ମାଦ୍ରିଦ୍ : ପର୍ତ୍ତୁଗାଲ୍ର ତାରକା ଷ୍ଟ୍ରାଇକର କ୍ରିଷ୍ଟିଆନୋ ରୋନାଲ୍ଡୋ ସ୍ପେନ୍ର ରିଅଲ୍ ମାଦ୍ରିଦ୍ ତରଫରୁ କ୍ଲବ ଫୁଟବଲ ଖେଳୁଥିବା ବେଳେ ତାଙ୍କୁ ଦଳରେ ସାମିଲ କରିବାକୁ ଇଟାଲୀର ପ୍ରଖ୍ୟାତ ଦଳ ଜୁଭେଣ୍ଟସ୍ ଆଗ୍ରହୀ ଥିବା ଜଣାପଡ଼ିଛି। ରୋନାଲ୍ଡୋଙ୍କୁ ଏ ସଂକ୍ରାନ୍ତରେ ଜୁଭେଣ୍ଟସ୍ ତରଫରୁ ପ୍ରସ୍ତାବ ଦିଆଯାଇଥିବା ବିଶ୍ୱସ୍ତ ସୂତ୍ରରୁ ଜଣାପଡ଼ିଛି।
ସୂଚନାଥାଉକି ୨୦୦୮ରେ ରୋନାଲଡୋଙ୍କୁ ଇଂଲଣ୍ଡର ମାଞ୍ଚେଷ୍ଟର ୟୁନାଇଟେଡ୍ ଦଳ ନିକଟରୁ ରିଅଲ୍ ମାଦ୍ରିଦ୍ ୧୦୫.୬୫ ନିୟୁତ ଡଲାରରେ କିଣିଥିଲା। ଇତିମଧ୍ୟରେ ରୋନାଲ୍ଡୋ ରିଅଲ୍ ମାଦ୍ରିଦ୍ ତରଫରୁ ୪୫୧ଟି ଗୋଲ୍ ସ୍କୋର କରି ସାରିଲେଣି। ସେ ରିଅଲ ମାଦ୍ରିଦ୍ ଦଳକୁ ଦୁଇଥର ଲା ଲିଗା ଓ ଚାରିଥର ଚମ୍ପିଆନ୍ସ ଲିଗ୍ ବିଜୟୀ କରାଇବାରେ ପ୍ରମୁଖ ଭୂମିକା ଗ୍ରହଣ କରିଥିଲେ। ତେବେ ଗତ କିଛିମାସ ହେବ ସେ ରିଅଲ ମାଦ୍ରିଦ୍ ଦଳ ଛାଡ଼ିବାକୁ ଚାହୁଁଥିବା ରୋନାଲ୍ଡୋ ସୂଚନା ଦେଇ ଆସୁଛନ୍ତି। ଗତ ମେ’ ୨୬ରେ ଲିଭରପୁଲ୍କୁ ପରାସ୍ତ କରି ରିଅଲ୍ ମାଦ୍ରିଦ୍ ଚମ୍ପିଆନ୍ସ ଲିଗ୍ ଜିତିଥିବା ପରେ ରୋନାଲ୍ଡୋ ଗଣମାଧ୍ୟମକୁ ସାକ୍ଷାତକାର ଦେଇ କହିଥିଲେ ସେ ରିଅଲ ମାଦ୍ରିଦ୍ ଛାଡ଼ି ଅନ୍ୟ କ୍ଲବ ତରଫରୁ ଖେଳିବାକୁ ଆଗ୍ରହୀ। ଏ ସଂପର୍କରେ ଗଣମାଧ୍ୟମକୁ ସୂଚନା ଦେଇ ସ୍ପେନ୍ର ଏକ ଖବରକାଗଜରେ ଉଲ୍ଲେଖ କରାଯାଇଛି ରୋନାଲ୍ଡୋଙ୍କ ଉତ୍ତରାଧିକାରୀ ଖୋଜିବାରେ ରିଅଲ ମାଦ୍ରିଦ୍ ବ୍ୟସ୍ତ ଅଛି। ଏହାକୁ ନେଇ ଅସନ୍ତୁଷ୍ଟ ରୋନାଲ୍ଡୋ ଏହି ଦଳ ଛାଡ଼ିବାକୁ ନିଷ୍ପତ୍ତି ନେଇଛନ୍ତି। କିଛିଦିନ ତଳେ ରିଅଲ ମାଦ୍ରିଦ୍ ସଭାପତି ଫ୍ଲୋରେଣ୍ଟିନୋ ପେରେଜ୍ ଗଣମାଧ୍ୟମକୁ ସୂଚନା ଦେଇ ବ୍ରାଜିଲ୍ର ତାରକା ଷ୍ଟ୍ରାଇକର ନିଏମାରଙ୍କୁ ଦଳରେ ସାମିଲ କରିବାକୁ ଚାହୁଁଥିବା ସୂଚନା ଦେଇଥିଲେ। ରୋନାଲ୍ଡୋ ରିଅଲ୍ ମାଦ୍ରିଦ୍ ଦଳ ଛାଡ଼ିବାକୁ ଆଗ୍ରହୀ ଥିବା ଜଣାପଡ଼ିବା ପରେ ଜୁଭେଣ୍ଟସ୍ ତରଫରୁ ତାଙ୍କୁ ନିଜ ଦଳରେ ସାମିଲ କରିବାକୁ ପ୍ରସ୍ତାବ ଦିଆଯାଇଛି।
