ନୂଆଦିଲ୍ଲୀ: ଦେଶରେ ପୁଣି ଚିନ୍ତା ବଢ଼ାଇଲାଣି କରୋନା ସଂକ୍ରମଣ । ଗତ କିଛିଦିନ ହେବ ଦେଶରେ ୪ ଅଙ୍କ ତଳେ କରୋନା ମାମଲା ଚିହ୍ନଟ ହେଉଥିବା ବେଳେ ପୁଣି କରୋନା ଗ୍ରାଫ୍ ୪ ଅଙ୍କ ଉପରେ ରହିଲାଣି । ଗତକାଲି ଦେଶରେ ୧ହଜାର ୮୮ ନୂଆ କରୋନା ଆକ୍ରାନ୍ତ ଚିହ୍ନଟ ହୋଇଥିଲେ । ସେଥିମଧ୍ୟରୁ ଚିନ୍ତା ବଢ଼ାଇଛି ରାଜଧାନୀ ଦିଲ୍ଲୀ ଓ ଗୁରୁଗ୍ରାମର ସଂକ୍ରମିତ । କାରଣ ଏହି ଦୁଇ ସ୍ଥାନରେ ସଂକ୍ରମିତଙ୍କ ସଂଖ୍ୟା ଦ୍ରୁତ ଗତିରେ ବୃଦ୍ଧି ପାଉଛି । ସାରା ଦେଶର ରୋଗୀଙ୍କ ସଂଖ୍ୟାକୁ ଦୃଷ୍ଟିରେ ନେଲେ କେବଳ ଏହି ଦୁଇଟି ସ୍ଥାନରୁ ୪୧ ପ୍ରତିଶତ ମାମଲା ରହିଛି । ଦିଲ୍ଲୀରେ ମାର୍ଚ୍ଚ ୪ତାରିଖରେ ସର୍ବାଧିକ ମାମଲା ଆସିଥିଲା । ଏହାପରେ ଗତକାଲି ପୁଣି ଦିଲ୍ଲୀରେ ୨୯୯ଜଣ ଆକ୍ରାନ୍ତ ଚିହ୍ନଟ ହୋଇଥିଲେ । ସେହିପରି ଗୁରୁଗ୍ରାମରେ ମଧ୍ୟ ୧୪୬ଜଣ ସଂକ୍ରମତ ଚିହ୍ନଟ ହୋଇଥିବା ସୂଚନା ଦେଇଥିଲା ସ୍ୱାସ୍ଥ୍ୟବିଭାଗ ।
ମାର୍ଚ୍ଚ ୪ରେ ଦିଲ୍ଲୀରେ ସର୍ବାଧିକ ୩୦୦ କରୋନା ମାମଲା ଚିହ୍ନଟ ହୋଇଥିଲା । ପରେ ଏହା ଧୀରେଧୀରେ ହ୍ରାସ ଘଟିଥିଲା । ହେଲେ ବର୍ତ୍ତମାନ ଦିଲ୍ଲୀରେ କରୋନା ଗ୍ରାଫ୍ ଉପର ମୁହାଁ ହେଉଥିବା ଦେଖିବାକୁ ମିଳିଲାଣି । ଅନ୍ୟପଟେ ଦିଲ୍ଲୀର ନୋଏଡ଼ାର ବିଭିନ୍ନ ବିଦ୍ୟାଳୟରେ ୯ଜଣ ଛାତ୍ରଛାତ୍ରୀ କରୋନା ସଂକ୍ରମିତ ହୋଇଥିବା ଖବର ଆସିଛି । ନୋଏଡାଠାରେ ଗତ ଚାରି ଦିନରେ ୩୦ରୁ ଅଧିକ ପିଲା କରୋନା ସଂକ୍ରମିତ ହୋଇଛନ୍ତି । ସେହିପରି ଗଙ୍ଗାରାମ ରୋଡରେ ଥିବା ବାଲ ଭାରତୀ ପବ୍ଲିକ ସ୍କୁଲରେ ମଧ୍ୟ ଜଣେ ଶିକ୍ଷକ ସଂକ୍ରମିତ ହୋଇଛନ୍ତି ।
