ନୂଆଦିଲ୍ଲୀ: ଚୀନରେ ଆତଙ୍କ ଖେଳାଇଥିବା ଘାତକ ‘କରୋନା’ ଭୂତାଣୁର ପ୍ରକୋପ ଏବେ ଭାରତରେ ଦେଖିବାକୁ ମିଳିଛି। ୩ ଦିନ ଭିତରେ ଭାରତରେ ୨୧ ଜଣ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି। ସେମାନଙ୍କ ମଧ୍ୟରୁ ୧୬ ବିଦେଶୀ ପର୍ଯ୍ୟଟକ ରହିଛନ୍ତି। ଏହି ପର୍ଯ୍ୟଟକମାନେ ଇଟାଲୀର। ଏମାନେ ଭାରତ ଆସିବା ପରେ ଯାଞ୍ଚ ସମୟରେ କରୋନାରେ ଆକ୍ରାନ୍ତ ହୋଇଥିବା ଜଣାପଡ଼ିଥିଲା। ଏମ୍ସରେ ସେମାନଙ୍କ ରକ୍ତ ନମୁନା ପରୀକ୍ଷା କରାଯାଇଥିଲା, ଯାହା କରୋନା ପଜିଟିଭ ଆସିଛି। ପରେ ସମସ୍ତଙ୍କୁ ଛାବଲାସ୍ଥିତ ଆଇଟିବିପି ସେଣ୍ଟରରେ ଆଇସୋଲେଶନରେ ରଖି ଚିକିତ୍ସା କରାଯାଉଛି। ଏହାବ୍ୟତୀତ ୫ ଭାରତୀୟ ଏହି ଭୂତାଣୁରେ ଆକ୍ରାନ୍ତ ହୋଇଛନ୍ତି। ଦିଲ୍ଲୀ-ଏନସିଆରରେ ଜଣେ ଆକ୍ରାନ୍ତ ଚିହ୍ନଟ ହେବା ପରେ ସରକାରଙ୍କ ପକ୍ଷରୁ ବ୍ୟାପକ ପଦକ୍ଷେପ ଗ୍ରହଣ ପାଇଁ ପ୍ରସ୍ତୁତି ଚାଲିଛି। ଉକ୍ତ ରୋଗୀଙ୍କୁ ସଫଦରଜଙ୍ଗ ହସ୍ପିଟାଲରେ ଭର୍ତ୍ତି କରାଯାଇଛି। ଏହାପୂର୍ବରୁ ତେଲେଙ୍ଗାନାରେ ମଧ୍ୟ ଜଣେ ଆକ୍ରାନ୍ତଙ୍କୁ ଚିହ୍ନଟ କରାଯାଇଥିଲା। ମହାରାଷ୍ଟ୍ରରେ ମଧ୍ୟ ୨ ସନ୍ଦିଗ୍ଧଙ୍କୁ ଚିହ୍ନଟ କରାଯାଇଛି। କରୋନା ମୁକାବିଲା ପାଇଁ କେନ୍ଦ୍ର ସରକାର ଆଜି ଏକ ଉଚ୍ଚ ସ୍ତରୀୟ ବୈଠକ ଡକାଇଛନ୍ତି।
କରୋନା ମୁକାବିଲ ପାଇଁ କେନ୍ଦ୍ର ସରକାର ୧୩ ହଜାର ପରୀକ୍ଷାଗାର କରିଛନ୍ତି। ଏକା ସମୟରେ ୨୫ ହଜାର ନମୁନା ପରୀକ୍ଷା କରାଯାଇପାରିବ। ଦିଲ୍ଲୀର ୨୫ଟି ସରକାର ହସ୍ପିଟାଲରେ ଆଇସୋଲେଶନ ୱାର୍ଡ ଖୋଲାଯାଇଛି। ଜରୁରିକାଳୀନ ସ୍ଥିତି କିପରି ଏହାର ମୁକାବିଲ କରାଯିବ ସେ ନେଇ ପ୍ରତିରକ୍ଷା ମନ୍ତ୍ରଣାଳୟ ପକ୍ଷରୁ ଯୋଜନା କରାଯାଇଛି।
ସୂଚନାଯୋଗ୍ୟ, ଗତ ମାସରେ କେରଳରେ ୩ କରୋନା ରୋଗୀଙ୍କୁ ଚିହ୍ନଟ କରାଯାଇଥିଲା। ସେମାନେ ସମସ୍ତେ ଚୀନରୁ ଫେରିଥିଲେ। ଏହା ପରେ ବିମାନବନ୍ଦର, ରେଳ ଷ୍ଟେଶନ ଏବଂ ବିଭିନ୍ନ ବନ୍ଦରରେ ଯାଞ୍ଚ କଡ଼ାକଡ଼ି କରାଯାଇଥିଲା। କିନ୍ତୁ ପରବର୍ତ୍ତୀ ସମୟରେ କୋହଳ ଯୋଗୁ ଏବେ ପୁଣି ଥରେ ପୂର୍ବ ସ୍ଥିତି ଉପୁଜିଛି।
