ନୂଆଦିଲ୍ଲୀ: ମୋଦୀ ସରକାରଙ୍କ ଦ୍ବିତୀୟ ପାଳିର ଦ୍ବିତୀୟ ବଜେଟ୍ ତଥା ୨୦୨୦-୨୧ ଆର୍ଥିକ ବର୍ଷର ପୂର୍ଣ୍ଣାଙ୍ଗ ବଜେଟ୍ ଅର୍ଥମନ୍ତ୍ରୀ ନିର୍ମଳା ସୀତାରମଣ ଶନିବାର ଲୋକସଭାରେ ଉପସ୍ଥାପନ କରୁଛନ୍ତି। ଅର୍ଥମନ୍ତ୍ରୀ ଭାବେ ନିର୍ମଳା ସୀତାରମଣଙ୍କ ଏହା ହେଉଛି ଦ୍ବିତୀୟ ବଜେଟ୍। ଏଥର ବଜେଟରେ ନିର୍ମଳା ସୀତାରମଣ ସ୍ବାସ୍ଥ୍ୟ ଓ ସ୍ବଚ୍ଛ ଭାରତ ମିଶନ ଉପରେ ଗୁରୁତ୍ବ ଆରୋପ କରିଛନ୍ତି।
ସ୍ବାସ୍ଥ୍ୟସେବା କ୍ଷେତ୍ର ପାଇଁ ୬୯ ହଜାର କୋଟିର ପ୍ରସ୍ତାବ ରଖିଛନ୍ତି। ପ୍ରତି ଜିଲା ମୁଖ୍ୟ ଚିକିତ୍ସାଳୟ ମେଡିକାଲ କଲେଜ ହେବ ବୋଲି ସୀତାରମଣ ବଜେଟରେ ଉପସ୍ଥାପନ କରିଛନ୍ତି। ୨୦୨୪ ମଧ୍ୟରେ ସମସ୍ତ ଜିଲାରେ ଜନୌଷଧି କେନ୍ଦ୍ରର ପ୍ରସାରଣ ହେବ। ସେହିପରି ସ୍ବଚ୍ଛ ଭାରତ ମିଶନ ପାଇଁ ଅର୍ଥମନ୍ତ୍ରୀ ନିର୍ମଳା ସୀତାରମଣ ୧୨ ହଜାର ୩ଶହ କୋଟି ଟଙ୍କାର ପ୍ରସ୍ତାବ ଉପସ୍ଥାପନ କରିଛନ୍ତି। ଭାରତ ବାହ୍ୟ ମଳ ତ୍ୟାଗ ମୁକ୍ତ ଦେଶ ପାଇଁ ଆମ ସରକାର ପ୍ରତିଶ୍ରୁତି ବଦ୍ଧ ବୋଲି ସୀତାରମଣ କହିଛନ୍ତି। ଜଳ ଜୀବନ ମିଶନ ପାଇଁ ୩.୬୦ ଲକ୍ଷ କୋଟି ଟଙ୍କା ବ୍ୟୟବରାଦ କରିଛନ୍ତି।
