ଭଉଁରି ତିଥିରେ ଚକଡେରା ନୀତି ସମ୍ପନ୍ନ

ପୁରୀ : ତିନି ରଥର ତିନୋଟି ଅଖରେ ରବିବାର ଛଅଟି ଚକ ସଂଯୋଗ କରାଯାଇଛି। ପରମ୍ପରା ଅନୁଯାୟୀ ଭଉଁରି ତିଥିରେ ଶ୍ରୀକ୍ଷେତ୍ରରେ ସମ୍ପନ୍ନ ହୋଇଛି ଚକଡେରା ନୀତି। ଶ୍ରୀମନ୍ଦିରରେ ଶ୍ରୀଜୀଉଙ୍କ ସକାଳଧୂପ ଶେଷହେବା ପରେ ଦିନ ୧୧ଟା ୫୦ରେ ତିନିଜଣ ପୂଜାପଣ୍ଡା ସେବକ ତିନି ଠାକୁରଙ୍କ ଶ୍ରୀଅଙ୍ଗଲାଗି ଆଜ୍ଞାମାଳ ସହ ରଥଖଳାକୁ ଯାଇଥିଲେ। ଅଖରେ ଚକଡେରା ପାଇଁ ସେମାନେ ତିନିରଥ ମୁଖ୍ୟ ମହାରଣାଙ୍କୁ ଆଜ୍ଞାମାଳ ପ୍ରଦାନ କରିଥିଲେ। ପରେ ଭୋଇ ସେବକମାନେ ତିନିରଥର ଗୋଟିଏ ଲେଖାଏ ଅଖରେ ଦୁଇଟି ଲେଖାଏ ଚକ ଲାଗି କରିଥିଲେ। ଚକଡେରା ନୀତି ଦେଖିବାକୁ ବଡ଼ଦାଣ୍ଡରେ ଭକ୍ତଙ୍କ ପ୍ରବଳ ଭିଡ ହୋଇଥିଲା। ‘ଜୟ ଜଗନ୍ନାଥ’ ଧ୍ବନିରେ ରଥଖଳା ପ୍ରକମ୍ପିତ ହୋଇଥିଲା।
ଶ୍ରୀମନ୍ଦିର ମୁଖ୍ୟ ପ୍ରଶାସକ ବୀର ବିକ୍ରମ ଯାଦବ, ଜିଲାପାଳ ତଥା ଉପମୁଖ୍ୟ ପ୍ରଶାସକ ସମର୍ଥ ବର୍ମା, ଆରକ୍ଷୀ ଅଧୀକ୍ଷକ କନୱର ବିଶାଲ ସିଂହଙ୍କ ସମେତ କେତେକ ପରିଚାଳନା କମିଟି ସଭ୍ୟ ଉପସ୍ଥିତ ଥିଲେ। ଅକ୍ଷୟ ତୃତୀୟାଠାରୁ ରଥ ନିର୍ମାଣ ଆରମ୍ଭ ହୋଇଛି। ଭଉଁରି ତିଥିରେ ତିନୋଟି ଅଖରେ ୬ଟି ଚକ ଲଗାଯିବା ବିଧି ରହିଛି। ଆଗାମୀ ଜୁଲାଇ ୧ତାରିଖ ଦିନ ଶ୍ରୀଜଗନ୍ନାଥ ମହାପ୍ରଭୁଙ୍କ ବିଶ୍ବପ୍ରସିଦ୍ଧ ପୁରୀ ରଥଯାତ୍ରା ଅନୁଷ୍ଠିତ ହେବ।