କୁଆଁରମୁଣ୍ଡା : ବୀରମିତ୍ରପୁର ଥାନା କୁଆଁରମୁଣ୍ଡା ଫାଣ୍ଡି ଅଧିନସ୍ଥ ଡୁମେରଜୋର ଏସବିଆଇ ଶାଖାରୁ ଆଜି ଦୁଇଟି ବାଇକରେ ୪ଜଣ ଲୁଟିଆ ଆସି ବନ୍ଧୁକ ଓ ଭୁଜାଲି ସାହାଯ୍ୟରେ ୬ଲକ୍ଷ ଟଙ୍କା ଲୁଟି ନେଇଥିବା ଜଣାପଡ଼ିଛି। ଲୁଟିଆଙ୍କ ଆକ୍ରମଣରେ ବ୍ୟାଙ୍କ ମ୍ୟାନେଜର ଆହତ ହୋଇଛନ୍ତି। ପୁଲିସ ସୂଚନା ଅନୁସାରେ ଆଜି ଅପରାହ୍ନ ୩ଟା ସମୟରେ ୪ଜଣ ମୁଖାପିନ୍ଧା ଲୁଟିଆ ଡୁମେରଜୋର ଏସବିଆଇ ମଧ୍ୟକୁ ପ୍ରବେଶ କରି ମ୍ୟାନେଜରଙ୍କୁ ଖୋଜିଥିଲେ। ପରେ ମ୍ୟାନେଜର ଦିପ୍ତୀରଞ୍ଜନ ମଲ୍ଲିକଙ୍କୁ ଭୁଜାଲିରେ ଆକ୍ରମଣ କରି ଆହତ କରିବା ସହିତ କ୍ୟାସ କାଉଣ୍ଟରରୁ ପ୍ରାୟ ସାଢ଼େ ୫ଲକ୍ଷ ଟଙ୍କା ଏବଂ ଜମା କରିବାକୁ ଆସିଥିବା ଏକ ଏସଏଚଜି ଗ୍ରୁପର ସଭ୍ୟଙ୍କଠାରୁ ୫୦ ହଜାର ଟଙ୍କା ଲୁଟି ନେଇ ଫେରାର ହୋଇଯାଇଥିଲେ। ଲୁଟ୍ ବେଳେ ବ୍ୟାଙ୍କ କର୍ମଚାରୀ ଓ ଗ୍ରାହକଙ୍କୁ ମିଶାଇ ମାତ୍ର ୮ରୁ ୧୦ଜଣ ଉପସ୍ଥିତ ଥିଲେ। ଲୁଟିଆମାନେ ଗଲାବେଳେ ୨ଟି ସିଡି ସାଙ୍ଗକୁ ସିସି କ୍ୟାମେରା ଭାଙ୍ଗି ଦେବା ସହିତ ବ୍ୟାଙ୍କ କର୍ମଚାରୀ ଓ ଗ୍ରାହକଙ୍କଠାରୁ ୮ଟି ମୋବାଇଲ ଛଡ଼ାଇ ନେଇଥିଲେ। ସେମାନେ ସ୍ଥାନୀୟ ଭାଷାରେ କଥାବାର୍ତ୍ତା ହେଉଥିବା ଏବଂ ଏକ ଟିଭିଏସ୍ ଆପାଚି ଓ ଏକ ହିରୋହୋଣ୍ଡା ସ୍ପ୍ଲେଣ୍ଡର ପ୍ଲସ ଗାଡ଼ିରେ ଆସିଥିଲେ। ବ୍ୟାଙ୍କ ପକ୍ଷରୁ କୁଆଁରମୁଣ୍ଡା ଫାଣ୍ଡିକୁ ଖବର ଦେବାପରେ ଫାଣ୍ଡି ଅଧିକାରୀ ଶ୍ୟାମଲାଲ ଓରାମ ସଦଳବଳ ଘଟଣାସ୍ଥଳରେ ପହଞ୍ଚି ଘଟଣାର ତଦନ୍ତ ଆରମ୍ଭ କରିଛନ୍ତି। ବୀରମିତ୍ରପୁର,କୁଆଁରମୁଣ୍ଡା ଏବଂ ରାଏବଗା ଅଞ୍ଚଳର ପ୍ରବେଶ ପଥକୁ ପୁଲିସ ସିଲ କରି ଯାଞ୍ଚ କରୁଛି।
Popular Categories
Previous article
Next article