ନୂଆଦିଲ୍ଲୀ: ରାଜସ୍ଥାନ ଉଚ୍ଚ ନ୍ୟାୟାଳୟ ସଚିନ ପାଇଲଟ୍ ଓ ତାଙ୍କ ସମର୍ଥକ ବିଧାୟକଙ୍କ ବିରୋଧରେ କାର୍ଯ୍ୟାନୁଷ୍ଠାନ ମାମଲାରେ ଲଗାଇଥିବା ରହିତାଦେଶ ବିରୋଧରେ ସୁପ୍ରିମକୋର୍ଟରେ ପହଞ୍ଚିଛନ୍ତି ବିଧାନସଭା ବାଚସ୍ପତି । ଏହି ମାମଲାର ତତ୍କାଳ ଶୁଣାଣି ପାଇଁ ଆବେଦନ କରିଛନ୍ତି । ମାତ୍ର ସୁପ୍ରିମକୋର୍ଟ ଏହି ମାମଲାର ତୁରନ୍ତ ଶୁଣାଣି ନିମନ୍ତେ ସ୍ପଷ୍ଟ ମନା କରିଦେଇଛନ୍ତି ।
ବିଧାନସଭା ବାଚସ୍ପତିଙ୍କ ପକ୍ଷରୁ ବରିଷ୍ଠ ଆଇନଜୀବୀ କପିଲ ସିବ୍ବଲ ବୁଧବାର ମୁଖ୍ୟ ବିଚାରପତି ଏସ୍.ଏ.ବୋବଡ଼େଙ୍କ ନିକଟରେ ମାମଲାର ତତ୍କାଳ ଶୁଣାଣି ନିମନ୍ତେ ଆବେଦନ କରିଥିଲେ । ମାତ୍ର ମୁଖ୍ୟ ବିଚାରପତି ଏହି ଅପିଲକୁ ଖାରଜ କରି ମାମଲା ପଞ୍ଜିକରଣ କରାଯିବା ପରେ ଏହାର ଶୁଣାଣି ହେବ ବୋଲି ମତ ଦେଇଛନ୍ତି ।
ରାଜସ୍ଥାନ ବିଧାନସଭା ବାଚସ୍ପତି ଉଚ୍ଚ ନ୍ୟାୟାଳୟର ସେହି ଆଦେଶକୁ ଚ୍ୟାଲେଞ୍ଜ କରିଛନ୍ତି, ଯେଉଁ ଆଦେଶରେ ସଚିନ ପାଇଲଟ୍ ଓ ତାଙ୍କ ଗୋଷ୍ଠୀର ୧୮ ବିଧାୟକଙ୍କ ଉପରେ ବାଚସ୍ପତିଙ୍କ କାର୍ଯ୍ୟାନୁଷ୍ଠାନ ଉପରେ ରହିତାଦେଶ ଜାରି କରାଯାଇଛି । ଏଥିରେ କୁହାଯାଇଛି ଯେ ବିଧାୟକମାନଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରିବା କେବଳ ବାଚସ୍ପତିଙ୍କର ହକ୍ । ଏଥିରେ ନ୍ୟାୟପାଳିକା ହସ୍ତକ୍ଷେପ କରିପାରିବ ନାହିଁ ।ତେଣୁ ସେ ଏହା ଉପରେ ତୁରନ୍ତ ଶୁଣାଣି ନିମନ୍ତେ ଆବେଦନ କରିବା ସହ ଏହି ମଧ୍ୟବର୍ତୀକାଳୀଳ ଆଦେଶ ଉପରେ ପ୍ରତିବନ୍ଧକ ଲଗାଇବାକୁ ଆବେଦନ କରିଛନ୍ତି । ଏଥିରେ ସୁପ୍ରିମକୋର୍ଟର କିଛି ପୁରୁଣା ମାମଲାର ରାୟକୁ ମଧ୍ୟ ସଂଲଗ୍ନ କରାଯାଇଛି । ଏହି ରାୟରେ ସୁପ୍ରିମକୋର୍ଟ କହିଥିଲେ ଯେ ଯେ ପର୍ଯ୍ୟନ୍ତ କୌଣସି ବିଧାୟକ/ସାଂସଦଙ୍କ ଅଯୋଗ୍ୟତା ପ୍ରକ୍ରିୟା ସମ୍ପୂର୍ଣ୍ଣ ନ ହୋଇଛି ସେ ପର୍ଯ୍ୟନ୍ତ ଅଧ୍ୟକ୍ଷ (ଗୃହ)ଙ୍କ କାର୍ଯ୍ୟରେ ନ୍ୟାୟାଳୟ ହସ୍ତକ୍ଷେପ କରିପାରିବ ନାହିଁ ।
