ଅହମଦାବାଦ : ଅବିରତ ବର୍ଷା ଯୋଗୁଁ ଗୁଜରାଟର ବହୁତ ସ୍ଥାନରେ ବନ୍ୟା ପରିସ୍ଥିତି ଉପୁଜି ୨୯ ଜଣଙ୍କ ମୃତ୍ୟୁ ହୋଇଛି। ଏହା ମଧ୍ୟରୁ ୧୦ ଜଣଙ୍କ ମୃତ୍ୟୁ ବନ୍ୟା ଯୋଗୁଁ ହୋଇଥିବା ବେଳେ ବାକି ୧୯ ଜଣଙ୍କ ମୃତ୍ୟୁ ବିଜୁଳି ଓ ଇଲେକ୍ଟ୍ରିକ୍ ସକ୍ ଯୋଗୁଁ ହୋଇଥିବା ଜଣାପଡ଼ିଛି। ଅଧିକ ବନ୍ୟା ପ୍ରଭାବିତ ଜିଲା ମଧ୍ୟରେ ନବସାରୀ, ବଲସାଡ଼, ଡ଼ାଙ୍ଗ୍, ଜୁନାଗଡ଼, ଗୀର ସୋମନାଥ, ଅମରେଲୀ, ଭାବନଗର ରହିଛି। ଆସନ୍ତା ୫ ଦିନ ପର୍ଯ୍ୟନ୍ତ ପ୍ରବଳରୁ ଅତିପ୍ରବଳ ବର୍ଷା ହେବାର ସମ୍ଭାବନା ରହିଛି ବୋଲି ପାଣିପାଗ ବିଭାଗ ଚେତାବନୀ ଦେଇଛି। ବର୍ଷା ଯୋଗୁଁ ରାଜ୍ୟର ୫ଟି ଜାତୀୟ ରାଜପଥ ଓ ୧୪୪ ଗ୍ରାମ୍ୟ ରାସ୍ତା ସମ୍ପୂର୍ଣ୍ଣ ରୂପେ ବନ୍ଦ ହୋଇଯାଇଛି। ତା’ସହ କିଛି ଏପରି ଗାଁ ରହିଛି ଯାହା ବାହ୍ୟ ପରିବେଶରୁ ସମ୍ପୂର୍ଣ୍ଣ ବିଚ୍ଛିନ୍ନ ହୋଇଯାଇଛି। ପ୍ରଶାସନ ପକ୍ଷରୁ ଜୁନାଗଡ଼, ରାଜକୋଟ୍, ନବସାରୀ, ବ୍ୟାରା, ସୁରତ, ମହିସାଗର, ପାଲନପୁର, ଅହମଦାବାଦ, ବଡ଼ୋଦ୍ରାରେ ଏନ୍ଡ଼ିଆର୍ଏଫ୍ର ଗୋଟିଏ ଗୋଟିଏ ଦଳ ମୁତୟନ କରାଯାଇଛି। ପ୍ରଶାସନର ଆକଳନ ଅନୁସାରେ ବର୍ତ୍ତମାନ ସୁଦ୍ଧା ଏନ୍ଡ଼ିଆର୍ଏଫ୍ ଦଳ ୨୫୨ ଲୋକଙ୍କୁ ଉଦ୍ଧାର କରିବାରେ ସଫଳ ହୋଇଛି। ବନ୍ୟା ପ୍ରପୀଡ଼ିତ ମାନଙ୍କ ଉଦ୍ଧାର ପାଇଁ ବର୍ତ୍ତମାନ ନିୟୋଜିତ ଥିବା ୧୫ ଏନ୍ଡ଼ିଆର୍ଏଫ୍ ଦଳ ସହିତ ଆହୁରି ୫ଟି ଦଳ ସାମିଲ କରାଯିବ। ବନ୍ୟାରୁ ରକ୍ଷା ପାଇଁ କଣ୍ଟ୍ରୋଲ ରୁମ ମଧ୍ୟ ଖୋଲାଯାଇଛି।
