ପାରାଦୀପ: ମହାନଦୀ ସୁରକ୍ଷା ଯାତ୍ରାର ଆଜି ହେଉଛି ଉଦଯାପନୀ ଦିବସ । ପାରାଦୀପ ବିଜୁ ମୈଦାନରେ ଏକ ବିଶାଳ ସମାବେଶର ଆୟୋଜନ କରାଯାଇଛି । ଏହି ଉଦଯାପନ ଦିବସ ଅବସରରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଯୋଗ ଦେଇ ଅଭିଭାଷଣରେ କହିଛନ୍ତି ଯେ, ଝାରସୁଗୁଡା ସୁଖାସୋଡାରୁ ଆରମ୍ଭ ହୋଇଥିବା ମହାନଦୀ ସୁରକ୍ଷା ମହାସଂଗ୍ରାମ ଯାତ୍ରର ଆଜି ହେଉଛି ଶେଷ ଦିନ । ଟାଣ ଖରାରେ ୫୦୦ କିମି ଯାତ୍ରାରେ ସାମିଲ ହୋଇଥିବା ଓଡିଶାବାସୀ ମୁଁ ଧନ୍ୟବାଦ ଜଣାଉଛି । ଏହି ଅଭିଯାନରେ ଆଜି କେବଳ ରାଜନୀତିର ବିଷୟ ହୋଇ ରହିନାହିଁ, ଏହା ଓଡିଶାବାସୀଙ୍କ ଦୈନନ୍ଦିନ ଜୀବନ ସହ ଜଡିତ ହୋଇରହିଛି । ମହାନଦୀ ପରି ଏକ ଗୁରୁତ୍ଵପୁର୍ଣ୍ଣ ବିଷୟରେ କେନ୍ଦ୍ରର ବିଜେପି ସରକାର ଚୁପ୍ ରହିବା ଦୁଃଖର ବିଷୟ । ଓଡିଶାର ବିଜେପି ନେତମାନେ ଛତିଶଗଡର କାମକୁ ସମର୍ଥନ କରୁଛନ୍ତି ଏବଂ ଓଡିଶାରେ ଆସି କୁମ୍ଭୀର କାନ୍ଦଣା କାନ୍ଦୁଛନ୍ତି । ଲୋକମାନେ ସେମାନଙ୍କ ଦୋମୁହାଁ ନୀତି ଜାଣି ସାରିଲେଣି । ବିଜେପି ନେତାର ଓଡିଶା ପ୍ରତି ଦରଦ ଅଛି ତେବେ ଛତିଶଗଡ ସରକାର କାମକୁ ବିରୋଧ କରନ୍ତୁ । ସେମାନେ ଛତିଶଗଡର ସରକାରକୁ ବିରୋଧ କରିପାରିବେ କି ? ବିଜୁ ଜନତା ଦଳ ସରକାର ମହାନଦୀ ପାଇଁ ସୁପ୍ରିମକୋର୍ଟ ଯାଇଥିଲା, ଯାହା ଫଳରେ ଆମ ଦାବିକୁ ଗ୍ରହଣ କରି ମହାଦନୀ ଟ୍ରିବୁନାଲ ଗଠନ କରାଯାଇଛି ।
ମୁଖ୍ୟମନ୍ତ୍ରୀ ତାଙ୍କ ଅଭିଭାଷଣରେ ଆହୁରି ମଧ୍ୟ କହିଛନ୍ତି, ପାଣି ପାଇଁ ନୁହେଁ ବରଂ ମହାନଦୀ ଜୀବନ ପାଇଁ ବିଜେଡି ଲଢୁଛି । ମହାନୀ ଉପରେ ନିର୍ଭର କରିଥିବା ସାତକୋଷିଆ ଚିଲିକା ଏବଂ ଭିତରକନିଆ ଆଦିର ସୁରକ୍ଷା ମଧ୍ୟ ଗୁରୁତ୍ଵପୁର୍ଣ୍ଣ ଅଟେ । ମହାନଦୀ ଉପରେ ନିର୍ଭର କରୁଥିବା ଚାଷୀ ଓ ମତ୍ସଜୀବୀଙ୍କ ଜୀବନ ଜୀବିକାର ସୁରକ୍ଷା ମଧ୍ୟ ଗୁରୁତ୍ଵପୁର୍ଣ୍ଣ । ମହାନଦୀର ସୁରକ୍ଷା ପାଇଁ ଓଡିଶାବାସୀ ଏକାଠି ହୋଇଛନ୍ତି । ମହାନଦୀ ଜରିଆରେ ଆମ ଜୀବନ ଜୀବିକା ଉପରେ ହେଉଥିବା ଆକ୍ରମଣର ଦୃଢ ଜବାବ ଦିଆଯିବ ।
ଏହି ସମାବେଶରେ ବିଧାୟକ ଦାମୋଦର ରାଉତ ଯୋଗ ଦେଇ ବିଜେପି ସରକାର ଉପରେ ବର୍ଷିଥିଲେ । ଏହି ଅବସରରେ ଅନ୍ୟ ବରିଷ୍ଠ ନେତା ଦେବୀ ମିଶ୍ର, ସଞ୍ଜୟ ଦାସର୍ବର୍ମା ପ୍ରମୂଖ ନିଜ ନିଜର ବକ୍ତବ୍ୟ ରଖିଥିଲେ।
