ଚୀନର ଉହାନ ସହର କରୋନାର ଉତ୍ପତ୍ତିସ୍ଥଳ ବୋଲି କୁହାଯାଉଛି । ଚୀନରେ କରୋନା ବ୍ୟାପିବା ନେଇ ସୂଚନା ଗୋପନ ରଖିବା ନେଇ ବିିଭିନ୍ନ ଦେଶ ଅଭିଯୋଗ କରୁଛନ୍ତି । ଏପରି କ୍ଷେତ୍ରରେ ପ୍ରଥମଥର ପାଇଁ ବିଶ୍ବ ସ୍ବାସ୍ଥ୍ୟ ସଙ୍ଗଠନ ଚୀନ ବିପକ୍ଷରେ ନିଜର ମତ ଦେଇଛି । ଚୀନ କରୋନା ସଂକ୍ରାନ୍ତ ସୂଚନା ବିଶ୍ବ ସ୍ବାସ୍ଥ୍ୟ ସଙ୍ଗଠନକୁ ଦେଇ ନ ଥିଲା; ବରଂ ସ୍ବାସ୍ଥ୍ୟ ସଙ୍ଗଠନର ଚୀନ କାର୍ଯ୍ୟାଳୟରୁ ଏ ସମ୍ପର୍କରେ କେନ୍ଦ୍ରୀୟ ଅନୁଷ୍ଠାନକୁ ସୂଚନା ଦିଆଯାଇଥିଲା ବୋଲି କୁହାଯାଇଛି ।
କରୋନା ଉତ୍ପତ୍ତି ଓ ବ୍ୟାପକତାକୁ ନେଇ ସାରା ବିଶ୍ବ ଚୀନକୁ ଅଙ୍ଗୁଳି ନିର୍ଦେଶ କରୁଛି । ବିଶ୍ବ ସ୍ବାସ୍ଥ୍ୟ ସଙ୍ଗଠନର ଭୂମିକାକୁ ନେଇ ମଧ୍ୟ ସମାଲୋଚନା ହୋଇଛି । ପ୍ରଥମେ ବିଶ୍ବ ସ୍ବାସ୍ଥ୍ୟ ସଙ୍ଗଠନ ଚୀନ କରୋନା ସଂକ୍ରାନ୍ତରେ ୩୧ ଡ଼ିସେମ୍ବର ୨୦୧୯ରେ ଦେଇଥିବା କହି ଆସୁଥିଲା । ମାତ୍ର ବିଶ୍ବ ସ୍ବାସ୍ଥ୍ୟ ସଙ୍ଗଠନର ୱେବସାଇଟରେ ଏହି ମହାମାରୀର ଟାଇମଲାଇନ୍ ଅପଡ଼େଟ୍ ହୋଇଛି ଏବଂ ଏହା ଏକ ନୂଆ ବିବାଦ ସୃଷ୍ଟି କରିଛି ।
ବିଶ୍ବ ସ୍ବାସ୍ଥ୍ୟ ସଙ୍ଗଠନର ୟୁ-ଟର୍ଣ୍ଣ
ବର୍ତମାନ ବିଶ୍ବ ସ୍ବାସ୍ଥ୍ୟ ସଙ୍ଗଠନର ଟାଇମଲାଇନ ଅନୁସାରେ ଚୀନରେ ଥିବା ସ୍ବାସ୍ଥ୍ୟ ସଙ୍ଗଠନର କଣ୍ଟ୍ରି ଅଫିସକୁ ଉହାନର କରୋନା ସଂକ୍ରାନ୍ତ ସୂଚନା ମିଳିଥିଲା । ଗଣମାଧ୍ୟମରେ ଉହାନ ନଗରପାଳିକା ସ୍ବାସ୍ଥ୍ୟ ଆୟୋଗ ସୂଚନା ଅନୁସାରେ ‘ ନିମୋନିଆ ଭୂତାଣୁ’ ସମ୍ପର୍କରେ ଖବର ଜଣାପଡ଼ିଥିଲା । ଟାଇମଲାଇନରେ ସ୍ପଷ୍ଟ ଉଲ୍ଲେଖ ଅଛି ଯେ ଚୀନ ସରକାରୀ ଭାବରେ ୨୦୧୯ ଡ଼ିସେମ୍ବର ୩୧ ପର୍ଯ୍ୟନ୍ତ ବିଶ୍ବ ସ୍ବାସ୍ଥ୍ୟ ସଙ୍ଗଠନକୁ ଏ ସମ୍ପର୍କରେ କୌଣସି ବିଧିବଦ୍ଧ ସୂଚନା ଦେଇ ନ ଥିଲା ।
୯ ଏପ୍ରିଲରେ ବିଶ୍ବ ସ୍ବାସ୍ଥ୍ୟ ସଙ୍ଗଠନ ଟାଇମଲାଇନ
କରୋନା ମହାମାରୀ ସମ୍ପର୍କରେ ବିଶ୍ବ ସ୍ବାସ୍ଥ୍ୟ ସଙ୍ଗଠନ ପ୍ରାରମ୍ଭିକ ଭାବରେ ଏପ୍ରିଲ ୯ ତାରିଖରେ ଟାଇମଲାଇନ ଜାରି କରିଥିଲା । ଏଥିରେ କେବଳ ଏତିକି କୁହାଯାଇଥିଲା ଯେ ହୁବେଇ ପ୍ରାନ୍ତର ଉହାନ ସହରର ସ୍ବାସ୍ଥ୍ୟ କମିଶନ ୩୧ ଡ଼ିସେମ୍ବରରେ ନିମୋନିଆ ମାମଲାର ସୂଚନା ଦେଇଥିଲେ ।
୩୧ ଡ଼ିସେମ୍ବରରେ ଭାଇରାଲ ନିମୋନିଆ ସୂଚନା
ବିଶ୍ବସ୍ବାସ୍ଥ୍ୟ ସଙ୍ଗଠନ ନିର୍ଦେଶକ ଟି.ଏ.ଘେବି୍ରୟସ ସାମ୍ବାଦିକ ସମ୍ମିଳନୀରେ କହିଥିଲେ ଯେ ଚୀନରୁ ପ୍ରଥମ ରିପୋର୍ଟ ୨୦ ଏପ୍ରିଲରେ ଆସିଥିଲା । ତେବେ ଏହି ରିପୋର୍ଟ ଚୀନ ଅଧିକାରୀମାନେ ପଠାଇଥିଲେ ନା ଅନ୍ୟ ସୂତ୍ରରୁଆସିଥିଲା ସେ ସମ୍ପର୍କରେ ସେ କିଛି କହି ନ ଥିଲେ । ମାତ୍ର ଚଳିତ ସପ୍ତାହରେ ବିଶ୍ବ ସ୍ବାସ୍ଥ୍ୟ ସଙ୍ଗଠନ କରୋନାର ଘଟଣାକ୍ରମ ନେଇ ଏକ ନୂଆ ରିପୋର୍ଟ ପ୍ରକାଶ କରିଛି । ଏଥିରେ କରୋନା ସଂକ୍ରାନ୍ତରେ ବିସ୍ତୃତ ବର୍ଣନା ରହିଛି । ଚୀନରେ ଥିବା ବିଶ୍ବ ସ୍ବାସ୍ଥ୍ୟ ସଙ୍ଗଠନର କଣ୍ଟ୍ରି ଅଫିସ ୩୧ ଡ଼ିସେମ୍ବରରେ ଭାଇରାଲ ନିମୋନିଆ ସମ୍ପର୍କରେ ସୂଚନା ଦେଇଥିବା ଉଲ୍ଲେଖ କରିଛି ।
