କଟକ: କୁନ୍ଦୁଲି ପୀଡିତାଙ୍କୁ ଗଣ ବଳାତ୍କାର ଅଭିଯୋଗ ପରେ ସାରା ଓଡିଶାରେ ପ୍ରତିକ୍ରିୟା ପ୍ରକାଶ ପାଇଥିଲା । ଏହାପରେ ବିରୋଧି ଦଳମାନଙ୍କ ପକ୍ଷରୁ ଧାରଣ ଓ ବିକ୍ଷୋଭ ପ୍ରଦର୍ଶନ କରାଯାଇଥିଲା । ପରେ ପୀଡିତା ଆତ୍ମହତ୍ୟା କରିଥିଲେ । ପୁଲିସ ଡାକ୍ତରୀ ଓ ଫୋରେନସିକ୍ ରିପୋର୍ଟରେ ବଳାତ୍କାର ହୋଇ ନ ଥିବା ତଥ୍ୟ ବିଷୟରେ ସୂଚନା ଦେଇଥିଲା । ଏହପରେ ରାଜ୍ୟ ଫୋରେନସିକ୍ ଗବେଷଣାଗାରର ପ୍ରାଥମିକ ଓ ଅନ୍ତିମ ତଥ୍ୟ ତାଳ ମେଳ ରହୁ ନ ଥିବା ଅଭିଯୋଗ ହୋଇଥିଲା । ପୀଡିତାଙ୍କ ବସ୍ତ୍ରର ଫୋରେନସିକ ତଦନ୍ତ ପାଇଁ କେନ୍ଦ୍ରୀୟ ଫୋରେନସିକ୍ ବିଜ୍ଞାନ ଗବେଷଣାଗାରକୁ ପଠାଇବା ପାଇଁ ପୁଲିସ ମହାନିର୍ଦେଶକ ନିର୍ଦେଶ ଦେଇଥିଲେ । ଏହାପରେ କୋଲକାତାରେ ଥିବା କେନ୍ଦ୍ରୀୟ ଫୋରେନସିକ୍ ବିଜ୍ଞାନ ଗବେଷଣାଗାରକୁ ପୀଡିତାଙ୍କ ବସ୍ତ୍ରକୁ ପଠାଯାଇଥିଲା । ସେଥିରେ ଲାଗିଥିବା ଦାଗ ସିମନ ନୁହେଁ ,ଏହା ପୀଡିତାଙ୍କର , ନାରୀ ଶରୀରରୁ ନିର୍ଗତ ପଦାର୍ଥ ବୋଲି କେନ୍ଦ୍ରୀୟ ଫୋରେନସିକ୍ ବିଜ୍ଞାନ ଗବେଷଣାଗାର ରିପୋର୍ଟରେ ଦର୍ଶାଯାଇଥିବା କ୍ରାଇମ୍ବ୍ରାଞ୍ଚ ଏସ୍ପି ଆର୍ ବି ପାଣିଗ୍ରାହୀ ଏକ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ।
କେନ୍ଦ୍ରୀୟ ଫୋରେନସିକ୍ ବିଜ୍ଞାନ ଗବେଷଣାଗାର ତାହାର ରିପୋର୍ଟ ଅଦାଲତକୁ ପଠାଇଛି । ଏହି ରିପୋର୍ଟ ରାଜ୍ୟ ଫୋରେନସିକ୍ ବିଜ୍ଞାନ ଗବେଷଣାଗାର ରିପୋର୍ଟ ସହ ସମାନ ବୋଲି ସେ ପ୍ରକାଶ କରିଛନ୍ତି ।
୧୦.୧୦.୨୦୧୭ରେ କୁନ୍ଦୁଲିରେ ଜଣେ ଛାତ୍ରୀ ଫେରୁଥିବା ବେଳେ ତାଙ୍କୁ ୪ ଜଣ ଜବାନ ଗଣ ବଳାତ୍କାର କରିଥିବା କଥା ଅଭିଯୋଗ ହୋଇଥିଲା । ଏହାପରେ ତାଙ୍କୁ କୁନ୍ଦୁଲି ପ୍ରାଥମିକ ଚିକିତ୍ସାଳୟ ପରେ କୋରାପୁଟ ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଥିଲା । ୧୦-୧୦-୨୦୧୭ ଓ ୧୧-୧୦-୨୦୧୭ରେ ଡାକ୍ତରୀ ଦଳ ତାଙ୍କର ପରୀକ୍ଷା କରିଥିଲେ । ରିପୋର୍ଟରେ ବଳାତ୍କାର ହୋଇ ନ ଥିବା ଦର୍ଶାଯାଇଥିଲା । ଏଥିରେ ବ୍ରହ୍ମପୁର ଏମ୍ଏଫ୍ଟିର ସହକାରୀ ପ୍ରଫେସର ଡକ୍ଟର ସୁଦୀପ ଦାଶ ବି ଥିଲେ । ପରେ ରାଜ୍ୟ ଫୋରେନସିକ୍ ବିଜ୍ଞାନ ବେଷଣାଗାରକୁ ପୀଡିତାଙ୍କ ବସ୍ତ୍ର ପରୀକ୍ଷା ପାଇଁ ପଠାଯାଇଥିଲା । ୨୩-୧୦-୨୦୧୭ରେ ଅଦାଲତରେ ଫୋରେନସିକ୍ ବିଜ୍ଞାନ ଗବେଷଣାଗାରର ନିର୍ଦେଶକ ବଳାତ୍କାର ହୋଇ ନ ଥିବା ରିପୋର୍ଟ ଦାଖଲ କରିଥିଲେ । ଏହାପରେ ପ୍ରାଥମିକ ରିପୋର୍ଟ ଓ ଅନ୍ତିମ ରିପୋର୍ଟ ତାଳ ମେଳ ରହୁ ନଥିବା ଅଭିଯୋଗ ହୋଇଥିଲା ।ପରେ ପୁଲିସ ମହାନିର୍ଦେଶକଙ୍କ ନିର୍ଦେଶ କ୍ରମେ ଏହି ବସ୍ତ୍ର ସବୁକୁ ପରୀକ୍ଷା ପାଇଁ କଲକାତ ପଠାଯାଇଥିଲା । ଡିଏନ୍ଏ ପ୍ରୋଫିଲିଂ ଓ ପୁନଃ ପରୀକ୍ଷା ପାଇଁ ଏସବୁ ପଠାଯାଇଥିଲା । ସେଥିରୁ ବି ବସ୍ତ୍ରର ଦାଗ ପୁରୁଷଙ୍କର ନୁହେଁ , ଏହା ନାରୀର ବୋଲି ରିପୋର୍ଟ ଆସିଛି ବୋଲି କ୍ରାଇମ୍ବ୍ରାଞ୍ଚ ଏସ୍ପି ଆର୍ ବି ପାଣିଗ୍ରାହୀ ସୂଚନା ଦେଇଛନ୍ତି ।
୨୨-୦୧-୨୦୧୮ ତାରିଖରେ ପୀଡିତା ଆତ୍ମହତ୍ୟା କରିଥିଲେ । ଏହାପରେ ବିରୋଧିଦଳ ମାନଙ୍କ ପକ୍ଷରୁ ଓଡିଶା ବନ୍ଦ କରାଯାଇଥିଲା । ରାଜଧାନୀ ଭୁବନେଶ୍ୱରରେ ଗଣ ବିକ୍ଷୋଭ ପ୍ରଦର୍ଶନ କରାଯାଇଥିଲା । ଏହି ଘଟଣାର ଏସ୍ଆଇଟି ଓ ବିଚାରବିଭାଗୀୟ ତଦନ୍ତ ଚାଲିଛି । ପୀଡିତା କେଉଁ ପରିସ୍ଥିତିରେ ଆତ୍ମହତ୍ୟା କଲେ ତାହାର ବି ତଦନ୍ତ ଚାଲିଛି ।
ଏହି ଘଟଣାପରେ ପୀଡିତାଙ୍କୁ ମାନସିକ ଚାପ ପକାଇଥିବା ବ୍ୟକ୍ତି ବିଶେଷଙ୍କ ବିରୋଧରେ ତଦନ୍ତ ପାଇଁ ଦାବି ହୋଇଛି । ତାଙ୍କୁ ଭୁବନେଶ୍ୱର ଡାକି ତାଙ୍କର ସର୍ବ ସମ୍ମୁଖରେ ଜନ ଶୁଣାଣୀ କରିବା ସହ ସେ ଆତ୍ମହତ୍ୟା କଥା କହୁଥିବା ବେଳେ, କେତେକ ବ୍ୟକ୍ତି ଓ ନେତା ନିଜର ସ୍ୱାର୍ଥ ପାଇଁ ତାଙ୍କ ଫଟୋ ଓ ପରିଚୟକୁ ସାର୍ବଜନୀନ କରିଥିଲେ ବୋଲି ଅଭିଯୋଗ ହୋଇଛି । ପୁଲିସରେ ମଧ୍ୟ ଏ ନେଇ ଅଭିଯୋଗ ହୋଇଛି । ସେହି ବ୍ୟକ୍ତି ବିଶେଷଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ଷ୍ଟେଟ ପୋଗ୍ରେସିଭ୍ ଓ୍ୱିମେନସ୍ ଫୋରମ ପକ୍ଷରୁ ଦାବି କରାଯାଇଛି । ଏହି ବ୍ୟକ୍ତି ବିଶେଷଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ପାଇଁ ଷ୍ଟେଟ ପୋଗ୍ରେସିଭ ଓ୍ୱିମେନସ୍ ଫୋରମର ସଂଯୋଜିକା ମମତା ସାମନ୍ତରାୟ ଦାବି କରିଛନ୍ତି ।
