ଆରଡି: ଆଜି ପବିତ୍ର ମହାବିଶୁବ ସଂକ୍ରାନ୍ତି ଓଡିଆ ନବବର୍ଷର ପ୍ରଥମଦିନ। ଏହିଦିନ ଠାରୁ ଏକମାସ ଧରି ଆରମ୍ଭ ହୋଇଛି ବାବା ଆଖଣ୍ଡଳମଣିଙ୍କ ଶୀତଳ ଉପଚାର ନୀତି । ଏଥିପାଇଁ ପରମ୍ପରା ଅନୁଯାୟୀ ବିଭିନ୍ନ ନଦୀରୁ ଗୋପାଳ ଭକ୍ତମାନେ ଆଣିଥିବା ଜଳଭାର ସେବାୟତଙ୍କ ଦ୍ୱାରା ଆଖଣ୍ଡଳମଣିଙ୍କ ଜଳଛାୟା ନୀତି କରାଯାଉଛି । ଏହି ଅନନ୍ୟ ପରମ୍ପରା କାହିଁ କେଉଁ କାଳରୁ ରହି ଆସିଛି। ପ୍ରଚଣ୍ଡ ରୋଦ୍ରତାପରୁ ଉପଶମ ପାଇଁ ବାବା ଆଖଣ୍ଡଳମଣିଙ୍କୁ ବୈଶାଖ ମାସ ସାରା ଜଳଛାୟା କରାଯାଇଥାଏ । ହେଲେ ବିଗତ ୨ବର୍ଷ ହେବ କୋଭିଡ କଟକଣା ଯୋଗୁ ଗୋପାଳଭକ୍ତଙ୍କ ଜଳଲାଗି ବନ୍ଦ ରହିଥିଲା ।
ଚଳିତବର୍ଷ କଟକଣାକୁ କୋହଳ କରାଯାଇଥିବାରୁ ବିଭିନ୍ନ ପ୍ରାନ୍ତରରୁ ଭକ୍ତଙ୍କ ସହ ଗୋପାଳଭକ୍ତଙ୍କ ଭିଡ ପରିଲିକ୍ଷିତ ହୋଇଛି ପୀଠରେ । ଏଥିପାଇଁ ଜିଲା ପ୍ରଶାସନ ଓ ମନ୍ଦିର ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି । ଏଥିପାଇଁ ଗତ ମଙ୍ଗଳବାର ଭଦ୍ରକ ଉପଜିଲାପାଳ ତଥା ମନ୍ଦିରଟ୍ରଷ୍ଟି ମନୋଜ ପାତ୍ରଙ୍କ ପକ୍ଷରୁ ସମୀକ୍ଷା କରାଯିବା ସହ ଯେପରି ଶୀତଳ ଉପଚାର ନୀତି ସୁଚାର ରୂପେ ସମ୍ପନ୍ନ ହେବ ସେଥିପାଇଁ ମନ୍ଦିରର ସେବାୟତଙ୍କ ସହ ଆଲୋଚନା କରିଛନ୍ତି । ଆଜି ଭୋର ୪ଟା ମଧ୍ୟରେ ଦ୍ୱାରଫିଟା ନୀତି ସହ ମଙ୍ଗଳ ଆଳତୀ, ମହାସ୍ନାନ, ଘର୍ଷଣଲାଗି କରାଯିବା ପରେ ପୂର୍ବ ପ୍ରସ୍ତୁତି ଅନୁଯାୟୀ ସକାଳ ୫ଟା ୩୦ରୁ ୧୨ଟା ଯାଏଁ ଗୋପାଳଭକ୍ତଙ୍କ ଜଳଲାଗି କରାଯିବ । ପରେ ଅନ୍ୟାନ୍ୟ ନୀତି ସହ ଅପରାହ୍ଣରେ ବଡସିଂହାରବେଶ ଓ ସଂଧ୍ୟାରେ ଷୋଡଶ ଉପଚାର ପୂଜା ସହ ଆଳତୀ ସମ୍ପନ୍ନ ହେବ।
Comments are closed.