ବେଗୁନିଆ: ବେଗୁନିଆ ବ୍ଲକ ବାଘମାରି ଠାରେ ବେଆଇନ ଭାବେ ପଥର ଚାଲାଣ କରୁଥିବା ଦୁଇଟି ଗାଡିକୁ ବେଗୁନିଆ ତହସିଲଦାର ବିବେକାନନ୍ଦ ପରିଡା ଜବତ କରିଥିଲେ। କିନ୍ତୁ ଗାଡି ଦୁଇଟିର ଡ୍ରାଇଭର ଏବଂ ମାଲିକ ଲୋକମାନଙ୍କୁ ମେଳି କରି ତହସିଲଦାରଙ୍କୁ ଅଶ୍ଳୀଳ ଭାଷାରେ ଗାଳିଗୁଲଜ କରି ବଳପୂର୍ବକ ଗାଡିଦୁଇଟି ଛଡ଼ାଇନେବା ସହିତ ତହସିଲଦାରଙ୍କୁ ହତ୍ୟା ଧମକ ଦେଇଥିବାର ବାଘମାରି ଥାନାରେ ଅଭିଯୋଗ ହୋଇଛି। ଏ ସଂକ୍ରାନ୍ତରେ ତହସିଲଦାର ଉପଜିଲ୍ଲାପାଳ ଏବଂ ଜିଲ୍ଲାପାଳଙ୍କୁ ଜଣାଇଛନ୍ତି।
ଗତ ୮ତାରିଖ ଦିନ ବରପଦାଠାରେ ଥିବା ବେଆଇନ ଖଣିରୁ ଦୁଇଟି ୪୦୭ମିନିଟ୍ରକରେ ପଥର ବୋଝେଇ ହେଉଥିବାର ଖବର ପାଇ ତହସିଲଦାର ଏ ପି ଆର ପୋଲିସ ଚାରି ଜଣଙ୍କୁ ଧରି ଘଟଣା ସ୍ଥଳରେ ପହଞ୍ଚିଥିଲେ। ଗାଡ଼ିଦୁଇଟିର ଡ୍ରାଇଭର ପୋଲିସଙ୍କୁ ଦେଖି ଗାଡି ଦୁଇଟିକୁ ବାଘମାରି ଅଭିମୁଖେ ନେଇ ପଳାଇଯାଇଥିଲେ। ଏହାପରେ ତହସିଲଦାର ତାଙ୍କୁ ଅନୁସରଣ କରି ବାଘମାରିଠାରେ ଗଡ଼ିଦୁଇଟିକୁ ଜବତ କରିଥିଲେ। କିନ୍ତୁ ଗାଡି ଦୁଇଟିର ଡ୍ରାଇଭର ଏବଂ ମାଲିକ ଲୋକମାନଙ୍କୁ ଏକତ୍ରିତ କରି ତହସିଲଦାରଙ୍କୁ ଘେରି ଅଶ୍ଳୀଳ ଭାଷାରେ ଗାଳିଗୁଲଜ କରିଥିଲେ। ଏହିପରି ଅଧଘଣ୍ଟା ପାଟିତୁଣ୍ଡ ଲାଗି ରହିବା ପରେ ସେମାନେ ଜୋରଜବରଦସ୍ତ ବଳପୂର୍ବକ ଗାଡି ଦୁଇଟି ନେଇଯାଇଥିଲେ। ଏହା ସହିତ ଥାନାରେ ଅଭିଯୋଗ କଲେ ଜୀବନରେ ମାରିଦେବାପାଇଁ ଧମକ ଦେଇଥିଲେ ଏବଂ ତହସିଲଦାରଙ୍କ ଆସିବା ରାସ୍ତାକୁ ବନ୍ଦ କରି ଦେଇଥିଲେ। ଫଳରେ ତହସିଲଦାର ବାଧ୍ୟ ହୋଇ ବାଘମାରି ଥାନା ଅଧିକାରିଣୀଙ୍କୁ ଫୋନ କରିଥିଲେ। ଥାନା ଏସ ଆଇ ବ୍ରହ୍ମାନନ୍ଦ ସ୍ୱାଇଁ ଘଟଣାସ୍ଥଳକୁ ଯାଇ ତହସିଲଦାରଙ୍କୁ ଉଦ୍ଧାର କରିଥିଲେ । ଜଣେ କର୍ତ୍ତବ୍ୟରତ ଅଧିକାରୀଙ୍କୁ ଦୁର୍ବ୍ୟବହାର କରି ହତ୍ୟା ଧମକ ଦେବା ଏବଂ ଲୋକମେଳି କରି ବେଆଇନ ଭାବେ ପଥର ଚାଲାଣ କରୁଥିବା ଗାଡି ଦୁଇଟି ଛଡାଇ ନେବା ଅଭିଯୋଗରେ ଡ୍ରାଇଭର ଏବଂ ଗାଡିମାଲିକଙ୍କ ପ୍ରତି କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ବେଗୁନିଆ ତହସିଲଦାର ବାଘମାରି ଥାନାରେ ଅଭିଯୋଗ କରିଛନ୍ତି। ଏହାସହିତ ଜିଲ୍ଲାପାଳ ଏବଂ ଉପଜିଲ୍ଲାପାଳଙ୍କୁ ଲିଖିତ ଭାବେ ଜଣାଇଛନ୍ତି।
Comments are closed.