ଧାମରା : ଧାମରା ନିକଟସ୍ଥ କରଞ୍ଜମାଳ ପଞ୍ଚାୟତରେ ଥିବା ୨ଟି ଅଙ୍ଗନବାଡି କେନ୍ଦ୍ରରେ ଶିଶୁମାନଙ୍କ ଖାଦ୍ୟ ହଡ଼ପ କରାଯାଉଥିବା ନେଇ ଅଭିଯୋଗ ହୋଇଛି। ସ୍ଥାନୀୟ ଲୋକେ ମହିଳା ଏବଂ ଶିଶୁ ବିକାଶ ବିଭାଗ ନିକଟରେ ଏହି ଅଭିଯୋଗ କରିଛନ୍ତି। ଅଭିଯୋଗ ଉପରେ ତଦନ୍ତ ହୋଇ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସିଡ଼ିପିଓ ପ୍ରତିଭା ଖଣ୍ଡୁଆଳ କହିଛନ୍ତି ।
ଅଭିଯୋଗ ମୁତାବକ, କରଞ୍ଜମାଳ ପଞ୍ଚାୟତରେ ଥିବା ଧାନକୁଟା ଏବଂ ବଇଁଚା ଅଙ୍ଗନବାଡି କେନ୍ଦ୍ର ୨୦୦୯ରୁ ଆରମ୍ଭ ହୋଇଥିବା ଜଣାଯାଇଛି। କେନ୍ଦ୍ରର ନିଜସ୍ୱ ଘର ନ ଥିବା ବେଳେ ୨ଟି କେନ୍ଦ୍ର ପାଇଁ ୨୦୧୭ରେ ପ୍ରତ୍ୟେକକୁ ୫ଲକ୍ଷ ଟଙ୍କା ଲେଖାଏଁ ଅନୁଦାନ ଆସିଥିଲା। ବଇଁଚା ଅଙ୍ଗନବାଡି କେନ୍ଦ୍ରର ଘର ସମ୍ପୂର୍ଣ୍ଣ ହୋଇ ନ ଥିବାବେଳେ ଧାନକୁଟା କେନ୍ଦ୍ରର ଘର ତିଆରି ହୋଇନାହିଁ। ଧାନକୁଟା କେନ୍ଦ୍ରରେ ଛାତ୍ରଛାତ୍ରୀମାନଙ୍କ ସଂଖ୍ୟା ୪୨ ଦର୍ଶାଯାଉଥିବା ବେଳେ ବଇଁଚା କେନ୍ଦ୍ରରେ ସମୁଦାୟ ଉପସ୍ଥାନ ୨୨ ଦର୍ଶାଯାଉଛି। କିନ୍ତୁ କୌଣସି ଦିନ ଏତେ ସଂଖ୍ୟକ ପିଲା କେନ୍ଦ୍ରରେ ଉପସ୍ଥିତ ରହୁନଥିବା ଅଭିଯୋଗ ପତ୍ରରେ ଦର୍ଶାଯାଇଛି । ଅଧିକ ଉପସ୍ଥାନ ଦର୍ଶାଯାଇ ପିଲାଙ୍କ ପାଇଁ ଆସୁଥିବା ଖାଦ୍ୟ ହଡ଼ପ କରାଯାଉଛି । ଏହାର ତଦନ୍ତ କରି ଦୋଷୀଙ୍କ ବିରୁଦ୍ଧରେ ଦୃଢ କାର୍ଯ୍ୟନୁଷ୍ଠାନ ନେବାକୁ ଦାବୀ ହୋଇଛି । ଏ ବାବଦରେ ସିଡିପିଓ ପ୍ରତିଭା ଖଣ୍ଡୁଆଳ ପଚାରିବାରୁ ସେ କହିଲେ ଅଭିଯୋଗ ହୋଇଛି। ଏହାର ସରଜମିନ ତଦନ୍ତ କରି ଦୋଷୀଙ୍କ ବିରୁଦ୍ଧରେ ଦୃଢ କାର୍ଯ୍ୟନୁଷ୍ଠାନ ଗ୍ରହଣ କରାଯିବ।
