କଟକ: ଗତ ୨୦ ବର୍ଷ ଧରି ମହିଳା ୧୦୦ ମିଟର ହର୍ଡଲ୍ସରେ ଜାତୀୟ କୀର୍ତ୍ତିମାନ ଓଡ଼ିଶାର ନାମୀ ଆଥ୍ଲେଟ୍ ତଥା ଅଲିମ୍ପିଆନ୍ ଅନୁରାଧା ବିଶ୍ବାଳଙ୍କ ନାମରେ ଥିଲା। ହେଲେ ବୁଧବାର ଅନୁରାଧାଙ୍କ ଏହି ଜାତୀୟ ରେକର୍ଡକୁ ଭାଙ୍ଗି ମହିଳା ୧୦୦ ମିଟର ହର୍ଡଲ୍ସରେ ନୂତନ ଜାତୀୟ କୀର୍ତ୍ତିମାନ ସ୍ଥାପନ କରିଛନ୍ତି ଆନ୍ଧ୍ରପ୍ରଦେଶର ଜ୍ୟୋତି ୟାରାଜି। ସାଇପ୍ରସ୍ର ଲିମାସୋଲ୍ରେ ଆୟୋଜିତ ଆନ୍ତର୍ଜାତିକ ଦୌଡ଼କୁଦ ପ୍ରତିଯୋଗିତାରେ ଜ୍ୟୋତି ଏହି ଜାତୀୟ କ୍ରୀର୍ତ୍ତିମାନ ପ୍ରତିଷ୍ଠା କରିଛନ୍ତି। ୨୦୦୨ ଅଗଷ୍ଟ ୨୬ରେ ନୂଆଦିଲ୍ଲୀର ନେହରୁ ଷ୍ଟାଡିୟମ୍ରେ ଆୟୋଜିତ ରାଜା ଭଳେନ୍ଦ୍ର ସିଂହ ଜାତୀୟ ସର୍କିଟ ମିଟ୍ରେ ଅନୁରାଧା ୧୦୦ ମିଟର ହର୍ଡଲ୍ସରେ ୧୩.୩୮ ସେକେଣ୍ଡ ସମୟ ନେଇ ଜାତୀୟ କୀର୍ତ୍ତିମାନ ସ୍ଥାପନ କରିଥିଲେ। ତେବେ ସାଇପ୍ରସ୍ରେ ବୁଧବାର ୨୨ ବର୍ଷ ବୟସ୍କ ଜ୍ୟୋତି ୧୩.୨୩ ସେକେଣ୍ଡରେ ରେସ୍ ସମାପ୍ତକରି ନୂତନ ଜାତୀୟ ରେକର୍ଡ ପ୍ରତିଷ୍ଠା କରିଛନ୍ତି।
ସୂଚନାଯୋଗ୍ୟ; ଜ୍ୟୋତି ଗତମାସରେ କେରଳର କୋଜିକୋଡ୍ରେ ଆୟୋଜିତ ଫେଡେରେସନ୍ କପ୍ ଦୌଡ଼କୁଦ ଚମ୍ପିଆନ୍ସିପ୍ରେ ୧୩.୦୯ ସେକେଣ୍ଡ ସମୟ ନେଇ ୧୦୦ ମିଟର ହର୍ଡଲ୍ସରେ ସ୍ବର୍ଣ୍ଣପଦକ ଜିତିଥିଲେ ହେଁ ପବନର ଗତି ସେକେଣ୍ଡ ପ୍ରତି ୨ ମିଟରରୁ ଅଧିକ ଥିବାରୁ ତାଙ୍କ ଜାତୀୟ ରେକର୍ଡକୁ ଗଣନା କରା ଯାଇନଥିଲା। ପୁଣି ୨୦୨୦ରେ ମଧ୍ୟ ଜ୍ୟୋତି ସର୍ବଭାରତୀୟ ଆନ୍ତଃବିଶ୍ବବିଦ୍ୟାଳୟ ଦୌଡ଼ରେ ୧୩.୦୩ ସେକେଣ୍ଡ ସମୟ ହାସଲ କରିଥିଲେ ହେଁ ଉକ୍ତ ପ୍ରତିଯୋଗିତାରେ ନାଡାର କେହି ଅଧିକାରୀ ଉପସ୍ଥିତ ନ ଥିବାରୁ ଉକ୍ତ ରେକର୍ଡ ଗଣନା କରା ଯାଇନଥିଲା। ହେଲେ ସାଇପ୍ରସ୍ରେ ସେ ନୂତନ କୀର୍ତ୍ତିମାନ ସ୍ଥାପନ କରି ପାରିଛନ୍ତି। ସୂଚନାଯୋଗ୍ୟ; ଜ୍ୟୋତି ଓଡ଼ିଶାର ଅନୁରାଧାଙ୍କ କୀର୍ତ୍ତିମାନ ଭାଙ୍ଗିବା ପଛରେ ଓଡ଼ିଶାର ଅବଦାନ ରହିଛି। କାରଣ ଜ୍ୟୋତି ଭୁବନେଶ୍ବରରେ ଥିବା ରିଲାଏନ୍ସ ଫାଉେଣ୍ଡସନ୍ ଓଡ଼ିଶା ଆଥ୍ଲେଟିକ୍ସ ହାଇପର୍ଫମାନ୍ସ ସେଣ୍ଟରରେ ବିଦେଶୀ ପ୍ରଶିକ୍ଷକ ଜୋସେଫ୍ ହିଲିଅରଙ୍କ ତତ୍ତ୍ବାବଧାନରେ ପ୍ରଶିକ୍ଷଣ ନେଉଛନ୍ତି।
