ବାଲେଶ୍ବର: ଶୁକ୍ରବାର ଦୁଇଟି ପୃଥକ ପୃଥକ କଲେଜର ଦୁଇ ଜଣ ଛାତ୍ରୀ ବେକରେ ଓଢଣୀ ଲଗାଇ ଆତ୍ମହତ୍ୟା କରିଥିବା ଅଭିଯୋଗ ହୋଇଛି । ଗୋଟିଏ ଘଟଣା ବାଲେଶ୍ବର ଜିଲା ନୀଳଗିରି ଅଞ୍ଚଳର ହୋଇଥିବା ବେଳେ ଅନ୍ୟଟି ସିମୁଳିଆ ଅଞ୍ଚଳର ବୋଲି ଜଣାପଡିଛି ।
ନୀଳଗିରି ମହିଳା କଲେଜର ଜଣେ ଯୁକ୍ତ ୩ ଶେଷ ବର୍ଷ ଛାତ୍ରୀ ସସ୍ମିତା ଦେ (୨୦) ବେକରେ ଓଢଣୀ ଲଗାଇ ଆତ୍ମହତ୍ୟା କରିଥିବା ଅଭିଯୋଗ ହୋଇଛି । ଗତକାଲି ରାତିରେ ଅନ୍ୟ ସହପାଠିନୀଙ୍କ ସହ ଶୋଇଥିଲେ । ହେଲେ ଶୁକ୍ରବାର ଦିନ ୧୧ଟା ବେଳେ ଝୁଲନ୍ତା ଅବସ୍ଥାରେ ତାଙ୍କର ଉଦ୍ଧାର କରାଯାଇଥିଲା । ତେବେ ଆତ୍ମହତ୍ୟାର କାରଣ ଜଣାପଡି ନଥିବା ବେଳେ ଘଟଣାସ୍ଥଳରେ ନୀଳଗିରି ପୁଲିସ ଓ ବାଲେଶ୍ବରରୁ ସାଇଣ୍ଟିଫିକ ଟିମ ପହଞ୍ଚି ତଦନ୍ତ ଆରମ୍ଭ କରିଛି।
ସେହିପରି ସିମୁଳିଆ ମହାବିଦ୍ୟାଳୟର ସସ୍ମିତା ପଣ୍ଡା ନାମକ ଜଣେ ଯୁକ୍ତ ୩ ଦ୍ବିତୀୟ ବର୍ଷ ଛାତ୍ରୀ ବେକରେ ଓଢଣୀ ଦେଇ ଆତ୍ମହତ୍ୟା କରିଥିବା ସୂଚନା ମିଳିଛି । ଛାତ୍ରୀଙ୍କ ଘର ସରୋ ଥାନା ଅନ୍ତର୍ଗତ ସବିରା ପଞ୍ଚାୟତ ଗାଁର ଏବଂ ସେ ମାର୍କୋଣା ମେସରେ ରହି ପାଠ ପଢୁଥିଲେ ବୋଲି ଜଣାପଡିଛି । ଘଟଣାସ୍ଥଳରେ ସରୋ ପୁଲିସ ପହଞ୍ଚି ତଦନ୍ତ ଜାରି ରଖିଛି ।
