ବାରିପଦା: ବାରିପଦାଠାରୁ ୧୨ କି.ମି ଦୂର ଚାନ୍ଦୁଆ ଥାନା ଇଲାକା ମାଙ୍କଡକେନ୍ଦା ଗ୍ରାମରେ ଘଟିଥିବା ହତ୍ୟାକାଣ୍ଡରେ ପର୍ଦ୍ଦାଫାସ ହୋଇଛି । ଏହି ଘଟଣାରେ ମୃତକଙ୍କ ଦୁଇ ସାବତ ଭାଇ ସମେତ ୪ ଜଣ ଗିରଫ ହୋଇ ଜେଲ ଯାଇଛନ୍ତି । ସେମାନେ ହେଲେ ଦୁଇ ସାବତ ଭାଇ ଶିବ ସିଂ ଓ ଧୁନ ସିଂଙ୍କ ସହିତ ହତ୍ୟା ଘଟାଇଥିବା ଅଭିଯୁକ୍ତ ଶୁଳିଆପଦା ଥାନା ଇଲାକାର ପଣ୍ଡୁଶୋଳ ଗ୍ରାମର ବିବେକାନନ୍ଦ ହାଁସଦା ଓ ସାଥୀ ଅଭିଯୁକ୍ତ ମାରାଂତାଣ୍ଡି ଗ୍ରାମ ଦାସ୍ମତ ମାର୍ଣ୍ଡି ବୋଲି ପୁଲିସ ସୂତ୍ରରୁ ପ୍ରକାଶ ।
ସୂଚନାଯୋଗ୍ୟ, ମଙ୍ଗଳବାର ଦିନ ଘରୋଇ କଳିକୁ ନେଇ ଗୁଣି ଗାରେଡି କରୁଥିବା ସନ୍ଦେହରେ ସନୁ ସିଂ(୩୫)ଙ୍କୁ ଧାରୁଆ ଅସ୍ତ୍ର ସାହାଯ୍ୟରେ ହତ୍ୟା କରାଯାଇଥିଲା । ଯୋଜନା ଅନୁଯାୟୀ ମୃତକଙ୍କ ସାବତ ଭାଇ ମୁଖ୍ୟ ଅଭିଯୁକ୍ତ ଶିବ ସିଂ ଏହି ହତ୍ୟା କାଣ୍ଡ ସକାଶେ ୧୮ ହଜାର ଟଙ୍କା ଦେଇ ଶୁଳିଆପଦା ଥାନା ଇଲାକାର ପଣ୍ଡୁଶୋଳ ଗ୍ରାମର ବିବେକାନନ୍ଦ ହାଁସଦାଙ୍କୁ ନିୟୋଜିତ କରିଥିଲା । ହତ୍ୟାକାଣ୍ଡରେ ବ୍ୟବହାର କରାଯାଇଥିବା ଧାରୁଆ ଅସ୍ତ୍ର ରକ୍ତାକ୍ତ କଟୁରୀକୁ ପୁଲିସ ମୁଖ୍ୟ ଅଭିଯୁକ୍ତ ଶିବ ସିଂଙ୍କ ଘରୁ ଜବତ କରିଛି । ଏହି ହତ୍ୟାକାଣ୍ଡରେ ଗିରଫ ହୋଇଥିବା ଚାରି ଅଭିଯୁକ୍ତଙ୍କୁ ଚାନ୍ଦୁଆ ଥାନା ପୁଲିସ ଦ୍ୱାରା ଶନିବାର ଦିନ ବାରିପଦା କୋର୍ଟକୁ ଚାଲାଣ କରାଯିବା ପରେ ବାରିପଦା ଜେଲ ହାଜତକୁ ପଠାଇ ଦିଆଯାଇଥିବା ଜଣାଯାଇଛି ।
