ଭୁବନେଶ୍ବର/ବ୍ରହ୍ମପୁର/ବାଲେଶ୍ବର: ଫେବୃଆରୀ ଦ୍ବିତୀୟ ରବିବାର ଅଶୁଭ ସାବ୍ୟସ୍ତ ହୋଇଛି।୧୧ କେଭି ବିଦ୍ୟୁତ୍ ତାର ଲାଗି ଗୋଟିଏ ଦିନରେ ରାଜ୍ୟର ପୃଥକ ପୃଥକ ସ୍ଥାନରେ ୨ଟି ଦୁର୍ଘଟଣା ଘଟିଛି। ଗୋଟିଏ ଦୁର୍ଘଟଣାରେ ୯ ଜଣଙ୍କ ମୃତ୍ୟୁ ଘଟିଥିବା ବେଳେ ଅନ୍ୟ ଏକ ଦୁର୍ଘଟଣାରେ ସୌଭାଗ୍ୟବଶତଃ କାହାର ପ୍ରାଣହାନୀ ଘଟିନାହିଁ।
ରବିବାର ଅପରାହ୍ନରେ ଗଞ୍ଜାମ ଜିଲା ଗୋଳନ୍ଥରା ଥାନା ଅନ୍ତର୍ଗତ ଟୁଲୁ ରାସ୍ତାରେ ୧୧ କେଭି ବିଦ୍ୟୁତ୍ ତାର ଲାଗି ଏକ ବସ ଜଳିଯାଇଛି। ଫଳରେ ଏକ ନିର୍ବନ୍ଧ ଉତ୍ସବରେ ଯୋଗ ଦେବାକୁ ଯାଉଥିବା ତେଲୁଗୁ ସମ୍ପ୍ରଦାୟର ୯ ଜଣଙ୍କ ମୃତ୍ୟୁ ହୋଇଛି। ଘଟଣାସ୍ଥଳରେ ୬ ଜଣଙ୍କ ମୃତ୍ୟୁ ଘଟିଥିବା ବେଳେ ଏମକେସିଜି ମେଡିକାଲରେ ଅନ୍ୟ ୩ ଜଣଙ୍କ ମୃତ୍ୟୁ ଘଟିଛି। ୩୫ରୁ ଅଧିକ ଗୁରୁତର ଭାବେ ଆହତ ହୋଇଛନ୍ତି। ଅନ୍ୟପକ୍ଷରେ ଏକ ପର୍ଯ୍ୟଟକ ବସ୍ ବାରିପଦାରୁ ବାଲେଶ୍ୱର ଜିଲ୍ଲା ବାଲିଆପାଳ ଡଗରା ସମୁଦ୍ର କୂଳ ଅଭିମୁଖେ ଯାଉଥିବା ବେଳେ ସମୁଦ୍ର କୂଳର ୧ କି.ମି. ପୂର୍ବରୁ ୧୧ କେଭି ବିଦ୍ୟୁତ୍ ତାର ସଂସ୍ପର୍ଶରେ ଆସିଥିଲା। ବିଦ୍ୟୁତ୍ ତାର ସଂସ୍ପର୍ଶରେ ଆସିବା କଥା ଜାଣି ପାରି ଚାଳକ ବସକୁ ପଛକୁ ନେଇ ଯାଇଥିଲେ। ବସ ଚାଳକଙ୍କ ଉପସ୍ଥିତି ବୁଦ୍ଧି ଯୋଗୁଁ ୭୦ଟି ଜୀବନ ଅଳ୍ପକେ ବର୍ତ୍ତି ଯାଇଛି।
ଏହି ଦୁଇଟି ଘଟଣାରେ ଗୋଟିଏ ସାମଞ୍ଜସ୍ୟ ରହିଛି ତାହା ହେଉଛି ବାଇକ୍। ଗଞ୍ଜାମ ଜିଲାର ଟୁଲୁ ରାସ୍ତାରେ ଏକ ବାଇକକୁ ସାଇଡ଼ ଦେବାକୁ ଯାଇ ଏହି ଦୁର୍ଘଟଣା ଘଟିଛି ବୋଲି କୁହାଯାଉଥିବା ବେଳେ ଅନ୍ୟପଟେ ବାଲେଶ୍ବରରେ ବିଦ୍ୟୁତ୍ ତାର ସଂସ୍ପର୍ଶରୁ ବଞ୍ଚିବା ପାଇଁ ଚାଳକ ବସଟିକୁ ପଛକୁ ନେବା ସମୟରେ ପଛରେ ଏକ ବାଇକ ଚାପି ହୋଇଯାଇଛି। ବାଇକ ଚାଳକ ସାମାନ୍ୟ ଭାବେ ଆହତ ହୋଇଛନ୍ତି।
