ବ୍ରହ୍ମପୁର: କେନ୍ଦ୍ର ମାନବ ସମ୍ବଳ ବିକାଶ ମନ୍ତ୍ରୀ ଶ୍ରୀ ପ୍ରକାଶ ଜାଭଦେକର ଦୁଇ ଦିନିଆ ବ୍ରହ୍ମପୁର ଗସ୍ତରେ ଆସି ମଙ୍ଗଳବାର ଦ୍ବିତୀୟ ଦିନରେ ଛତ୍ରପୁର ଓ ଦିଗପହଣ୍ଡି କର୍ମୀଙ୍କୁ ଭେଟିଛନ୍ତି । ବ୍ରହ୍ମପୁର ଲୋକସଭା କ୍ଷେତ୍ର ଅଧିନରେ ଥିବା ୭ଟି ବିଧାନସଭା ଆସନର କର୍ମୀ ଓ ନେତାଙ୍କୁ ଭେଟି ଆଗାମୀ ନିର୍ବାଚନରେ ଦଳ କିପରି ବିଜୟ ଲାଭ କରିବ ସେ ନେଇ ଆଲୋଚନା କରିବା ସହ ସେମାନଙ୍କୁ ପରାମର୍ଶ ଦେଇଛନ୍ତି । ଜାତୀୟ ସଭାପତି ଅମିତ ଶାହାଙ୍କ ମିଶନ୍-୧୨୦କୁ ସାକାର ରୂପ ଦେବା ପାଇଁ ତଥା ଓଡ଼ିଶାରେ ପଦ୍ମଫୁଲ ଫୁଟାଇବା ପାଇଁ ଦଳର ତୁଙ୍ଗ ନେତା ମାନେ ଅଣ୍ଟା ଭିଡିଛନ୍ତି । ବ୍ରହ୍ମପୁର ଲୋକସଭା କ୍ଷେତ୍ରର ପ୍ରଭାରୀ ରୂପେ ଦାୟିତ୍ୱ ନେଇଥିବା ଶ୍ରୀ ଜାଭେଦକର ଏଥିପାଇଁ ବ୍ରହ୍ମପୁରରେ ସୋମବାର ଓ ମଙ୍ଗଳବାର ଦୁଇ ଦିନ ଧରି ଗୋପାଳପୁର, ଚିକିଟି, ମୋହନା, ପାରଳାଖେମୁଣ୍ଡି, ବ୍ରହ୍ମପୁର , ଦିଗପହଣ୍ଡି ଓ ଛତ୍ରପୁରର କର୍ମୀ ଓ ନେତାଙ୍କୁ ଭେଟି ସେମାନଙ୍କର ମତମତା ନେବା ସହ ଦଳର ବିଜୟ ପାଇଁ କିଛି ରଣକୌଶଳ ମଧ୍ୟ ବତାଇଥିଲେ । ଏହା ପରେ ମନ୍ତ୍ରୀ ସାମ୍ବାଦିକମାନଙ୍କୁ ଭେଟି ବିଭିନ୍ନ ପ୍ରସଙ୍ଗ ଉପରେ ନିଜର ମତ ରଖିଥିଲେ । ସମଗ୍ର ଭାରତ ବର୍ଷରେ ଏକକାଳୀନ ନିର୍ବାଚନ କରାଇ ନେବା ପାଇଁ ଅନେକଙ୍କର ମତ ରହିଛି । ଆଉ ଆମ ଦଳର ମଧ୍ୟ ସେହି ଏକା ମତ ବୋଲି ମନ୍ତ୍ରୀ କହିଥିଲେ ।
ସେହିପରି ଓଡ଼ିଶାରେ ଲୋକତନ୍ତ୍ର ନୁହଁ ବିଜେଡ଼ି ତନ୍ତ୍ର ଚାଲିଛି ସେ ବୋଲି କହିଥିଲେ । କେନ୍ଦ୍ରର ଯୋଜନାକୁ ରାଜ୍ୟ ସରକାର ନିଜ ନାମରେ କରାଇ ନେଇ ପ୍ରକୃତ ହିତାଧିକାରୀଙ୍କୁ ଯୋଜନାରୁ ବଂଚିତ କରିବା ସହ ନିଜ ଲୋକଙ୍କୁ ଦେଉଛି ବୋଲି ସେ ଅଭିଯୋଗ କରିଥିଲେ । ରାଜନୈତିକ ଉଦ୍ଦେଶ୍ୟ ରଖି ପୁଲିସ ବାରମ୍ବାର ମିଥ୍ୟା ମାମଲା ରୁଜୁ କରୁଛି ବୋଲି ସେ କହିବା ସହ ବିଜେଡ଼ି ସରକାରଙ୍କ ଉପରେ ଲୋକଙ୍କ ଅସନ୍ତୋଷ ରହିଛି ଓ ଆଗାମୀ ନିର୍ବାଚନରେ ଲୋକେ ବିଜେପିକୁ ଓଡ଼ିଶାରେ ଭୋଟ ଦେଇ କ୍ଷମତାଧୀନ କରାଇବେ ବୋଲି ସେ କହିଛନ୍ତି । ଏହି ସାମ୍ବାଦିକ ସମ୍ମିଳନୀରେ ରାଜ୍ୟ ବିଜେପି ସାଧାରଣ ସମ୍ପାଦକ ଭ୍ରୁଗୁବକ୍ସି ପାତ୍ର, ସମ୍ପାଦକ ବିଭୂତି ଜେନା, ଜିଲ୍ଲା ପ୍ରଭାରୀ ତଥା ପୂର୍ବତନ ମନ୍ତ୍ରୀ ସୁରମା ପାଢୀ ଓ ଗଞ୍ଜାମ ଜିଲ୍ଲା ବିଜେପି ସଭାପତି କାହ୍ନୁଚରଣ ପତି ଉପସ୍ଥିତ ଥିଲେ।
