ନୂଆଦିଲ୍ଲୀ: ଲଦାଖର ଗଲୱାନ ଭ୍ୟାଲିରେ ଭାରତ ଓ ଚୀନ ସୈନ୍ୟଙ୍କ ମଧ୍ୟରେ ଘଟିଥିବା ସଂଘର୍ଷ ପରେ ନୂଆ ନୂଆ ତଥ୍ୟ ସାମ୍ନାକୁ ଆସୁଛି। ଏହି ଆକ୍ରମଣ ପାଇଁ କିପରି ଚୀନ ଷଡ଼ଯନ୍ତ୍ର କରିଥିଲା ତାହା ଧୀରେ ଧୀରେ ପଦାକୁ ଆସୁଛି। ଭାରତୀୟ ସୈନ୍ୟଙ୍କ ଉପରେ ଆକ୍ରମଣ କରିବା ଲାଗି ଚୀନ ସରକାର ହିଁ ତାଙ୍କ ସୈନ୍ୟମାନଙ୍କୁ ଆଦେଶ ଦେଇଥିଲେ ବୋଲି ଆମେରିକୀୟ ଗୁଇନ୍ଦା ରିପୋର୍ଟରେ ଦର୍ଶାଯାଇଛି। ଏହି ସଂଘର୍ଷ ପରେ ଦୁଇ ଦେଶ ମଧ୍ୟରେ ଉତ୍ତେଜନା ବୃଦ୍ଧି ପାଇଛି ବୋଲି ରିପୋର୍ଟରେ କୁହାଯାଇଛି। ଚୀନର ଅନେକ ସୈନ୍ୟ ଏହି ସଂଘର୍ଷରେ ପ୍ରାଣ ହରାଇଥିବା ରିପୋର୍ଟରେ ସ୍ପଷ୍ଟ କରାଯାଇଛି।
ଆମେରିକୀୟ ଗୁଇନ୍ଦା ରିପୋର୍ଟରେ ଦର୍ଶାଯାଇଛି ଯେ, ଉଲ୍ଲେଖନୀୟ ଭାବେ ଚୀନ କମ୍ୟୁନିଷ୍ଟ ପାର୍ଟିର ମୁଖପତ୍ର ଗ୍ଲୋବାଲ ଟାଇମ୍ସ ଗତ ସୋମବାର ଭାରତୀୟ ସୈନ୍ୟଙ୍କ ସହିତ ସଂଘର୍ଷରେ ଚୀନର ୨୦ରୁ କମ୍ ସୈନ୍ୟ ପ୍ରାଣ ହରାଇଥିବା ଦର୍ଶାଇଥିଲା। ଚୀନ ବିଶେଷଜ୍ଞମାନଙ୍କ ମତକୁ ଆଧାର କରି ଗ୍ଲୋବାଲ ଟାଇମ୍ସ ଉଲ୍ଲେଖ କରିଥିଲା ଯେ ଚୀନ ସୈନ୍ୟଙ୍କ ମୃତ୍ୟୁ ସଂଖ୍ୟା ପ୍ରକାଶ ନ କରିବା ପଛର କାରଣ ହେଉଛି ବେଜିଂ ଦୁଇ ଦେଶ ମଧ୍ୟରେ ଉତ୍ତେଜନା ଏଡ଼ାଇବାକୁ ଚାହୁଁଛି। ତେବେ ଭାରତ ସରକାର ପୁଣି ଥରେ ଯେପରି ଚାପରେ ରହିବେ ସେଥିଲାଗି ଚୀନ ତା’ର ୨୦ରୁ କମ୍ ସୈନ୍ୟ ପ୍ରାଣ ହରାଇଛନ୍ତି ବୋଲି କହୁଥିବା ଗୁଇନ୍ଦା ରିପୋର୍ଟରେ ଦର୍ଶାଯାଇଛି।
ସୂଚନାଯୋଗ୍ୟ, ଗତ ୧୫ ତାରିଖ ରାତିରେ ଲଦାଖର ଗଲୱାନ ଘାଟିରେ ଭାରତ ଓ ଚୀନ ସୈନ୍ୟଙ୍କ ମଧ୍ୟରେ ଘଟିଥିବା ସଂଘର୍ଷରେ ୨୦ ଭାରତୀୟ ଯବାନ ଶହୀଦ ହୋଇଥିଲେ। ଚୀନର ୩୫ରୁ ଅଧିକ ସୈନ୍ୟ ନିହତ ହୋଇଥିବା ପିଟିଆଇ ସୂତ୍ରରୁ କୁହାଯାଇଥିଲା।
