ସମ୍ବଲପୁର : ସମ୍ବଲପୁର ଦେଇ ଦେଶର ବିଭିନ୍ନ ରାଜ୍ୟକୁ ବେଆଇନ ଭାବରେ ଗଞ୍ଜେଇ ଚାଲାଣ ହେଉଥିବାରୁ ଅବକାରୀ ବିଭାଗ ପକ୍ଷରୁ ନିୟମିତ ଚେକିଂ କରାଯାଉଛି । ଏହି କ୍ରମରେ ଶନିବାର ପୂର୍ବାହ୍ନରେ ଅବୈଧ୍ୟ ଗଞ୍ଜେଇ ଚାଲାଣ ନିମନ୍ତେ ସ୍ଥାନୀୟ ସମ୍ବଲପୁର ରେଳ ଷ୍ଟେସନରେ ରେଳବାଇ ପୁଲିସ ସହିତ ମିଳିତ ଚେକିଂ ଅଭିଯାନ କରାଯାଉଥିଲା ।
ଏହି ସମୟରେ ପ୍ଲାଟଫର୍ମ ୧ ନିକଟରେ ସନ୍ଦିଗ୍ଧ ରୂପେ ଯାଉଥିବା ବିହାର ରାଜ୍ୟ ଚମ୍ପାରନ ଜିଲା ନିବାସୀ ଅଚେଲାଲ ବିନ (୪୩) ଓ ଶ୍ରବଣ ନିଷାଦ (୧୯) ନାମକ ୨ ଜଣ ବ୍ୟକ୍ତିଙ୍କୁ ପଚରାଉଚୁରା କରାଯାଇଥିଲା । ଯାଞ୍ଚ ସମୟରେ ସେମାନଙ୍କ ନିକଟରୁ ଅବୈଧ୍ୟ ରୂପେ ୨୧ କିଗ୍ରା ଗଞ୍ଜେଇ ଚାଲାଣ କରାଯାଉଥିବାର ଧରାପଡିଥିଲା । ଏଣୁ ଅବକାରୀ ବିଭାଗ ପକ୍ଷରୁ ଏକ ମାମଲା ରୁଜୁ କରାଯାଇ ଉଭୟ ଅଭିଯୁକ୍ତଙ୍କୁ ଗିରଫ କରି ଅଦାଲତକୁ ଚାଲାଣ କରାଯାଇଛି । ଜବତ ହୋଇଥିବା ଗଞ୍ଜେଇ ଗୁଡିକର ଆନୁମାନିକ ମୂଲ୍ୟ ୨ ଲକ୍ଷ ଟଙ୍କାରୁ ଉର୍ଦ୍ଧ ହେବ ବୋଲି ଅବକାରୀ ବିଭାଗ ପକ୍ଷରୁ ସୂଚନା ଦିଆଯାଇଛି ।
