ରାମନାଗୁଡା : ରାୟଗଡ଼ା ଜିଲା ରାମନାଗୁଡା ବ୍ଲକ ଗୁମୁଡା ଅଞ୍ଚଳରୁ ବୁଧବାର ଏକ ଟ୍ରକ୍ରୁ ୫୬ ଲକ୍ଷ ଟଙ୍କାର ଗଞ୍ଜେଇ ଜବତ ହୋଇଛି। ଏହି ଘଟଣାରେ ଟ୍ରକ୍ ଡ୍ରାଇଭର ଓ ତାର ସହଯୋଗୀ ସହିତ ଟ୍ରକ୍ ମାଲିକକୁ ଗିରଫ କରାଯାଇଛି।
ଗୁଡାରି ପୁଲିସ ଥାନା ଏସଆଇ ପି. ଜୈନଙ୍କ ସୂଚନା ଅନୁସାରେ, ବୁଧବାର ଏକ ୧୪ ଚକିଆ ଟ୍ରକ୍ରେ ଗଜପତିର ରାଇପଙ୍ଗାରୁ ଉତ୍ତରପ୍ରଦେଶକୁ ପଦ୍ମପୁର, ଗୁମୁଡା ଓ ରାମନାଗୁଡ଼ା ଦେଇ ଗଞ୍ଜେଇ ଚାଲାଣ ହେଉଥିବା ପୁଲିସ ସୂଚନା ପାଇଥିଲା। ପରେ ପୁଲିସ ପକ୍ଷରୁ ତୁରନ୍ତ ଗାଡ଼ି ଯାଞ୍ଚ ଆରମ୍ଭ ହୋଇଥିଲା।ଏହି ସମୟରେ ପୁଲିସ ଏକ(ଆରଜେ-୧୪ଜିକେ-୧୦୩୬) ନମ୍ବର ଟ୍ରକରୁ ଗଞ୍ଜେଇ ଜବତ କରିଛି। ଏହି ସମୟରେ ଅଭିଯୁକ୍ତ ଡ୍ରାଇଭର ଓ ତାର ସହଯୋଗୀ ସେଠାରୁ ଖସି ପଳାଇବାକୁ ଚେଷ୍ଟା କରୁଥିବାବେଳେ ପୁଲିସ ସେମାନଙ୍କୁ କାବୁ କରି ଥାନାକୁ ଆଣିଛି। ତେବେ ଜବତ ଗଞ୍ଜେଇର ଓଜନ ୫୭୨ କିଲୋ ହୋଇଥିବାବେଳେ ଏହାର ମୂଲ୍ୟ ୫୬ ଲକ୍ଷ ୯୦ ହଜାର ଟଙ୍କା ବୋଲି କୁହାଯାଉଛି। ଏଥିସହିତ ଟ୍ରକ୍, ଏଟିଏମ କାର୍ଡ ଓ ଗୋଟେ ଜିଓ ମୋବାଇଲ ଫୋନ ଜବତ ହୋଇଛି। ସେହିପରି ପୁଲିସ ଗଞ୍ଜେଇ ଚାଲାଣର ମୂଳ ସ୍ରୋତକୁ ଧରିବା ପାଇଁ ତଦନ୍ତ ଜାରି ରଖିଥିବା ଏସଡିପିଓ ରାଜ କିଶୋର ଦାଶ ସୂଚନା ଦେଇଛନ୍ତି।।
