ଆଜି ସଂଧ୍ୟାରୁ ଖୋଲିବ ଭଗବାନ ଆୟାପ୍ପାଙ୍କ ସାବରିମାଳା ମନ୍ଦିର

କୋଚି: ଭଗବାନ ଆୟାପ୍ପାଙ୍କ ପ୍ରସିଦ୍ଧ ସାବରିମାଳା ମନ୍ଦିରର ଦ୍ୱାର ସୋମବାର ସଂଧ୍ୟାରେ ଫିଟାଟିବ । ଏହାପରେ ଦୁଇମାସ ବ୍ୟାପୀ ତୀର୍ଥାଟନ ସମୟ ଆରମ୍ଭ ହେବ । ପ୍ରତିଦିନ କୋଭିଡ କଟକଣାକୁ ପାଳନ କରି ୩୦ ହଜାର ଭକ୍ତଙ୍କୁ ଭଗବାନଙ୍କର ଦର୍ଶନ ପାଇଁ ଅନୁମତି ପ୍ରଦାନ କରାଯାଇଛି । ସରକାରଙ୍କ ପକ୍ଷରୁ କୁହାଯାଇଛି ଯେ କୋଭିଡ ଜନିତ ତାଲାବନ୍ଦ ପରିସ୍ଥିତି ପରେ ସୋମବାର ଠାରୁ ସାବରିମାଳା ମନ୍ଦିରକୁ ମଣ୍ଡଳା-ମକରଭିଲାକୁ (ମକର ସଂକ୍ରାନ୍ତି) ପାଇଁ ଖୋଲି ଦିଆଯିବ । ଏହାକୁ ଡିସେମ୍ବର ୨୬ ତାରିଖ ମଣ୍ଡଳପୂଜା ପର୍ଯ୍ୟନ୍ତ ଖୋଲା ରଖାଯିବ । ପରେ ତାହାକୁ ବନ୍ଦ କରାଯାଇ ଡିସେମ୍ବର ୩୦ରେ ପୁନର୍ବାର ଖୋଲାଯିବ, ଯାହା ଜାନୁଆରୀ ୨୦ ତାରିଖ ମକର ସଂକ୍ରାନ୍ତି ପର୍ଯ୍ୟନ୍ତ ଖୋଲାରହିବ । ମନ୍ଦିର ମୁଖ୍ୟଦ୍ୱାର ଓ ଗର୍ଭଗୃହ ଖୋଲାଯିବା ସମୟରେ ମନ୍ଦିରର ମୁଖ୍ୟ ପୂଜକ (ତାନ୍ତ୍ରି) କାଣ୍ଡାରାରୁ ମହେଶ ମୋହନାରାରୁ ଉପସ୍ଥିତ ରହିବେ ବୋଲି ଜଣାଯାଇଛି । ଭକ୍ତଙ୍କ ପାଇଁ କୋଭିଡ କଟକଣାକୁ କଡାକଡି ଭାବରେ ପାଳନ କରିବାକୁ ହେବ । ଏହି ସ୍ଥଳକୁ ଦର୍ଶନରେ ଆସୁଥିବା ଭକ୍ତ ଦୁଇଟି କୋଭିଡ ଟିକା ନେଇଥିବା ପ୍ରମାଣପତ୍ର ଅଥବା ମନ୍ଦିରକୁ ଆସିବାର ୭୨ ଘଣ୍ଟା ପୂର୍ବରୁ ଆରଟିପିସିଆର ପରୀକ୍ଷାରେ କୋଭିଡ ସଂକ୍ରମିତ ନଥିବା ପ୍ରମାଣପତ୍ର ଦେଖାଇବାକୁ ହେବ । ତାହାସହିତ ଭକ୍ତମାନେ ମୂଳ ଆଧାର କାର୍ଡ ମଧ୍ୟ ଏଠାରେ ଦେଖାଇବାକୁ ପଡିବ । ତେବେ ସମ୍ଭାବ୍ୟ କୋଭିଡ ସଂକ୍ରମଣର ମୁକାବିଲା କରିବାକୁ ରାଜ୍ୟ ସ୍ୱାସ୍ଥ୍ୟ ବିଭାଗ ପକ୍ଷରୁ ଏଠାରେ ପର୍ଯ୍ୟାପ୍ତ ବ୍ୟବସ୍ଥା କରାଯାଇଥିବା ରାଜ୍ୟ ସ୍ୱାସ୍ଥ୍ୟ ମନ୍ତ୍ରୀ ବୀଣା ଜର୍ଜ କହିଛନ୍ତି ।