ନୂଆଦିଲ୍ଲୀ : ଆସନ୍ତାକାଲିଠାରୁ ନ୍ୟୁଜିଲାଣ୍ଡର ହେଗଲି ଓଭାଲ କ୍ରିକେଟ୍ ଷ୍ଟାଡିୟମରେ ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ଦୁଇ ମ୍ୟାଚ ବିଶିଷ୍ଟ ଟେଷ୍ଟ ସିରିଜର ଦ୍ବିତୀୟ ମ୍ୟାଚ ଖେଳାଯିବ। ଏହି ମ୍ୟାଚ ପୂର୍ବରୁ ଟିମ୍ ଇଣ୍ଡିଆର ମୁଖ୍ୟ ପ୍ରଶିକ୍ଷକ ରବି ଶାସ୍ତ୍ରୀ ଖେଳାଳିମାନଙ୍କୁ ଉତ୍ସାହିତ କରିଛନ୍ତି। ଟିମ୍ ଇଣ୍ଡିଆର ମନୋବଳ ଦୃଢ ପାଇଁ ରବି ଶାସ୍ତ୍ରୀ କହିଛନ୍ତି, ମାନସିକତାରେ ପରିବର୍ତ୍ତନ ପାଇଁ ପରାଜୟର ସ୍ବାଦ ଚାଖିବା ନିହାତି ଜରୁରୀ। ମ୍ୟାଚ୍ ହାରିବା ଫଳରେ ଟିମକୁ ବହୁତ କିଛି ସିଖିବାକୁ ମିଳେ। ଆଗକୁ କିଭଳି ଏହାର ପୁନରାବୃତ୍ତି ନହେବ ସେଥିପାଇଁ ପ୍ରସ୍ତୁତ ରହିବା ଆବଶ୍ୟକ ବୋଲି ଶାସ୍ତ୍ରୀ କହିଛନ୍ତି।
ଉଲ୍ଲେଖ ଯୋଗ୍ୟ, ନ୍ୟୁଜିଲାଣ୍ଡ ଗସ୍ତରେ ଯାଇଥିବା ଭାରତୀୟ ଦଳ ସିରିଜ ଆରମ୍ଭରୁ ଭଲ ପ୍ରଦର୍ଶନ କରିଥିଲା। ପ୍ରଥମେ ୫ଟିକିଆ ଟ୍ବେଣ୍ଟି-୨୦ ସିରିଜରେ ଘରୋଇ ଦଳକୁ ୫-୦ରେ ପରାସ୍ତ କରି କ୍ଲିନ ସୁଇପରୁ ବିଜୟ ଅଭିଯାନ ଆରମ୍ଭ କରିଥିଲା। ତେବେ ପରେ ଖେଳାଯାଇଥିବା ତିନି ମ୍ୟାଚ୍ ବିଶିଷ୍ଟ ଏକଦିବସୀୟ ମ୍ୟାଚରେ ଘରୋଇ ଦଳ ଟିମ୍ ଇଣ୍ଡିଆକୁ ୩-୦ରେ ପରାସ୍ତ କରିଥିଲା। ଏହାପରେ ଖେଳାଯାଇଥିବା ଦୁଇ ମ୍ୟାଚ ବିଶିଷ୍ଟ ଟେଷ୍ଟ ସିରିଜର ପ୍ରଥମ ମ୍ୟାଚରେ ମଧ୍ୟ ନ୍ୟୁଜିଲାଣ୍ଡଠାରୁ ଟିମ୍ ଇଣ୍ଡିଆ ୧୦ୱିକେଟରେ ପରାସ୍ତ ହୋଇଥିଲା। ତେବେ ଆସନ୍ତାକାଲିଠାରୁ ଦ୍ବିତୀୟ ଟେଷ୍ଟ ମ୍ୟାଚ ଖେଳାଯିବ।
