ପୁରୀ: ଶନିବାର ରାତିରୁ ନିଖୋଜ ଥିବା ଚିତ୍ତରଂଜନ ପଲେଇଙ୍କ ମୃତଦେହ ନୂଆ ନଈରୁ ସୋମବାର ସକାଳେ ଉଦ୍ଧାର କରାଯାଇଛି । ତାଙ୍କ ଶରୀରର ଅନେକ ସ୍ଥାନରେ ଦାଗ ଓ କ୍ଷତସ୍ଥାନ ରହିଥିବା ଦେଖିବାକୁ ମିଳିଛି । ସେ ରାଜ୍ୟ ଯୋଜନା ବୋର୍ଡ ଉପାଧ୍ୟକ୍ଷ ସଞ୍ଜୟ କୁମାର ଦାସବର୍ମାଙ୍କ ଘନିଷ୍ଠ ସହଯୋଗୀ ବୋଲି ଜଣାଯାଇଛି । ଚିତ୍ତରଂଜନଙ୍କ ଘର ବ୍ରହ୍ମଗିରି ଥାନା ସାନବନ୍ଧକେରା ଗ୍ରାମରେ । ଏହି ଘଟଣାରେ ତାଙ୍କର ୫ ଜଣ ସାଙ୍ଗଙ୍କୁ ସଦର ଥାନା ପୁଲିସ ଅଟକ ରଖିଛି । ଚିତ୍ତରଂଜନଙ୍କୁ ଅପହରଣ ପରେ ହତ୍ୟା କରାଯାଇଥିବା ତାଙ୍କ ପରିବାର ଲୋକ ଅଭିଯୋଗ କରିଛନ୍ତି ।
ଉଲ୍ଲେଖଯୋଗ୍ୟ ଯେ ଚିତ୍ତରଂଜନ ଗତ ଶନିବାର ଦିନ ସଞ୍ଜୟ ଦାସବର୍ମାଙ୍କ ସହିତ ବ୍ରହ୍ମଗିରି ଓ କୃଷ୍ଣପ୍ରସାଦର କେତେକ ଅଞ୍ଚଳକୁ ଯାଇଥିଲେ । ସେଠାରୁ ଫେରି ରାତି ପ୍ରାୟ ୯ଟାରେ ଭୋଜି କରିବାକୁ ଘରୁ ବାହାରି ଯାଇଥିଲେ । ରାତିରେ ଚିତ୍ତରଂଜନ ଘରକୁ ନଫେରିବାରୁ ପରିବାର ଲୋକ ତାଙ୍କ ସହିତ ଯୋଗାଯୋଗ କରିବାକୁ ଚେଷ୍ଟା କରିଥିଲେ । କିନ୍ତୁ ତାଙ୍କ ମୋବାଇଲ ଫୋନ ବନ୍ଦ ଥିବାରୁ ତାଙ୍କ ସହିତ ଯୋଗାଯୋଗ ହୋଇପାରିନଥିଲା । ରବିବାର ସକାଳେ ମାଳତି ପାଟପୁରଠାରୁ କିଛି ଦୂରରେ ଥିବା ଗଡମୃଗଶିରା-ଜମାରସୁଆଁ ନଦୀବନ୍ଧରେ ଗୋଟିଏ ବାଇକ, ମୋବାଇଲ ଫୋନ, ସୁନାଚେନ, ଚପଲ ଏବଂ ରକ୍ତ ପଡିଥିବା ଦେଖି ସ୍ଥାନୀୟ ଲୋକେ ସଦର ଥାନାକୁ ଖବର ଦେଇଥିଲେ । ସେହି ସାମଗ୍ରୀ ଚିତ୍ତରଂଜନଙ୍କର ବୋଲି ଜଣାପଡିଥିଲା । ରବିବାର ଦିନ ତମାତ ତାଙ୍କୁ ଖୋଜାଖୋଜି କରାଯାଇଥିଲେ ମଧ୍ୟ ତାଙ୍କର ସନ୍ଧାନ ମିଳିନଥିଲା । ତେବେ ସୋମବାର ସକାଳେ ତାଙ୍କ ମୃତଦେହ ମିଳିବା ପରେ ତାଙ୍କୁ ଅପହରଣ କରିନିଆଯାଇ ହତ୍ୟା କରାଯାଇଥିବା ପରିବାରଲୋକ ଅଭିଯୋଗ କରିଛନ୍ତି । ଏପରିକି ହତ୍ୟା କରିବା ପୂର୍ବରୁ ଚିତ୍ତରଂଜନଙ୍କ ସହିତ ଧସ୍ତାଧସ୍ତି ହୋଇଥିବା ଏବଂ ତାଙ୍କୁ ଆକ୍ରମଣ କରାଯାଇଥିବା ପରିବାର ଲୋକ ସନ୍ଦେହ କରୁଛନ୍ତି ।
Comments are closed.