ବଲାଙ୍ଗୀର : ବଲାଙ୍ଗୀର ସହରରେ ଟ୍ରାଫିକ ସମସ୍ୟା ଦୂର କରିବ ପୁଲିସର ଟ୍ରାଫିକ ଟିମ। ଗୁରୁବାର ସ୍ଥାନୀୟ ଜିଲା ପୁଲିସ ମୁଖ୍ୟାଳୟରେ ଏସପି ସନ୍ଦୀପ ମଡକର ଏକ ନୂତନ ଟିମ ଗଠନ କରିଥିବା ବେଳେ ସେ ଏହାର ଶୁଭାରମ୍ଭ କରିଛନ୍ତି। ଟାଉନ ଥାନା ଅଞ୍ଚଳରେ ଜଣେ ସହକାରୀ କମାଣ୍ଡାଣ୍ଟଙ୍କ ନେତୃତ୍ୱରେ ୨ ଜଣ ଏଏସଆଇ, ୬ ଜଣ ହାବିଲଦାର,୪୨ ଜଣ କନଷ୍ଟେବଲ ଏହି ଟିମରେ ରହିଛନ୍ତି। ଏଥିରେ ସାଇରନ ଲାଗିଥିବା ୨ଟି ବାଇକ ପାଟ୍ରୋଲିଂ ପାଇଁ ସାମିଲ କରିଛି ପୁଲିସ ବିଭାଗ।
ସକାଳ ୭ଟାରୁ ରାତି ୯ଟା ଯାଏଁ ଏହା ଟ୍ରାଫିକ ତଦାରଖ କରିବ ବୋଲି ପୁଲିସ ବିଭାଗର ବରିଷ୍ଠ ଅଧିକାରୀ ସୂଚନା ଦେଇଛନ୍ତି। ଗୁରୁବାର ଏହି ଟିମର ଶୁଭାରମ୍ଭ ସମୟରେ ଅତିରିକ୍ତ ଏସପି ସୁବାଷ ଚନ୍ଦ୍ର ଜମାଦାର,ସଦର ଏସଡିପିଓ ଶ୍ରୀମନ୍ତ ବାରିକ, ସହକାରୀ କମାଣ୍ଡାଣ୍ଟ କୁମୁଦ ସେଠ,ଟାଉନ ଥାନା ଅଧିକାରୀ ସଂଗ୍ରାମ କେଶରୀ ପଟ୍ଟନାୟକ ପ୍ରମୁଖ ଉପସ୍ଥିତ ଥିଲେ।
