ଭୁବନେଶ୍ୱର: ବହୁ ଚର୍ଚ୍ଚିତ ସମାଜସେବୀ ଆଦିତ୍ୟ ଦାଶ ମୃତ୍ୟୁ ମାମଲାର ତଦନ୍ତ ଆରମ୍ଭ କରୁଥିବା କ୍ରାଇମବ୍ରାଞ୍ଚ ତାର ତଦନ୍ତ ପ୍ରକ୍ରିୟାକୁ ଜୋରଦାର କରିଛି । ଗତକାଲି ଏହି ଘଟଣାର ତଦନ୍ତ ଭାର ପାଇବା ପରେ କ୍ରାଇମବ୍ରାଞ୍ଚ ପ୍ରଥମେ ଭୁବନେଶ୍ଵର ଜିଆରପି ପୁଲିସ ଠାରୁ ସମସ୍ତ କାଗଜପତ୍ର ଆଣିବା ସହ ଲିଙ୍ଗରାଜ ଷ୍ଟେସନ ଯାଇ ଆଦିତ୍ୟଙ୍କ ମୃତଦେହ ପଡିଥିବା ସ୍ଥାନରେ ଛାନଭିନ୍ କରିଥିଲା । ଏହାପରେ କ୍ରାଇମବ୍ରାଞ୍ଚ ପକ୍ଷରୁ ଗତକାଲି ଆଦିତ୍ୟ କରିଥିବା ପିପୁଲ ଫର୍ ସେବାର ତିନି ସଦସ୍ୟ ପପୁ, ବିକାଶ ଓ ପ୍ରୀତମଙ୍କୁ ପଚରାଉଚରା କରିଥିଲା । ୧ ଘଣ୍ଟା ଧରି ପପୁ, ବିକାଶ ଓ ପ୍ରୀତମଙ୍କୁ କ୍ରାଇମବ୍ରାଞ୍ଚର ପଚରାଉଚରା କରିବା ପରେ ଛାଡିଥିଲା ।
ଏହାପରେ ଆଜି କ୍ରାଇମବ୍ରାଞ୍ଚ ପକ୍ଷରୁ ଆଦିତ୍ୟଙ୍କ ପତ୍ନୀ ବିଦ୍ୟାଶ୍ରୀ ଓ ଆଦିତ୍ୟଙ୍କ ପରିବାର ଲୋକଙ୍କୁ ଜେରା କରିବ ବୋଲି ଜଣାପଡିଛି । ମୃତ୍ୟୁକୁ ୨୪ ଦିନ ବିତିଯାଇଥିଲେ ସୁଦ୍ଧା ଏ ଯାଏଁ ଏହା ହତ୍ୟା କି ଆତ୍ମହତ୍ୟା ତାହା ସ୍ପଷ୍ଟ ହୋଇପାରୁନାହିଁ । ଯାହା ସମସ୍ତଙ୍କ ମନରେ ଏକ ସନ୍ଦେହ ସୃଷ୍ଟି କରୁଛି ।
ସୂଚନାଯୋଗ୍ୟ ବହୁଚର୍ଚ୍ଚିତ ସମାଜସେବୀ ଆଦିତ୍ୟ ଦାସଙ୍କ ମୃତ୍ୟୁ ମାମଲା ଏବେ ବି ରହସ୍ୟ ଘେରରେ ରହିଛି । ସେ ଆତ୍ମହତ୍ୟା କରିଛନ୍ତି ନା ତାଙ୍କୁ ହତ୍ୟା କରାଯାଇଛି ସେନେଇ ଖୋଳତାଡ଼ ଜାରିରହିଛି । ଇତିମଧ୍ୟରେ ଅନେକ ଲୋକଙ୍କୁ ଜେରା କରାଯାଇଥିଲେବି ରହସ୍ୟର ପେଡ଼ି ଖୋଲିପାରୁନାହିଁ । ଅପରପକ୍ଷରେ ଏହାର ଉଚ୍ଚସ୍ତରୀୟ ତଦନ୍ତ ପାଇଁ ବିଭିନ୍ନ ମହଲରେ ଦାବି ହୋଇଆସୁଥିଲା । ଏହି ଘଟଣାରେ ଉଚ୍ଚ ସ୍ଥରୀୟ ତଦନ୍ତ ପାଇଁ କେନ୍ଦ୍ରମନ୍ତ୍ରୀ ପ୍ରତାପ ଷଡଙ୍ଗୀ ମଧ୍ୟ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଚିଠି ଲେଖିଥିଲେ। ଏହା ସହ ସାମଜିକ ଗଣାମଧ୍ୟମରେ ଆଦିତ୍ୟଙ୍କ ବନ୍ଧୁ ଓ ପ୍ରଶଂସକମାନେ ମଧ୍ୟ ଘଟଣାର ଉଚ୍ଚସ୍ତରୀୟ ତଦନ୍ତ ଦାବି କରିଆସୁଥିଲେ । ଫଳରେ ଗତକାଲି ରାଜ୍ୟ ସରକାର ଆଦିତ୍ୟ ଦାସଙ୍କ ମୃତ୍ୟୁ ମାମଲାର ତଦନ୍ତ ଭାର କ୍ରାଇମବ୍ରାଞ୍ଚକୁ ପ୍ରଦାନ କରିଥିଲେ । ଏନେଇ ଗୁରୁବାର ସକାଳେ ପୁଲିସ ମହାନିର୍ଦେଶକ ଅଭୟ ଟ୍ବିଟ ଯୋଗେ ସୂଚନା ଦେଇଥିଲେ। ପୂର୍ବରୁ ଜିଆରପି ପୁଲିସ ଏହାର ତଦନ୍ତ କରୁଥିବାବେଳେ କ୍ରାଇମବ୍ରାଞ୍ଚ ତଦନ୍ତରୁ ସତ ମିଛର ପର୍ଦ୍ଧାଫାଶ ହେବବୋଲି ଆଦିତ୍ୟଙ୍କ ବନ୍ଧୁ ଓ ପ୍ରଶଂସକମାନେ ଆଶ ବାନ୍ଧି ବସିଛନ୍ତି ।
