ଭୁବନେଶ୍ୱର: ରାଜ୍ୟସଭାର ୩ ଆସନ ପାଇଁ ବିଜ୍ଞପ୍ତି ପ୍ରକାଶ ପାଇଛି । ବିଧାନସଭାର ରିଟର୍ଣ୍ଣିଂ ଅଫିସ ପକ୍ଷରୁ ବିଧିବଦ୍ଧ ଭାବେ ବିଜ୍ଞପ୍ତି ପ୍ରକାଶ ପାଇଥିବା ବେଳେ ଏଥିପାଇଁ ଆଜିଠୁ ନାମାଙ୍କନ ଆରମ୍ଭ ହେବ । ଆସନ୍ତା ୩୧ ତାରିଖ ନାମାଙ୍କନ ଦାଖଲର ଶେଷ ତାରିଖ ବୋଲି ସୂଚନା ଦିଆଯାଇଛି । ତେବେ ଅଙ୍କ ଗଣତିରେ ୩ଟି ଯାକ ରାଜ୍ୟସଭା ଆସନ ବିଜେଡି ଖାତାକୁ ଯିବା ସ୍ପଷ୍ଟ ହେଉଛି । ଦଳ ମଧ୍ୟରୁ କେଉଁ ନେତା ରାଜ୍ୟସଭା ଯିବେ ସେନେଇ ସ୍ପଷ୍ଟ ହୋଇନଥିବା ବେଳେ ବିଜେଡି ସୁପ୍ରିମୋ ଏହାକୁ ନେଇ ଦ୍ୱନ୍ଦ୍ୱ ଦୂର କରିବେ ।
ବର୍ତ୍ତମାନ ରାଜ୍ୟସଭା ଯିବାକୁ ନେଇ ବିଜେଡିରେ ମାଳମାଳ ଆଶୟୀ ହାତ ଟେକି ରହିଛନ୍ତି । ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କ ଉପରେ ସମସ୍ତଙ୍କ ନଜର ରହିଛି । କାହାକୁ ରାଜ୍ୟସଭା ଯିବାକୁ ଗ୍ରୀନ୍ ସିଗନାଲ ଦେବେ ନବୀନ ? କାହାକୁ ମିଳିବ ଦିଲ୍ଲୀ ଯିବାକୁ ଟିକେଟ୍ ? ସେନେଇ ବିଜେଡି ଶିବିରରେ କଳ୍ପନାଜଳ୍ପନା ଜାରି ରହିଛି । ଆସନ୍ତା ଜୁଲାଇ ୧ ତାରିଖରେ ସାଂସଦ ପ୍ରସନ୍ନ ଆଚାର୍ଯ୍ୟ, ଏନଭାସ୍କର ରାଓ, ଡକ୍ଟର ସସ୍ମିତ ପାତ୍ରଙ୍କ କାର୍ଯ୍ୟକାଳ ସରୁଛି । ଏହି ୩ ଆସନ ପାଇଁ ଆସନ୍ତା ଜୁନ ୧୦ ତାରିଖରେ ଭୋଟ ହେବ ।
