ନୂଆଦିଲ୍ଲୀ: ସୁପ୍ରିମକୋର୍ଟରେ ଅଯୋଧ୍ୟାର ରାମ ଜନ୍ମଭୂମି-ବାବ୍ରୀ ମସଜିଦ୍ ବିବାଦର ସମାଧାନ ହେବା ଅସମ୍ଭବ ବୋଲି ଆର୍ଟ ଅଫ୍ ଲିଭିଂର ପ୍ରତିଷ୍ଠାତା ଶ୍ରୀ ଶ୍ରୀ ରବିଶଙ୍କର କହିଛନ୍ତି। ରବିଶଙ୍କର କହିଛନ୍ତି ଯେ ଅଦାଲତ ଏହି ବିବାଦ ଉପରେ ଶୁଣାଣି ଜାରି ରଖିଛନ୍ତି। ସେ କହିଛନ୍ତି ଯେ ଶୁଣାଣି ଶେଷରେ ଜଣେ ମାମଲା ହାରିବ ଓ ଆଉ ଜଣେ ବିଜୟୀ ହେବ। ହାରିବା ପକ୍ଷ ପ୍ରଥମେ ସୁପ୍ରିମକୋର୍ଟଙ୍କ ରାୟକୁ ଗ୍ରହଣ କରିନେଇପାରନ୍ତି; ମାତ୍ର ଭବିଷ୍ୟତରେ ସେମାନେ ଏହାକୁ ନେଇ ପୁଣି ବିବାଦ ଉଠାଇବେ। ତେଣୁ ଏହି ବିବାଦକୁ କୋର୍ଟ ବାହାରେ ଆପୋଷ ସମାଧାନ କରିବା ସବୁଠାରୁ ଭଲ ଉପାୟ ବୋଲି ରବିଶଙ୍କର କହିଛନ୍ତି। ଅଯୋଧ୍ୟା ବିବାଦକୁ କୋର୍ଟ ବାହାରେ ଆପୋଷ ସମାଧାନ ପାଇଁ ରବିଶଙ୍କର ଉଦ୍ୟମ ଚଳାଇଥିବାବେଳେ ଏହାକୁ ବିଭିନ୍ନ ମହଲରେ ବିରୋଧ କରାଯାଇଛି। ବାବ୍ରୀ ଆକ୍ସନ କମିଟି କହିଛି ଯେ ଶ୍ରୀଶ୍ରୀ ଅଯୋଧ୍ୟା ବିବାଦରୁ ନିଜକୁ ଦୂରେଇ ରଖିବା ଦରକାର। ଶ୍ରୀଶ୍ରୀ ଦାବି କରିଛନ୍ତି ଯେ ଅଧିକାଂଶ ମୁସଲମାନ ଅଯୋଧ୍ୟାରେ ରାମ ମନ୍ଦିର ନିର୍ମାଣକୁ ସମର୍ଥନ କରନ୍ତି। ଯଦିଓ କେତେକ ମୁସଲମାନ ଏହାକୁ ବିରୋଧ କରୁଛନ୍ତି ତେବେ ସମର୍ଥକଙ୍କ ତୁଳନାରେ ବହୁତ କମ୍। ପ୍ରଧାନ ବିଚାରପତି ଦୀପକ ମିଶ୍ରଙ୍କ ନେତୃତ୍ୱ ସୁପ୍ରିମକୋର୍ଟଙ୍କ ପୀଠ ଅଯୋଧ୍ୟା ବିବାଦର ଶୁଣାଣି କରୁଛନ୍ତି। ସୁପ୍ରିମକୋର୍ଟ ଏହାକୁ ରାଜନୈତିକ ଓ ଧାର୍ମିକ ବିବାଦରୁ ଊର୍ଦ୍ଧ୍ବରେ ରଖିବା ପୂର୍ବକ ଏହାକୁ ଏକ ଜମିଜମା ମାମଲା ଭାବେ ଗ୍ରହଣ କରିଛନ୍ତି।
Popular Categories
Previous article
Next article