ବଦଳି ଆଦେଶ ପରେ ଇସ୍ତଫା ଦେଇପାରନ୍ତି ମାଡ୍ରାସ ହାଇକୋର୍ଟ ମୁଖ୍ୟ ବିଚାରପତି

ଚେନ୍ନାଇ: ମାଡ୍ରାସ ହାଇକୋର୍ଟ ମୁଖ୍ୟ ବିଚାରପତି ବିଜୟା କେ. ତାହିଲରମାନି ତାଙ୍କ ପଦବୀରୁ ଇସ୍ତଫା ଦେଇପାରନ୍ତି। ସୁପ୍ରିମକୋର୍ଟ କଲେଜିୟମ ତାଙ୍କୁ ମେଘାଳୟ ହାଇକୋର୍ଟକୁ ବଦଳି କରିଥିବାରୁ ଏଥିରେ ସେ ଅସନ୍ତୋଷ ପ୍ରକାଶ କରି ଏପରି ପଦକ୍ଷେପ ନେବାକୁ ସ୍ଥିର କରିଥିବା ବିଶେଷ ସୂତ୍ରରୁ ଜଣାପଡ଼ିଛି। ଶୁକ୍ରବାର ସନ୍ଧ୍ୟାରେ ଚେନ୍ନାଇର ଜୁଡିସିଆଲ ଏକାଡେମୀଠାରେ ୬ଜଣ ଅତିରିକ୍ତ ବିଚାରପତିଙ୍କ ପକ୍ଷରୁ ନୈଶ୍ୟଭୋଜି ଆୟୋଜନ କରାଯାଇଥିଲା। ୨ ଦିନ ତଳେ ଏହି ୬ ଅତିରିକ୍ତ ବିଚାରପତିଙ୍କୁ ସ୍ଥାୟୀ ବିଚାରପତି କରାଯାଇଥିଲା। ଏଥିରେ ମାଡ୍ରାସ ହାଇକୋର୍ଟ ମୁଖ୍ୟ ବିଚାରପତି ବିଜୟା ଯୋଗଦେଇଥିଲେ। ସେ ତାଙ୍କ ବଦଳି ଆଦେଶର ପୁନର୍ବିଚାର କରିବା ଲାଗି କଲେଜିୟମଙ୍କ ନିକଟରେ ଆବେଦନ କରିଥିଲେ। ମାତ୍ର କଲେଜିୟମ ତାଙ୍କ ଆବେଦନକୁ ଗ୍ରହଣ କରି ନ ଥିଲେ। ଇତିମଧ୍ୟରେ ମାଡ୍ରାସ ହାଇକୋର୍ଟର ଆଡ୍‌ଭୋକେଟ ଏନ.ଜି.ଆର. ପ୍ରସାଦଙ୍କ ସମେତ ଅନ୍ୟ ଆଡ୍‌ଭୋକେଟମାନେ ପ୍ରଧାନ ବିଚାରପତି ରଞ୍ଜନ ଗୋଗୋଇଙ୍କୁ ଚିଠି ଲେଖି ମୁଖ୍ୟ ବିଚାରପତି ବିଜୟାଙ୍କ ବଦଳି ଉପରେ ପୁନର୍ବିଚାର କରିବାକୁ ନିବେଦନ କରିଛନ୍ତି।