ଦାନ୍ତରେ ଯନ୍ତ୍ରଣା ହେଉଛି କି? ଆପଣାନ୍ତୁ ଏହି ଘରୋଇ ଉପଚାର, ତୁରନ୍ତ ମିଳିବ ଆରାମ

ସାଧାରଣତଃ ଅନେକ ସମୟରେ ଆମ ଦାନ୍ତରେ ଯନ୍ତ୍ରଣା ହୋଇଥାଏ। ଏହାର ବହୁତ କାରଣ ଥାଏ। ଦାନ୍ତରେ କିଛି ଲାଖି ରହିଥିଲେ ବା ଭଲ ଭାବେ ସଫା ହୋଇ ନ ଥିଲେ, ହଠାତ୍ କିଛି ଥଣ୍ଡା କିମ୍ବା ଗରମ ଖିଆ ପିଆ କଲେ କିମ୍ବା ଥଣ୍ଡା ହୋଇଥିଲେ ଦାନ୍ତରେ ଯନ୍ତ୍ରଣା ଅନୁଭବ ହୋଇଥାଏ। ଏଥିରୁ ମୁକ୍ତି ପାଇବା ପାଇଁ ଆମେ ଡାକ୍ତରଙ୍କ ପାଖକୁ ଯିବା ସହ ଅନେକ ଔଷଧ ସେବନ କରିଥାଉ। ତେବେ ଆଜି ଆମେ ଆପଣଙ୍କୁ ଏଭଳି କିଛି ଘରୋଇ ଉପାୟ ବିଷୟରେ କହିବୁ, ଯାହାଦ୍ବାରା ଦାନ୍ତ ଯନ୍ତ୍ରଣାରୁ ତୁରନ୍ତ ମୁକ୍ତି ମିଳିବ। ଆସନ୍ତୁ ଜାଣିବା ସେହି ଉପାୟ ବିଷୟରେ-

-ଲେମ୍ବୁରେ ଭିଟାମିନ-ସି ରହିଥାଏ, ଯାହା ଦାନ୍ତ ଯନ୍ତ୍ରଣାରୁ ମୁକ୍ତି ଦେବାରେ ସାହାଯ୍ୟ କରିଥାଏ। ଦାନ୍ତ ବିନ୍ଧା ହେଉଥିବା ସମୟରେ ଲେମ୍ବୁ ଚୋପାକୁ ଯନ୍ତ୍ରଣା ହେଉଥିବା ସ୍ଥାନରେ ଲଗାଇବା ଦ୍ୱାରା ତୁରନ୍ତ ଆରାମ ମିଳିଥାଏ।
-ଯଦି ଦାନ୍ତ ବିନ୍ଧା ହେବା ସହ ସେହି ସ୍ଥାନ ଫୁଲିଯାଇଥାଏ ତେବେ ସେଠାରେ ଆଳୁ ଚୋପାକୁ ୧୫ ମିନିଟ୍ ପର୍ୟ୍ୟନ୍ତ ରଖିଦିଅନ୍ତୁ। ଏହାଦ୍ୱାରା ଆପଣଙ୍କୁ ଖୁବଶୀଘ୍ର ଆରାମ ମିଳିବ।
-ଯଦି ପୂର୍ବରୁ ଦାନ୍ତ ସମସ୍ୟା ରହିଥାଏ, ତେବେ ରସୁଣ ଆପଣଙ୍କୁ ସାହାଯ୍ୟ କରିବ। ଏଥିପାଇଁ ଆପଣ ରସୁଣର ଏକ କୋଲା ଲୁଣ ଲଗାଇ ସେବନ କରନ୍ତୁ। ପ୍ରତ୍ୟେକ ଦିନ ସକାଳୁ ଏହା ଖାଇବା ଦ୍ୱାରା ଆପଣଙ୍କୁ ଲାଭ ମିଳିଥାଏ।
-ଦାନ୍ତ ଯନ୍ତ୍ରଣାରୁ ମୁକ୍ତି ପାଇବା ପାଇଁ ପିଆଜ ଏକ ଭଲ ବିକଳ୍ପ। ପିଆଜ ଖାଇବା ଦ୍ୱାରା ମୁହଁର କୀଟାଣୁ ମରିଯାଇଥାଆନ୍ତି, ଯାହାଫଳରେ ଶୀଘ୍ର ଯନ୍ତ୍ରଣାରୁ ଆରାମ ମିଳିଥାଏ।
-ସମସ୍ତେ ଜାଣନ୍ତି ଲବଙ୍ଗ ଦାନ୍ତ ଯନ୍ତ୍ରଣାରୁ ମୁକ୍ତି ଦେଇଥାଏ। ଏଥିପାଇଁ ଆପଣ ପାଟିରେ ଏକ ଲବଙ୍ଗ ରଖିପାରିବେ ବା ଯନ୍ତ୍ରଣା ହେଉଥିବା ସ୍ଥାନରେ ମଧ୍ୟ ଲବଙ୍ଗ ତେଲ ବ୍ୟବହାର କରିପାରିବେ।