ମେକ୍ସିକୋ ସିଟି : ଚୀନର ଉହାନ ସହରରୁ ସୃଷ୍ଟି ହୋଇଥିବା କୋଭିଡ଼-୧୯ ମହାମାରୀ ସାରା ବିଶ୍ବରେ ଆତଙ୍କ ସୃଷ୍ଟି କରିଛି। ଯାହାଦ୍ବାରା କରୋନା ଆକ୍ରାନ୍ତଙ୍କ ସଂଖ୍ୟା ଦ୍ରୁତ ଗତିରେ ବୃଦ୍ଧି ପାଉଥିବା ବେଳେ ମୃତ୍ୟୁ ସଂଖ୍ୟା ମଧ୍ୟ ବଢିବାରେ ଲାଗିଛି। ଏନେଇ ମେକ୍ସିକୋ ଭଳି ଦେଶରେ ମଧ୍ୟ ଜରୁରୀକାଳୀନ ପରିସ୍ଥିତି ସୃଷ୍ଟି ହୋଇଛି। ଏହାକୁ ଦୃଷ୍ଟିରେ ରଖି ମେକ୍ସିକୋ ସରକାର ଦେଶରେ କରୋନା ନାମରେ ଥିବା ବିୟରର ଉତ୍ପାଦନକୁ ସ୍ଥଗିତ ରଖିଛନ୍ତି। ମେକ୍ସିକୋ ସରକାରଙ୍କ ନିର୍ଦ୍ଦେଶ ଅନୁଯାୟୀ ଏହି ପଦକ୍ଷେପ ନିଆଯାଇଥିବା ଜଣାପଡ଼ିଛି।
କରୋନା ବିୟର କମ୍ପାନୀ ପକ୍ଷରୁ ଏକ ବିବୃତ୍ତିରେ କୁହାଯାଇଛି ଯେ, ଆମେ ଆମର କାରଖାନାରେ ଉତ୍ପାଦନ ବିୟରକୁ ସର୍ବନିମ୍ନ ସ୍ତରରେ ହ୍ରାସ କରିବା ପ୍ରକ୍ରିୟା ଆରମ୍ଭ କରିଛୁ। ସେହିଭଳି ମେକ୍ସିକୋ ସରକାର କହିଛନ୍ତି ଯେ, ଏଭଳି ଘଡ଼ିସନ୍ଧି ମୁହୂର୍ତ୍ତରେ କେବଳ କୃଷି ବ୍ୟବସାୟ ଭଳି ପ୍ରମୁଖ କ୍ଷେତ୍ରର କାର୍ଯ୍ୟ ହିଁ ଜାରି ରହିବ।
ମେକ୍ସିକୋରେ ବର୍ତ୍ତମାନ ସୁଦ୍ଧା ୧୫୦୦ରୁ ଅଧିକ ଲୋକ କରୋନା ଭାଇରସରେ ଆକ୍ରାନ୍ତ ହୋଇଥିବା ବେଳେ ୫୦ ଜଣଙ୍କର ମୃତ୍ୟୁ ଘଟିଥିବା ସୂଚନା ମିଳିଛି।
