କଲକାତା: ଭାରତରେ ଥିବା ନିଜ ପ୍ରେମିକଙ୍କୁ ବିବାହ କରି ତାଙ୍କ ସହିତ ବାସ କରିବା ଲକ୍ଷ୍ୟରେ ବାଂଲାଦେଶର ଜଣେ ଯୁବତୀ ସମୁଦ୍ର ପହଁରି ଭାରତରେ ପହଞ୍ଚିଥିବା ଜଣାଯାଇଛି। ୨୨ ବର୍ଷ ବୟସ୍କା ବାଂଲାଦେଶ ଯୁବତୀ ନିଜ ଜୀବନକୁ ବାଜି ଲଗାଇ ହିଂସ୍ର ବନ୍ୟଜନ୍ତୁ ରହୁଥିବା ସୁନ୍ଦରବନ ଦେଇ ପ୍ରାୟ ଏକଘଣ୍ଟାରୁ ଅଧିକ ସମୟ ସମୁଦ୍ରରେ ପହଁରି ପହଁରି ଭାରତ ଉପକୂଳରେ ପହଞ୍ଚିଥିଲେ। ତାଙ୍କ ନାମ କ୍ରିଷ୍ଣା ମଣ୍ଡଳ। କ୍ରିଷ୍ଣା ଓ ତାଙ୍କ ପ୍ରେମିକ ଅଭିକ ମଣ୍ଡଳଙ୍କ ସମ୍ପର୍କ ଫେସବୁକ୍ରେ ଆରମ୍ଭ ହୋଇଥିଲା ଏବଂ ଦୁହେଁ ପ୍ରେମରେ ପଡ଼ିଯାଇଥିଲେ। କ୍ରିଷ୍ଣାଙ୍କ ନିକଟରେ ପାସପୋର୍ଟ ନଥିବାରୁ ସେ ସମୁଦ୍ର ପହଁରି ପ୍ରେମିକ ଅଭିକଙ୍କ ନିକଟରେ ପହଞ୍ଚିବାକୁ ନିଷ୍ପତ୍ତି ନେଇଥିଲେ।
ଜଣାଯାଇଛି ଯେ କ୍ରିଷ୍ଣା ପ୍ରଥମେ ମହାବଳ ବାଘଙ୍କ ବାସସ୍ଥଳୀ ସୁନ୍ଦରବନରେ ପହଞ୍ଚିଥିଲେ। ପରେ ସେଠାରୁ ସମୁଦ୍ର ଓ ନଦୀ ନାଳ ପହଁରି ଭାରତରେ ପହଞ୍ଚିଥିଲେ। ପରିଶେଷରେ ସେ ନିଜ ପ୍ରେମିକ ଅଭିକଙ୍କୁ ଭେଟିବା ପରେ ତିନିଦିନ ତଳେ କୋଲକାତା କାଳିଘାଟରେ ସେମାନଙ୍କର ବିବାହ ଅନୁଷ୍ଠିତ ହୋଇଛି। ତେବେ ଭାରତ ମଧ୍ୟକୁ ସେ ବେଆଇନ ଭାବରେ ପ୍ରବେଶ କରିଥିବା ଜଣାପଡ଼ିବା ପରେ ପୁଲିସ ତାଙ୍କୁ ସୋମବାର ଗିରଫ କରିଛି। ତାଙ୍କୁ ବାଂଲାଦେଶ ହାଇକମିଶନଙ୍କୁ ହସ୍ତାନ୍ତର କରାଯିବା ସମ୍ଭାବନା ରହିଛି। ଏହା ପୂର୍ବରୁ ଚଳିତ ବର୍ଷ ପ୍ରଥମ ଭାଗରେ ବାଂଲାଦେଶର ଜଣେ ନାବାଳକ ଏମାନ୍ ହୋସେନ ଭାରତରୁ ଚକୋଲେଟ କିଣିବାକୁ ସମୁଦ୍ର ପହଁରି ଚାଲିଆସିଥିଲା। କିନ୍ତୁ ସେ ସ୍ଥାନୀୟ ପୋଲିସ ହାତରେ ଧରାପଡ଼ିବା ପରେ ତାକୁ ଅଦାଲତରେ ହାଜର କରାଯାଇଥିଲା। ଅଦାଲତ ତାକୁ ୧୫ ଦିନ ପାଇଁ ବିଚାର ବିଭାଗୀୟ ହାଜତକୁ ପଠାଇ ଦେଇଥିଲେ।
