ବେଗୁନିଆ: ଖୋର୍ଦ୍ଧା ଜିଲ୍ଲା ବେଗୁନିଆ ବିଦ୍ୟୁତ ଉପଖଣ୍ଡରେ ଏବେ ନିତିଦିନ ବିନା ସୂଚନାରେ ବାରମ୍ବାର ବିଦ୍ୟୁତ କାଟ ଘଟଣା ସାଧାରଣରେ ଅସନ୍ତୋଷ ସୃଷ୍ଟି କରିଛିl କୌଣସି ପୂର୍ଵ ସୂଚନା ନ ଥାଇ ପ୍ରତିଦିନ ସକାଳୁ ସନ୍ଧ୍ୟା ଭିତରେ ବାରମ୍ବାର ବିଦ୍ୟୁତ କାଟ ହେଉଥିବା ଘଟଣା ସମ୍ପର୍କରେ ବିଦ୍ୟୁତ ବିଭାଗ ଏସଡ଼ିଓ ବିଜୟ କୁମାର ଲେଙ୍କାକୁ ପଚାରିବାରେ ସେ ବର୍ଷା ଯୋଗୁଁ ଏହା ହେଉଥିବା କହିଛନ୍ତିl
ଗତ ଜୁନ ୧ରୁ ବିଦ୍ୟୁତ ସେବାକୁ ଟାଟା ପାୱାରକୁ ହସ୍ତାନ୍ତର କରାଗଲା ପରେ ବିଦ୍ୟୁତ ଉପଭୋକ୍ତାମାନେ ସେବା ପାଇବାରୁ ବଂଚିତ ହେଉଛନ୍ତିl ଏମିତି କୌଣସି ଦିନ ନାହିଁ କେଉଁଦିନ ସକାଳୁ ବିନା ସୂଚନାରେ ବେଗୁନିଆ ଉପଖଣ୍ଡ ଅଧିନସ୍ଥ ଚାରଟି ସେକ୍ସନରେ ସକାଳୁ ରାତି ଭିତରେ ୧୦ରୁ ୧୫ ଥର ବିଦ୍ୟୁତ କାଟ ହେଉନାହିଁl ଗ୍ରାମାଂଚଳର ଅବସ୍ଥା ନ କହିବା ଭଲl ଚାଷୀଠାରୁ ଆରଂଭ କରି ବ୍ୟବସାୟୀ ପର୍ଯ୍ୟନ୍ତ ସ୍କୁଲଠାରୁ ଆରମ୍ଭ କରି ଗ୍ରାମ୍ୟ ପାନୀୟ ଜଳଯୋଗାଣ ପର୍ଯ୍ୟନ୍ତ ସବୁ ସ୍ତରରେ ଜନସାଧାରଣ ପ୍ରଭାବିତ ହେଉଛନ୍ତିl ଅନ୍ୟ ପକ୍ଷରେ ଏକାଥରକେ ଦୁଇ ମାସର ବିଲ ଦିଆ ଯିବା ଯୋଗୁଁ ଗ୍ରାହକମାନେ ହଇରାଣ ହେଉଥିବା ଜଣାପଡିଛିl
