ବ୍ରହ୍ମପୁର: ପୁଲିସ ଗୁଳିରେ ଆହତ ହୋଇଛି ଦୁର୍ଦାନ୍ତ ଅପରାଧୀ କୋକ ଓରଫ ସୁଶାନ୍ତ ବେହେରା(୨୫)। କୋକର ଘର ବ୍ରହ୍ମପୁର ଗୋସାଇଁ ନୂଆଗାଁ ରାଜୀବ ନଗରରେ ହୋଇଥିବା ବେଳେ ସେ ଅନେକ ଦିନରୁ ପୁଲିସ ଟାର୍ଗେଟରେ ରହିଥିଲା । ତା ନାମରେ ଗଞ୍ଜାମ ଓ ବ୍ରହ୍ମପୁରରେ ୭ରୁ ଅଧିକ ଅପରାଧିକ ମାମଲା ରହିଛି ।
ସୂଚନା ଅନୁସାରେ, ଶନିବାର ଭୋର ୫ଟା ବେଳେ କୋକ ଗଞ୍ଜାମ ଥାନା ଅନ୍ତର୍ଗତ ଜୟଶ୍ରୀ କେମିକାଲ ରୋଡ଼ରେ ବାଇକରେ ଯାଉଥିବା ନେଇ ପୁଲିସକୁ ସୂଚନା ମିଳିଥିଲା। ପରେ ପୁଲିସର ଏକ ସ୍ୱତନ୍ତ୍ର ଟିମ୍ ତାର ପିଛା କରିଥିଲା । ପୁଲିସକୁ ଦେଖି କୋକ ପ୍ରଥମେ ଗୁଳି ଚଳାଇଥିଲା । ଜବାବରେ ପୁଲିସ ମଧ୍ୟ ପାଲଟା ଗୁଳି ମାଡ଼ କରିଥିଲା । ପରେ ପୁଲିସର ଗୁଳି କୋକର ବାମ ଆଣ୍ଠୁରେ ବାଜିବା ପରେ ସେ ତଳେ ପଡି ଯାଇଥିଲା । ତାକୁ ଗିରଫ କରାଯାଇ ଚିକିତ୍ସା ପାଇଁ ଛତ୍ରପୁର ଓ ପରେ ବ୍ରହ୍ମପୁର ବଡ ମେଡ଼ିକାଲରେ ଭର୍ତ୍ତି କରାଯାଇଛି ବୋଲି ଏସଡ଼ିପିଓ ୟୁକେ ଦାସ କହିଛନ୍ତି । ଘଟଣାସ୍ଥଳରୁ ଗୋଟିଏ ମାଉଜର, ଗୁଳି, ବାଇକ୍ ଜବତ ହୋଇଛି । ଏହି ଘଟଣାରେ ୨ ଜଣ ପୁଲିସ କର୍ମଚାରୀ ଆହତ ହୋଇଥିବା ସୂଚନା ମିଳିଛି।