ବ୍ରଜରାଜନଗର: ଚଳିତ ମାସ ତୃତୀୟ ସପ୍ତାହ ସୁଦ୍ଧା ବିଜେପିର ଜିଲା ସାଙ୍ଗଠନିକ ନିର୍ବାଚନ ସରିବା ପରେ ରାଜ୍ୟ ସଭାପତି ନିର୍ବାଚିତ ହେବେ। ହେଲେ ବିଭିନ୍ନ ସାଙ୍ଗଠନିକ ପଦ ପଦବୀ ପାଇଁ ନେତାଙ୍କ ଲବି ଜୋରଦାର ହୋଇଛି। ଏଭଳି ସ୍ଥିତିରେ ବ୍ରଜରାଜନଗରର ପୂର୍ବତନ ବିଜେପି ବିଧାୟିକା ରାଧାରାଣୀ ପଣ୍ଡାଙ୍କ ଦିଲ୍ଲୀ ଗସ୍ତ ଅବସରରେ ରାଜନୈତିକ ଉଷ୍ମତା ଦେଖାଦେଇଛି।
ଦିଲ୍ଲୀ ଗସ୍ତ କରି ସେ ବରଗଡ଼ ସାଂସଦ ସୁରେଶ ପୂଜାରୀଙ୍କ ଗୃହ ପ୍ରବେଶରେ ସାମିଲ ହେବା ସହ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ଭେଟିଛନ୍ତି ଏବଂ ପ୍ରଧାନମନ୍ତ୍ରୀ କାର୍ୟ୍ୟାଳୟକୁ ମଧ୍ୟ ଯାଇଛନ୍ତି। କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ଭେଟି ଦୀର୍ଘ ଦିନରୁ ବନ୍ଦ ରହିଥିବା କାରଖାନାର ପୁନରୁଦ୍ଧାର, ବେଆଇନ ଆସ ଡମପିଙ୍ଗ, ଗାନ୍ଧିଛକ ଓ ପ୍ରସନ୍ନ ପଣ୍ଡା ଛକରେ ଓଭରବ୍ରିଜ ଇତ୍ୟାଦି ସମସ୍ୟା ଉପସ୍ଥାପନ କରିଥିବା ନେଇ ନିଜେ ରାଧା ସୋସିଆଲ ମିଡିଆରେ ସୂଚନା ଦେଇଛନ୍ତି। କିନ୍ତୁ ରାଜନୈତିକ ସମୀକ୍ଷକମାନେ ରାଧାଙ୍କ ଦିଲ୍ଲୀ ଗସ୍ତକୁ ଭିନ୍ନ ଦୃଷ୍ଟିରେ ଦେଖୁଛନ୍ତି। ପୂର୍ବରୁ ଧର୍ମେନ୍ଦ୍ରଙ୍କ ଗୁଡ୍ ବୁକରେ ଥିବା ରାଧା କୌଣସି ଜାତୀୟ ସ୍ତରୀୟ ଅନୁଷ୍ଠାନରେ ଥଇଥାନ କିମ୍ବା କୌଣସି ରାଜ୍ୟରୁ ରାଜ୍ୟସଭା , ଜାତୀୟ ସ୍ତରୀୟ ପଦ ପଦଵୀ ପାଇଁ ରେସରେ ଥିବା ଚର୍ଚ୍ଚା ଉଠିଛି। ସେପଟେ ରାଧାରଣୀ ଏହାକୁ ଖଣ୍ଡନ କରି କୌଣସି ରାଜନୈତିକ ଅଭିସନ୍ଧି ନୁହେଁ ବରଂ ଅଞ୍ଚଳର ସ୍ୱାର୍ଥ ସମ୍ମିଳିତ ଦାବି ଜଣାଇବା ପାଇଁ କେନ୍ଦ୍ର ମନ୍ତ୍ରୀ ଓ ପିଏମଓକୁ ଯାଇଥିଲେ ବୋଲି ସ୍ପଷ୍ଟ କରିଛନ୍ତି।
Comments are closed.