ମୁମ୍ବଇ : ମାଡ୍ରାସ ହାଇକୋର୍ଟ ଓସ୍କାର ପୁରସ୍କାର ବିଜେତା ତଥା ପ୍ରତିଷ୍ଠିତ ମ୍ୟୁଜିକ୍ କମ୍ପୋଜର୍ ଏ.ଆର ରହମାନ୍ଙ୍କୁ ନୋଟିସ ଜାରିକରି ଆୟକର ସଂକ୍ରାନ୍ତ ଏକ ମାମଲାରେ ସ୍ପଷ୍ଟୀକରଣ ମାଗିଛନ୍ତି। ଏଆର ରହମାନଙ୍କ ବିରୋଧରେ ଅଭିଯୋଗ ହୋଇଛି କି ସେ ନିଜର ଚାରିଟେବୁଲ ଟ୍ରଷ୍ଟ ଏଆର ରହମାନ୍ ଫାଉଣ୍ଡେସନ୍ ଜରିଆରେ ୩ କୋଟିରୁ ଅଧିକ ଆୟ କରିଥିଲେ। ଆୟକର ବିଭାଗର ଜଣେ ବରିଷ୍ଠ ଓକିଲଙ୍କ କହିବାନୁସାରେ, ଏଆର ରହମାନ୍ ୨୦୧୧-୧୨ରେ ଇଂଲଣ୍ଡର ଲିବ୍ରା ମୋବାଇଲ୍ ସହ ଏକ କଲ୍ର ଟ୍ୟୁନ୍ ପ୍ରସ୍ତୁତ ପାଇଁ ଚୁକ୍ତି କରିଥିଲେ। ଏଥିପାଇଁ କମ୍ପାନି ତାଙ୍କୁ ୩.୪୭ କୋଟି ଦେଇଥିଲା। ଏହି ଚୁକ୍ତିରେ ରହମାନ କମ୍ପାନୀକୁ କହିଥିଲେ ଯେ ଉକ୍ତ ଅର୍ଥକୁ ସିଧା ତାଙ୍କ ଚାରିଟେବୁଲ ଫାଉଣ୍ଡେସନ୍ ନାଁରେ ଟ୍ରାନ୍ସଫର କରାଯାଉ।
ରହମାନଙ୍କ ବିରୋଧରେ ରୁଜୁ ଆବେଦନରେ ଆୟକର ପରାମର୍ଶଦାତା କହିଛନ୍ତି, ଯେଉଁ ଆୟ ଉପରେ ଟିକସ ରହିଛି ତାହାକୁ ନିଶ୍ଚିତ ରୂପେ ରହମାନଙ୍କୁ ଦେବାକୁ ହେବ। ଟିକସ କାଟ ପରେ ଏହି ରାଶିକୁ ସେ ଟ୍ରଷ୍ଟକୁ ଦେଇପାରିଥାଆନ୍ତେ; ମାତ୍ର ଏଭଳି ନ କରିବା ଟିକସ ଠକେଇ। ତେବେ ଏହି ପ୍ରସଙ୍ଗରେ ରହମାନ୍ଙ୍କ କୌଣସି ପ୍ରତିକ୍ରିୟା ଆସିନି।
