ଆଗ୍ରା: ହିନ୍ଦୁ ଏବଂ ପାର୍ସୀ ସ୍ଥାପତ୍ୟର ନିଦର୍ଶନ ତଥା ଅତ୍ୟନ୍ତ ସୁନ୍ଦର ଏବଂ ଲାଲ ପଥରରେ ନିର୍ମିତ ଫତେହପୁର ସିକ୍ରି ସ୍ମାରକୀର ସଂରକ୍ଷଣ ପାଇଁ ଉତ୍ଖନନ କାର୍ଯ୍ୟ ଚାଲିଛି। ଭାରତୀୟ ପ୍ରତ୍ନତାତ୍ତ୍ଵିକ ସର୍ବେକ୍ଷଣ (ଏଏସଆଇ) ପକ୍ଷରୁ ଚାଲିଥିବା ଏହି ଉତ୍ଖନନ ସମୟରେ ୧୬ଶ ଶତାବ୍ଦୀର ଏକ ଫାଉଣ୍ଟେନ ମିଳିଛି। ଏହି ଫାଉଣ୍ଟେନ ସ୍ୟାଣ୍ଡ ଷ୍ଟୋନ ଏବଂ ଚୂନପଥରରେ ନିର୍ମିତ ହୋଇଛି।
ମୋଗଲ ଶାସନ ସମୟରେ ମୀନାକାରୀ କଳାକୃତି ବହୁଳ ବ୍ୟବହାର ହେଉଥିଲା। ଏହି ଫାଉଣ୍ଟେନ ଉପରେ ଉକ୍ତ କଳାକୃତିର ପ୍ରମାଣ ମିଳିଛି। ସମ୍ପୂର୍ଣ୍ଣ ଫାଉଣ୍ଟେନ ଉପରେ ଖୋଦିତ ହୋଇଛି। ଏହାର ଓସାର ୮.୭ ମିଟର ହୋଇଥିବାବେଳେ ଏହା ତଳେ ୧.୧ ମିଟରର ଏକ ଗଭୀର ଟାଙ୍କି ରହିଛି।
ସେହି ସମୟରେ ପରିବେଶକୁ ଥଣ୍ଡା ରଖିବା ପାଇଁ ଫାଉଣ୍ଟେନ ନିର୍ମାଣ କରାଯାଉଥିଲା ବୋଲି ଅନୁମାନ କରାଯାଉଛି। ସିକ୍ରିର ବଡ଼ ଦୁର୍ଗରେ ଏକ ଫାଉଣ୍ଟେନ ମିଳିବା ପ୍ରଥମ ଘଟଣା। ଆକବରଙ୍କ ଘନିଷ୍ଠ ଟୋଡରମଲଙ୍କ ମହଲ ସମ୍ମୁଖରେ ଏହି ଫାଉଣ୍ଟେନ ରହିଛି। ଆକବରଙ୍କ ନବରତ୍ନଙ୍କ ମଧ୍ୟରୁ ଟୋଡରମଲ ହେଉଛନ୍ତି ଅନ୍ୟତମ। ସେ ଆକବରଙ୍କ ରାଜସ୍ବ ଏବଂ ଅର୍ଥମନ୍ତ୍ରୀ ଥିଲେ।
