର ଖୁସୀରେ ଖାଇବା ପାଇଁ ରେଷ୍ଟୁରାଣ୍ଟକୁ ଯାଇଥିଲେ । ସାଙ୍ଗରେ ବି ପରିବାର ଲୋକ ଥିଲେ । ଚଣ୍ଡୀଗଡର ଇଲାଣ୍ଟ୍ ମଲ୍ରେ ଥିବା ସାଗର ରତ୍ନ ଆଉଟ୍ଲେଟରେ ସମସ୍ତେ ଖାଇବା ପାଇଁ ବସିଥିଲେ । ଖାଦ୍ୟ ବି ବରାଦ ହୋଇଥିଲା। ହେଲେ ଯେତେ ବେଳେ ଡାକ୍ତରଙ୍କ ପାଖକୁ ଖାଦ୍ୟ ପ୍ଲେଟ୍ ଆସିଲା ତାକୁ ଦେଖି ସେ ହଡବଡାଇ ଯାଇଥିଲେ । ପ୍ଲେଟରେ ଥିବା ଛୋଲେ ଭଟୁରରେ ଏକ ମଲା ଝିଟିପିଟି ଥିଲା ।
ଏହି ଖବର ପ୍ରଚାରିତ ହେବା ପରେ ଚଣ୍ଡିଗଡର ଖାଦ୍ୟ ସୁରକ୍ଷା ବିଭାଗ ପକ୍ଷରୁ ରାତିରେ ସେହି ରେଷ୍ଟୁରାଣ୍ଟରୁ ଖାଦ୍ୟର ନମୁନା ସଂଗ୍ରହ କରାଯାଇଛି । ଡାକ୍ତର କୌଣସି ଲିଖିତ ଅଭିଯୋଗ କରି ନଥିଲେ ମଧ୍ୟ ପୁଲିସ୍ ଏବଂ ଅନ୍ୟ ଅଧିକାରୀ ପହଞ୍ଚି ସେଠାରୁ ଖାଦ୍ୟ ନମୁନା ସଂଗ୍ରହ କରିଥିଲେ ।
- Advertisement -
ଏବେ ଖାଦ୍ୟ ନମୁନା ପରୀକ୍ଷା ପାଇଁ ଲାବୋଟେରୀକୁ ପଠାଯାଇଛି । ୧୫ ଦିନ ମଧ୍ୟରେ ଏହାର ରିପୋର୍ଟ ଆସିବ ବୋଲି ଖାଦ୍ୟ ସୁରକ୍ଷା ବିଭାଗ ପକ୍ଷରୁ କୁହାଯାଇଛି । ଏହାପରେ ନିୟମ ଅନୁସାରେ ପଦକ୍ଷେପ ଗ୍ରହଣ କରାଯିବ ବୋଲି ସୂଚନା ଦିଆଯାଇଛି ।
