ପୁରୀ : ବିକ୍ରି ହେଉଛି ଦାରୁବ୍ରହ୍ମଙ୍କ ସ୍ନାନଜଳ। କେତେକ ସେବକ କାଚ ବୋତଲରେ ସ୍ନାନଜଳ ଭର୍ତ୍ତିକରି ଆଗ୍ରହୀ ବ୍ୟକ୍ତିଙ୍କୁ ବିକ୍ରି କରୁଥିବା ଅଭିଯୋଗ ହୋଇଛି। ସ୍ନାନପୂର୍ଣ୍ଣିମା ତିଥିରେ ସ୍ନାନମଣ୍ଡପରେ ମହାପ୍ରଭୁଙ୍କୁ ସ୍ନାନପାଇଁ ସୁନାକୂଅରୁ ସଂଗୃହୀତ ଜଳ ବାହାରେ ବିକ୍ରିହେବା ଘଟଣା ଶ୍ରୀଜଗନ୍ନାଥପ୍ରେମୀଙ୍କ ମଧ୍ୟରେ ଆଲୋଡ଼ନ ସୃଷ୍ଟି କରିଛି। କେତେକ ସେବକ ଅଧାଜଳ ଶ୍ରୀଜୀଉଙ୍କ ସ୍ନାନପାଇଁ ରୁପାପିଙ୍ଗଣରେ ଦେଇ ଆଉ ଅଧେ ଗଡୁରେ ଘରକୁ ନେଇଥିବା କୁହାଯାଉଛି। ଚୁଆ, ଚନ୍ଦନ, କର୍ପୂର, କେଶର ମିଶ୍ରିତ ସ୍ନାନଜଳ ଏବେ ବାହାରେ ବୁଲୁଛି। ଏହାଦ୍ବାରା ଶାସ୍ତ୍ରୀୟ ବିଧିବ୍ୟବସ୍ଥା ଉଲ୍ଲଙ୍ଘନ ହୋଇଥିବା କେତେକ ଗବେଷକ ମତ ଦେଇଛନ୍ତି। ପରମ୍ପରା ଅନୁଯାୟୀ ଉତ୍ତରଦ୍ବାର ନିକଟସ୍ଥ ଶୀତଳାଙ୍କ ମନ୍ଦିର ସମ୍ମୁଖରେ ଥିବା ସୁନାକୂଅରୁ ଶ୍ରୀଜୀଉଙ୍କ ସ୍ନାନପାଇଁ ୧୦୮ଗଡୁ ଜଳ ଅଣାଯାଏ। ସ୍ନାନପୂର୍ଣ୍ଣିମା ଦିନ ପୂଜାପଣ୍ଡା ସେବକ ସୁନାକୂଅ ଜଳ ସଂସ୍କାର କରନ୍ତି। ଜଳଲାଗି ସମୟରେ ହୋଇଥିବା ସ୍ନାନଜଳ ସଂଗ୍ରହରେ ଚଳିତବର୍ଷ ବ୍ୟତିକ୍ରମ କରାଯାଇଥିବା ଅଭିଯୋଗ ହୋଇଛି। ଶ୍ରୀଜୀଉଙ୍କ ସ୍ନାନପାଇଁ ଉଦ୍ଦିଷ୍ଟ ଜଳରେ ଆଉକିଛି ଜଳ ମିଶାଇ କେତେକ ସେବକ ତାହାକୁ ବିକ୍ରି କରୁଥିବା ଜଣାପଡିଛି। ଏ ସମ୍ପର୍କରେ ଶ୍ରୀମନ୍ଦିର ନୀତି ପ୍ରଶାସକଙ୍କ ମତାମତ ପାଇଁ ତାଙ୍କ ମୋବାଇଲ ଫୋନରେ ଯୋଗାଯୋଗ କରାଯାଇଥିଲେ ମଧ୍ୟ ତାହା ସମ୍ଭବପର ହୋଇନାହିଁ। ସ୍ନାନଜଳ ବିକ୍ରି ଅଭିଯୋଗ ସମ୍ପର୍କରେ ଶ୍ରୀମନ୍ଦିର ଗରାବଡୁ ନିଯୋଗ ସମ୍ପାଦକ ରଜତ କୁମାର ପ୍ରତିହାରୀଙ୍କୁ ପଚାରିବାରୁ ଏହା କପୋଳକଳ୍ପିତ ଏବଂ ଭିତ୍ତିହୀନ ବୋଲି ସେ ମତ ଦେଇଛନ୍ତି।
Popular Categories
Previous article
Next article