ଡେସ୍କ: ଡାକ୍ତରୀ ଛାତ୍ରମାନଙ୍କ ଭବିଷ୍ୟତ ସହିତ ନ ଖେଳି ଗୋଟିଏ ବି ନିଟ ପିଜି ସିଟ୍ ଯେଭଳି ଫାଙ୍କା ନ ରହେ ସେଭଳି ପଦକ୍ଷେପ ନେବାକୁ ଆଜି ସୁପ୍ରିମକୋର୍ଟ ମେଡିକାଲ କାଉନସେଲିଂ କମିଟିକୁ କହିଛନ୍ତି। ଅଦାଲତ କହିଛନ୍ତି ଯେ ମେଡିକାଲ କାଉନସେଲିଂ କମିଟି ଛାତ୍ରମାନଙ୍କ ଭବିଷ୍ୟତ ସହିତ ଖେଳୁଛନ୍ତି।
ଅଲ ଇଣ୍ଡିଆ କୋଟାର ପୂରଣ ନ ହୋଇ ଫାଙ୍କା ପଡିଥିବା ଆସନ ପାଇଁ ପ୍ରାର୍ଥୀମାନଙ୍କୁ ଅଂଶଗ୍ରହଣ କରିବାକୁ ଅନୁମତି ଦେବା ପାଇଁ ଏକ ସ୍ୱତନ୍ତ୍ର ପର୍ଯ୍ୟାୟ କାଉନସେଲିଂ କରିବାକୁ ଚାହୁଁଥିବା ଆବେଦନ ଉପରେ ସର୍ବୋଚ୍ଚ ଅଦାଲତ ଏମସିସିକୁ ସତ୍ୟପାଠ ଦାଖଲ କରିବାକୁ କହିଛନ୍ତି। ଜଷ୍ଟିସ୍ ଏମଆର ଶାହା ଏବଂ ଅନିରୁଦ୍ଧ ବୋଷଙ୍କ ଅବକାଶକାଳୀନ ଖଣ୍ଡପୀଠ ଦିନକ ମଧ୍ୟରେ ସିଟ୍ କାହିଁକି ଖାଲି ଅଛି ତାହା ବୁଝାଇ ଏମସିସି ଏବଂ କେନ୍ଦ୍ରକୁ ସତ୍ୟପାଠ ଦାଖଲ କରିବାକୁ କହିଛନ୍ତି।
ଆସନ୍ତାକାଲି ଏହି ମାମଲାର ପରବର୍ତ୍ତୀ ଶୁଣାଣି ହେବ। ଶୁଣାଣି ସମୟରେ ୧ ହଜାର ୪୫୬ଟି ଆସନ ଖାଲି ରହିଥିବା ଜାଣିବା ପରେ କୋର୍ଟ ଅସନ୍ତୋଷ ବ୍ୟକ୍ତ କରିଛନ୍ତି। ଏମସିସି ପରାମର୍ଶଦାତା ଏହା ମଧ୍ୟ କହିଛନ୍ତି ଯେ ୨୦୨୨ କାଉନସେଲିଂ ବିଳମ୍ବ ହେବ ଏବଂ ଏହାର ପ୍ରଭାବ ପଡିବ। କାଉନସେଲିଂରେ କୌଣସି ଶୃଙ୍ଖଳିତ ପ୍ରକ୍ରିୟା କାହିଁକି ନାହିଁ ବୋଲି କୋର୍ଟ ପଚାରିବା ସହ ପ୍ରଶ୍ନ କରିଥିଲେ ଯେ ଆପଣ ଛାତ୍ରମାନଙ୍କ ମାନସିକ ଚାପ ସ୍ତର ଜାଣିଛନ୍ତି କି? କୋର୍ଟ ପ୍ରଶ୍ନ କରିଥିଲେ ଯେ ଆମେ ଯେତେବେଳେ ଡାକ୍ତର ଏବଂ ସୁପର-ସ୍ପେଶାଲିଷ୍ଟ ଆବଶ୍ୟକ କରୁଚୁ ସେତେବେଳେ ସିଟ୍ ଖାଲି ରଖିଲେ ଆପଣ କ’ଣ ପାଇବେ?
