ନୂଆଦିଲ୍ଲୀ: ଦେଶରେ ଓମିକ୍ରନ ପ୍ରକରଣରେ ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ପରିପ୍ରେକ୍ଷୀରେ ଅଖିଳ ଭାରତ ଆୟୁର୍ବିଜ୍ଞାନ ସଂସ୍ଥାନ (ଏମ୍ସ) ମୁଖ୍ୟ ଡା. ରଣଦୀପ ଗୁଲେରିଆ ସମସ୍ତଙ୍କୁ ସତର୍କ କରାଇ ଦେଇଛନ୍ତି । ସେ କହିଛନ୍ତି ଯେ କୋଭିଡ ମହାମାରୀ ସଂକ୍ରମଣ ଜନିତ ଯେକୌଣସି ପରିସ୍ଥିତିର ମୁକାବିଲା କରିବାକୁ ସମସ୍ତେ ପ୍ରସ୍ତୁତ ରହିବାକୁ ହେବ । ସୂଚନାଯୋଗ୍ୟ ଯେ ରବିବାର ସୁଦ୍ଧା ଦେଶରେ ଓମିକ୍ରନ ସଂକ୍ରମିତଙ୍କ ସଂଖ୍ୟା ୧୫୩କୁ ବୃଦ୍ଧିପାଇଛି । ମହାରାଷ୍ଟ୍ରରେ ଆଉ ୬ ଓ ଗୁଜରାଟରେ ଆଉ ୪ ସଂକ୍ରମିତ ଚିହ୍ନଟ ହୋଇଛନ୍ତି ।
ଏମ୍ସ ନିର୍ଦ୍ଦେଶକ ଡା.ଗୁଲେରିଆ କହିଛନ୍ତି ଯେ ଭାରତରେ ପରିସ୍ଥିତି ବ୍ରିଟେନ ଭଳି ଖରାପ ହେବା ଆଶଙ୍କା ନାହିଁ । ତେବେ ଏ ସମ୍ପର୍କରେ ଅଧିକ ତଥ୍ୟର ଆବଶ୍ୟକତା ରହିଛି । ବିଶ୍ୱର ଅନ୍ୟାନ୍ୟ ଭାଗରେ ସଂକ୍ରମିତଙ୍କ ସଂଖ୍ୟା ବୃଦ୍ଧି ପାଉଥିବାବେଳେ ଆମକୁ ତାହା ଉପରେ କଡା ନଜର ରଖିବାକୁ ହେବ ଏବଂ ସେଥିପାଇଁ ନିଜକୁ ପ୍ରସ୍ତୁତ କରିବାକୁ ହେବ । କେନ୍ଦ୍ର ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ ସୂତ୍ର ଅନୁଯାୟୀ ଦେଶରେ ଓମିକ୍ରନ ଆକ୍ରାନଙ୍କ ସଂଖ୍ୟା ଦ୍ରୁତ ଗତିରେ ବୃଦ୍ଧି ପାଇବାରେ ଲାଗିଛି । ଇତିମଧ୍ୟରେ ଦେଶର ୧୧ଟି ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରେ ଏହି ପ୍ରକରଣରେ ଆକ୍ରାନ୍ତ ଠାବ ହୋଇସାରିଲେଣି । କେବଳ ମହାରାଷ୍ଟ୍ରରେ ୫୪ ଓ ଦିଲ୍ଲୀରେ ୨୨ ଜଣ ଏହି ପ୍ରକଣରେ ଆକ୍ରାନ୍ତ ହୋଇଥିବା ଚିହ୍ନଟ କରାଯାଇଛି । ଏହାବ୍ୟତୀତ ରାଜସ୍ଥାନ ୧୭, କର୍ଣ୍ଣାଟକ ୧୪, ତେଲେଙ୍ଗାନା ୨୦, ଗୁଜରାଟ ୧୧, କେରଳ ୧୧, ଆନ୍ଧ୍ରପ୍ରଦେଶ ୧, ଚଣ୍ଡିଗଡ ୧, ତାମିଲନାଡୁ ୧ ଏବଂ ପଶ୍ଚିମବଙ୍ଗରେ ଜଣେ ଆକ୍ରାନ୍ତ ଚିହ୍ନଟ ହୋଇଛନ୍ତି ।
Comments are closed.