ଟୋକିଓ : ଚଳିତ ପାରାଲିମ୍ପିକ୍ସରେ ସୋମବାର ଡିସ୍କସ୍ ଥ୍ରୋ’ରେ ଭାରତକୁ ଏକ ରୌପ୍ୟପଦକ ଜିତାଇଛନ୍ତି ଯୋଗେଶ କାଠୁନିୟା। ଏଫ୍୫୬ ବର୍ଗର ଫାଇନାଲରେ ଯୋଗେଶ ତାଙ୍କର ୬ଷ୍ଠ ତଥା ଅନ୍ତିମ ପ୍ରୟାସରେ ୪୪.୩୮ ମିଟର ଦୂରକୁ ଡିସ୍କସ୍ ଫିଙ୍ଗିଥିଲେ; ଫଳରେ ସେ ୨ୟ ସ୍ଥାନରେ ରହିଥିଲେ। ଯୋଗେଶଙ୍କର କୌଣସି ପ୍ରଶିକ୍ଷକ ନ ଥିଲେ ମଧ୍ୟ ନିଜ ଉଦ୍ୟମରେ ଆଜି ପାରାଲିମ୍ପିକ୍ସ ରୌପ୍ୟପଦକ ଜିତି ପାରିଛନ୍ତି। ନୂଆଦିଲ୍ଲୀର କିରୋଡ଼ିମଲ ମହାବିଦ୍ୟାଳୟରୁ ବାଣିଜ୍ୟରେ ସ୍ନାତକ ଯୋଗେଶ କହିଛନ୍ତି ଯେ ଗତ ୧୮ ମାସ ହେଲା ସେ ଯେଉଁ କଠିନ ପରିଶ୍ରମ କରିଥିଲେ; ଏହା ତାହାର ଫଳ। ସେନା କର୍ମଚାରୀଙ୍କ ସୁପୁତ୍ର ଯୋଗେଶଙ୍କୁ ମାତ୍ର ୮ ବର୍ଷ ବୟସ ହୋଇଥିବା ବେଳେ ତାଙ୍କୁ ପକ୍ଷାଘାତ ହୋଇଥିଲା। ରୌପ୍ୟ ପଦକ ଜିତିଥିବାରୁ ସେ ଖୁସି ବୋଲି କହିଥିବା ବେଳେ ଆଗକୁ ସେ ଅଧିକ ପରିଶ୍ରମ କରି ସ୍ବର୍ଣ୍ଣ ଜିତିବେ ବୋଲି ଦେଶକୁ ପ୍ରତିଶ୍ରୁତି ଦେଇଛନ୍ତି। ସୋମବାର ଫାଇନାଲରେ ଗତଥରର ଚମ୍ପିଆନ୍, ବର୍ତ୍ତମାନର ବିଶ୍ବ ଚମ୍ପିଆନ୍ ଏବଂ ବିଶ୍ବ କୀର୍ତ୍ତିମାନ ହାସଲ କରିଥିବା ବ୍ରାଜିଲର କ୍ଲାଉଡିନେ ବାଟିଷ୍ଟା ଡସ୍ ସାଣ୍ଟସ୍ ୪୫.୫୯ ମିଟର ଦୂରତା ସହ ସ୍ବର୍ଣ୍ଣପଦକ ଜିତିଥିଲେ। କ୍ୟୁବାର ଲିଓନାର୍ଡୋ ଡିଆଜ୍ ଆଲ୍ଡାନା ୪୩.୩୬ ପଏଣ୍ଟ ସହ କାଂସ୍ୟ ପଦକ ଜିତି ପାରିଥିଲେ। ଏହା ପୂର୍ବରୁ ଯୋଗେଶ ବହୁତ ଆନ୍ତର୍ଜାତିକ ପଦକ ଜିତି ପାରିଥିଲେ।
Popular Categories
Previous article
Next article