ଆଗ୍ରା: ତାଜମହଲରେ ବୋମା ଗୁଜବକୁ ନେଇ ଗୁରୁବାର ପର୍ଯ୍ୟଟକମାନଙ୍କ ମଧ୍ୟରେ ଆତଙ୍କ ଖେଳିଯାଇଥିଲା। ପୂର୍ବାହ୍ନ ୧୦ଟାରେ ପୁଲିସ କଂଟ୍ରୋଲ ରୁମ୍କୁ ଜଣେ ବ୍ୟକ୍ତି ଫୋନ କରି ତାଜମହଲ ପରିସରରେ ବୋମା ରହିଥିବା ଜଣାଇଥିଲେ। ତୁରନ୍ତ ପୁଲିସ ବୋମା ନିଷ୍କ୍ରିୟକାରୀ ଦଳ ସହିତ ସେଠାରେ ପହଞ୍ଚିଥିଲା। ସିଆଇଏସଏଫ କମାଣ୍ଡାଣ୍ଟଙ୍କୁ ବି ଖବର ଦିଆଯାଇଥିଲା। ଭିତରେ ଥିବା ସବୁ ପର୍ଯ୍ୟଟକଙ୍କୁ ବାହାର କରିଦିଆଯାଇଥିଲା। ଏହି ସମୟରେ ଯାଞ୍ଚ କାର୍ଯ୍ୟ କରାଯିବା ସହିତ ତାଜମହଲ ପରିସରସ୍ଥ ସବୁ ଅଞ୍ଚଳରେ ଟିକିନିଖି ସର୍ଚ୍ଚ ଅପରେଶନ କରାଯାଇଥିଲା।
ପ୍ରାୟ ୧ ଘଣ୍ଟା ଧରି ସର୍ଚ୍ଚ ଅପରେଶନ ପରେ କୌଣସି ବିସ୍ଫୋରକ କିମ୍ବା ବୋମା ମିଳି ନ ଥିଲା। ସିଟି ଏସପି ବୋତ୍ରେ ରୋହନ ପ୍ରମୋଦ କହିଛନ୍ତି ଯେ, କୌଣସି ବ୍ୟକ୍ତି ପୁଲିସକୁ ଭୁଲ ସୂଚନା ଦେଇଥିଲେ। ଏହା ପରେ ଚେକିଂ କରାଗଲା। କିନ୍ତୁ କୌଣସି ବିସ୍ଫୋରକ ମିଳିଲା ନାହିଁ। ସୂଚନା ଦେଇଥିବା ବ୍ୟକ୍ତିକୁ ଚିହ୍ନଟ କରାଯାଉଛି। ପୁଲିସକୁ କେଉଁଠୁ ଫୋନ୍ କଲ୍ କରାଯାଇଥିଲା ? କେଉଁ ଉଦ୍ଦେଶ୍ୟରେ କରାଯାଇଥିଲା, ସେ ନେଇ ତଦନ୍ତ କରାଯାଉଛି। ପର୍ଯ୍ୟଟକଙ୍କ ପାଇଁ ତାଜମହଲ ଖୋଲିବା ପ୍ରକ୍ରିୟା ଆରମ୍ଭ ହୋଇଯାଇଛି ବୋଲି ସେ କହିଥିଲେ।
