ଗୁରୁଡିଝାଟିଆ: ଦେଶୀମଦ ରନ୍ଧନର ଏନ୍ତୁଡିଶାଳ ଭାବେ କୁଖ୍ୟାତ ଅର୍ଜନ କରିଥିବା ଖୁଣ୍ଟୁଣୀ ଥାନା ଅନ୍ତର୍ଗତ ଡାଳୁଆ, ଖଣ୍ଡୁଆଳି ଓ ସରସ୍ୱତୀପୁର ଜଙ୍ଗଲ ଅଞ୍ଚଳରେ ଅବକାରୀ ଚଢାଉ ସମୟରେ ୧୧୫୫ ଲିଟର ଦେଶୀମଦ ଜବତ କରାଯାଇଛି। ଏହା ସହିତ ମଦ ପ୍ରସ୍ତୁତି ପାଇଁ ରଖାଯାଇଥିବା ୯ ହଜାର ୩୧୦ଲିଟର ପୋଚକୁ ନଷ୍ଟ କରାଯାଇଛି।
ଅବକାରୀ ବିଭାଗ ବାରମ୍ବାର ଚଢାଉ କରୁଥିଲେ ମଧ୍ୟ ଦେଶୀ ଚୋରାମଦ ରନ୍ଧନକୁ ରୋକାଯାଇପାରୁନାହିଁ ଓ ମଦଭାଟି ସମ୍ପୂର୍ଣ୍ଣ ବନ୍ଦ ହେଉନାହିଁ । ଯାହାଫଳରେ କି ବୁଦ୍ଧିଜୀବି ମହଲରେ ସଂଶୟ ସୃଷ୍ଟି ହୋଇଛି। କହିବାକୁ ପଛାଉନାହାନ୍ତି ଢୋଲ ଭିତରେ ମୂଷା କିଏ ଅଛି ବୋଲି । କାରଣ ଆଜିର ଚଢାଉରେ ଏତେ ପରିମାଣର ଦେଶୀମଦ ଜବତ ଓ ପୋଚ ନଷ୍ଟ କରାଯାଇଥିଲେ ମଧ୍ୟ କାହାରିକୁ ଗିରଫ କରାଯାଇନାହିଁ । ତେଣୁ ଏ ଚଢାଉ ଯେ କେଳବ ଲୋକଦେଖାଣିଆ ବୋଲି ସ୍ଥାନୀୟ ଅଞ୍ଚଳରେ ଚର୍ଚ୍ଚା ହେଉଛି । ଉଲ୍ଲେଖଯୋଗ୍ୟ, ଗତ ସପ୍ତାହରେ ସମାଜରେ ଚୋରା ଦେଶୀମଦ ରନ୍ଧନ ଓ ଭାଟି ସମ୍ପର୍କରେ ତଥ୍ୟଭିତ୍ତିକ ଖବର ପ୍ରକାଶ ପାଇଥିଲା । ଅବକାରୀ ଅଧୀକ୍ଷକ କରୁଣା ଶଙ୍କର ତିୱାରୀଙ୍କ ନିର୍ଦ୍ଦେଶ କ୍ରମେ ଆଠଗଡ ଅବକାରୀ ଉପଅଧୀକ୍ଷକ ନିମାଇଁ ଚରଣ ସିଂ, ଅବକାରୀ ନିରୀକ୍ଷକ ହେମନ୍ତ ମହାନନ୍ଦିଆ, ଖୁଣ୍ଟୁଣୀ ଥାନା ଉପନିରୀକ୍ଷକ ଡଃ ବିକାଶ ସେଠୀ, ଅବକାରୀ ଉପନିରୀକ୍ଷକ ଅରୁଣ ଭୋଇ, ଉପନିରୀକ୍ଷକ ଜ୍ୟୋତିର୍ମୟୀ ଦାସ ଓ ତରୁଣ କୁମାର ପାତ୍ର ପ୍ରମୁଖ ଅଂଶଗ୍ରହଣ କରିଥିଲେ।
